ကရင်အမျိုးသားအစည်းအရုံး(KNU) တပ်မဟာ(၁) နယ်မြေ သထုံမြို့နယ်ရှိ စစ်ကောင်စီတပ်စခန်း နှစ်ခုကို ယမန်နေ့နှင့် ယနေ့တွင် သွားရောက်ပစ်ခတ်တိုက်ခိုက်ခဲ့ကြောင်း သထုံပြည်သူ့ကာကွယ်ရေးတပ်(PDF)က သတင်းထုတ်ပြန်သည်။
KNU လက်အောက်ခံ ကရင်အမျိုးသားလွတ်မြောက်ရေးတပ်မတော်(KNLA)နှင့် PDF ပူးပေါင်း အဖွဲ့သည် ယနေ့ ဧပြီ ၂၆ရက် မွန်းလွဲ ၃နာရီခွဲတွင် သထုံမြို့နယ်၊ ပိန္ဒဲတောကျေးရွာရှိစစ်ကောင်စီစခန်းအား လက်နက်ကြီး၊ လက်နက်ငယ်များဖြင့် ပစ်ခတ်တိုက်ခိုက်ခဲ့သည်ဟု ဖော်ပြသည်။
ထိုသို့ ပစ်ခတ်မှုကြောင့် အထိအခိုက်အကျအဆုံး အခြေအနေကို မသိရသေးဟုဆိုသည်။
ယမန်နေ့ (ဧပြီ ၂၅ရက်) နံနက်ပိုင်းကလည်း သထုံမြို့နယ်၊ ဝီယော်ကျေးရွာရှိစစ်ကောင်စီစခန်းအား KNLAနှင့် PDF ပူးပေါင်းအဖွဲ့မှ လက်နက်ကြီးဖြင့် တိုက်ခိုက်ခဲ့သည်ဟု သထုံ PDFက ထုတ်ပြန်သည်။
အဆိုပါ တိုက်ခိုက်မှုကို မနက် ၇နာရီမှ ၁၀နာရီအထိ ပြုလုပ်ခဲ့ပြီး စစ်ကောင်စီတပ်မှ အထိခိုက်အကျဆုံး မသိရသေးကြောင်း ဖော်ပြထားသည်။
KNLA/PDF ပူးပေါင်း တပ်ဖွဲ့အနေဖြင့် သထုံခရိုင်အတွင်းရှိ စစ်ကောင်စီတပ်စခန်းများ၊ တပ်စွဲရာနေရာများကို သွားရောက် ပစ်ခတ်တိုက်ခိုက်မှုများ မကြာခဏ လုပ်ဆောင်လျက်ရှိသည်။
