ကရင်ပြည်နယ် မြ၀တီမြို့နယ် လေးကေ့ကော်ဒေသ ၌ ကရင်အမျိုးသားအစည်းအရုံး(KNU) ဦးဆောင်သည့် ပူးပေါင်းစစ်ကြောင်းနှင့် စစ်ကောင်စီတပ်တို့ ယမန်နေ့ (ဧပြီ ၂၁ရက်) ညပိုင်းက လက်နက်ကြီးဖြင့် အပြန်အ လှန်ပစ်ခတ်မှု ဆက်လက်ဖြစ်ပွားခဲ့ဟု အဆိုပါဒေသရှိ ပြည်သူ့ကာကွယ်ရေးတပ်(PDF) တပ်မှူးတစ်ဦးက ပြောသည်။
“ညနေစောင်းက ထိတွေ့မှု ဖြစ်ကြတယ်။ ထိတွေ့မှုဖြစ်တယ်ဆိုတာက ဟိုဘက်က တက်လာတဲ့သဘောမဟုတ်ဘူး အပြန်အလှန်ထိတွေ့မှုဖြစ်တဲ့သဘော။ အဲဒီနောက်မှာ သူတို့ လက်နက်ကြီးတွေ ပစ်တယ်။ ဟိုရက်တွေကထက်စာရင်တော့ သူတို့မပစ်ဘူး။ နည်းနည်းပါးပါး ခြောက်လှန့်ပစ်ခတ်တဲ့သဘောပါပဲ” ဟု အဆိုပါ တပ်မှူးက ယမန်နေ့ည လေးကေ့ကော်ဒေသ အခြေအနေကို ပြောပြသည်။
လေးကေ့ကော်ဒေသ၌ စစ်ကောင်စီတပ်က အင်အားအလုံးအရင်းဖြင့် ထိုးစစ်ဆင်ရန် ပြင်ဆင်နေသည် ဟု သတင်းများ ထွက်ပေါ်နေရာ ပူးပေါင်းတပ်ဖွဲ့အနေဖြင့်လည်း ခုခံတိုက်ခိုက်ရန် ပြင်ဆင်ထားသည်ဟု ဆိုသည်။
“ပုံမှန်ကတော့ ကင်းအချင်းချင်းထိတွေ့မှုတွေက နေ့တိုင်းနီးပါးရှိတယ်။ ရှေ့တန်းကင်းတွေ စနှိုက်ပါနဲ့ ပစ်ကြတာတို့၊ လက်နက်ငယ်နဲ့ပစ်ကြတာတို့။ ပစ်တယ်ဆိုတဲ့ သဘောကလည်း ထိတွေ့မှု သဘောမျိုးမဟုတ်ဘဲ သူ့ကင်း ကိုယ့်ကင်းက အပြန်အလှန် ပစ်တဲ့ သဘောမျိုးပါ”ဟု PDF တပ်မှူးက ပြောသည်။
ယခုလအတွင်း လေးကေ့ကော်၌ တိုက်ပွဲများဖြစ်ခဲ့ရာ စစ်ကောင်စီတပ်က ထိခိုက်သေဆုံးမှုများပြားခဲ့ရာ လေကြောင်းမှ ဗုံးကြဲတိုက်ခိုက်မှုများ ပြုလုပ်ခဲ့သည်ဟု ဆိုသည်။