စစ်ခေါင်းဆောင်ရဲ့ငြိမ်းချမ်းရေးဆွေးနွေးပွဲ KIO တက်ရောက်မှာမဟုတ်

စစ်ကောင်စီခေါင်းဆောင် ကိုယ်တိုင်ဖိတ်ခေါ်ထားတဲ့ ငြိမ်းချမ်းရေးဆွေးနွေးပွဲဟာ ပါဝင်သင့်သူ အားလုံးကို ဖိတ်ခေါ်တာ မရှိတာကြောင့် တက်ရောက်မှာမဟုတ်ကြောင်း ကချင်လွတ်မြောက်ရေးအဖွဲ့ (KIO ) ဒီနေ့မှာ ထုတ်ပြန်လိုက်ပါတယ်။

စစ်ကောင်စီရဲ့ ဖိတ်ခေါ်ချက်အပေါ် KIO က အချက် ၂ ချက် ထောက်ပြထားပါတယ်။

အဲဒီအချက်တွေကတော့ ပါဝင်သင့်သူအားလုံး ကို ဖိတ်ခေါ်တာမရှိတာ ၊ နိုင်ငံရဲ့အရေးအရာတွေကို ဆွေးနွေး အဖြေရှာမယ်ဆိုတဲ့သဘောထားမပါတာကိုတွေ့ရတယ်လို့ KIO က ဆိုထားတာပါ။

ဒါကြောင့် ပါဝင်သင့်သူအားလုံးပါဝင်နိုင်ပြီး နိုင်ငံရဲ့အရေးအရာတွေကို တန်းတူဆွေးနွေးနိုင်မယ့် အချိန်အခါ အခင်းအကျင်း ရောက်ရှိမှသာ ပါဝင်ဆွေးနွေးမယ်လို့ KIO က အသိပေးထုတ်ပြန်ထားတာတွေ့ရပါတယ်။

Public Service Announcement

စစ်ကောင်စီခေါင်းဆောင်ဟာ တိုင်းရင်းသားလက်နက်ကိုင်အဖွဲ့ခေါင်းဆောင်တွေနဲ့တွေ့ဆုံလိုကြောင်း ဖိတ်ခေါ်ထားပြီး တက်ရောက်မယ့် အဖွဲ့တွေအနေနဲ့ မေလ ၉ ရက် နောက်ဆုံးထားပြီး စာရင်းပေးကြဖို့ ပြောထားပါတယ်။

ဒါပေမယ့် အဲဒီဖိတ်ခေါ်ချက်မှာ NUG ၊ PDF ကိုထည့်သွင်းထားခြင်းမရှိပါဘူး။ NUG နဲ့ PDF ဟာအကြမ်းဖက်အဖွဲ့ဖြစ်လို့တွေ့ဆုံစရာမလိုကြောင်း စစ်ကောင်စီပြောရေးဆိုခွင့်ရှိသူက ထုတ်ပြောထားပါတယ်။

နိုင်ငံရေးလေ့လာသုံးသပ်သူတွေက ဆွေးနွေးမှုမှာ NUG ၊PDF ကို ချပ်လှပ်ထားရင် အဖြေထွက်မှာမဟုတ်ကြောင်းသုံးသပ်ထားကြပါတယ်။

KNU ကလည်း PDF မပါရင် ငြိမ်းရေးရမှာမဟုတ်ကြောင်းအတိအလင်းပြောထားပါတယ်။