မကွေးတိုင်း ပေါက်မြို့နယ် ဒီးဒုတ်ကွင်းရွာရှိ စစ်ကောင် စီတပ်နှင့် ပျူစောထီးများကို တော်လှန်ရေးပူးပေါင်းတပ်ဖွဲ့များက ယမန်နေ့ညပိုင်း၌ ဝင်ရောက်တိုက်ခိုက်ခဲ့ကြောင်း စစ်ကောင်စီဘက်မှ သေဆုံးထိခိုက်မှုရှိသည်ဟု ပေါက်တောင်ပိုင်း ပြည်သူ့ကာကွယ်ရေးတပ်(PDF)က ထုတ်ပြန်သည်။
ပေါက်မြို့နယ်ရှိ ကျေးရွာများသို့ ဝင်ရောက်စီးနင်း မီးရှို့ဖျက်ဆီးမှုများ လုပ်ဆောင်ရာတွင် စစ်ကောင်စီတပ်များနှင့်အတူ ပူးပေါင်းပါဝင်ခဲ့သည့် ဒီးဒုတ်ကွင်း ပျူရွာကို Young Revolution Front (YRF) ၊ Southern Pauk Guerrilla Force( SPGF) ၊ Yaw Defence Force ( Saw-YDF)နှင့် Southern Pauk People’s Defense Force(SPPDF) တို့က မေလ ၂ရက်ည ၂နာရီခန့်တွင် ဝင်ရောက်စီးနင်း တိုက်ခိုက်ခဲ့ရာ ၄၅မိနစ်ကြာ ပစ်ခတ်မှု ဖြစ်ခဲ့သည်ဟုဆိုသည်။
အပြန်အလှန် ပစ်ခတ်တိုက်ခိုက်မှုများ၌ မဟာမိတ်ပူးပေါင်းတပ်များဘက်က ကျည်အင်အား မလုံလောက်မှု၊ လက်နက်အင်အားမမျှတမှုကြောင့် ပြန်လည်နောက် ဆုတ်ပေးခဲ့ရသည်ဟု ဖော်ပြထားသည်။
အဆိုပါ တိုက်ခိုက်မှုတွင် စစ်ကောင်စီတပ်နှင့် ပျူစောထီးများဘက်က တစ်ဦးသေဆုံးပြီး တစ်ဦးဒဏ်ရာရခဲ့ကြောင်း၊ ပူးပေါင်းတပ်ဖွဲ့မှ ရဲဘော်တစ်ဦးလည်း ဒဏ်ရာရခဲ့ကြောင်း ထုတ်ပြန်သည်။
အဆိုပါ ဒီးဒုတ်ကွင်းရွာကို ဧပြီ ၂၄ရက်ကလည်း ဒေသတွင်းတော်လှန်ရေးပူးပေါင်းတပ်က ဝင်ရောက်တိုက်ခိုက်ခဲ့ရာ နာရီဝက်ကြာ ပစ်ခတ်မှုဖြစ်ခဲ့သည်။ ထိုစဉ်က ဒီးဒုတ်ကွင်းရွာကို စစ်ကူလာသည့် စစ်ကောင်စီယာဉ်ကို မိုင်းဆွဲတိုက်ခိုက်ခဲ့ရာ စစ်ကောင်စီတပ်မှ ထိခိုက်မှုရှိနိုင်သည်ဟု ပေါက်တောင်ပိုင်း PDF တပ်ဖွဲ့ဝင်တစ်ဦးက ပြောကြားခဲ့သည်။