ကန့်ဘလူနယ်​မြောက်ခြမ်းရှိ ​ရွာများအား စစ်အုပ်စု မီးရှို့ဖျက်ဆီး၍ ​နေအိမ် ၃၀​ကျော်ပြာကျ

စစ်ကိုင်းတိုင်း၊ ကန့်ဘလူမြို့နယ်​မြောက်ခြမ်းရှိ ​ကျေးရွာများအား စစ်​ကောင်စီတပ်နှင့်ပျူစောထီးများက ဝင်​ရောက်မီးရှို့ဖျက်ဆီးခဲ့၍ ​နေအိမ် ၃၀​ကျော် ပြာကျခဲ့ကြောင်း ဒေသခံများက ပြောသည်။

ကန့်ဘလူမြို့နယ်​မြောက်ခြမ်း ချပ်သင်း​ဒေသနှင့် ချပ်ကြီး​ဒေသရှိ ​ကျေးရွာများအား အကြမ်းဖက်စစ်​ကောင်စီတပ်နှင့် ပျူစောထီးများက ယ​မန်နေ့(မေလ ၁၇ရက်) နံနက်ပိုင်းက ဝင်​ရောက်မီးရှို့ခဲ့​ခြင်းဖြစ်ကြောင်း ဒေသခံများက ပြောသည်။

အကြမ်းဖက်စစ်တပ်နှင့် ပျူစောထီးများသည် ချပ်သင်းရွာအ​ရှေ့ဘက် ဦးကင်းကြည်​ကျေးရွာရှိ နေအိမ် နှစ်လုံးအား မီိးရှို့သွားခဲ့သည်။

ထို့​နောက် ဦးကင်းကြည်ရွာအ​ရှေ့ဘက်ရှိ တင်​မော်​​ကျေးရွာသို့ ဝင်​ရောက်စဥ် ဒေသခံကာကွယ်​ရေးတပ်ဖွဲ့ (ပ.က.ဖ)အဖွဲ့နှင့် ပစ်ခတ်မှုဖြစ်ပွားရာ (ပ.က.ဖ)ဘက်မှ ရဲ​ဘော် သုံးဦးဒဏ်ရာ(အသက်အန္တရာယ် မစိုးရိမ်ရ)ရရှိသွားကြောင်း ဒေသခံများက ပြောသည်။

Public Service Announcement

(ပ.က.ဖ)အဖွဲ့များဆုတ်ခွာသွားစဥ် စစ်အုပ်စုက တင်​မော်ရွာကို မီးတင်ရှို့ရာ ​နေအိမ် ၂၅လုံးခန့်ပြာကျသွား​ကြောင်း ဒေသခံတို့က ပြောသည်။ အကြမ်းဖက်အုပ်စုသည် ပုဏ္ဏားကြီး​ကျေးရွာရှိ နေအိမ် တစ်လုံး၊ ချပ်ကြီးဒေသ၊ ပိ​တောက်ပင်ရွာရှိ နေအိမ် ရှစ်လုံးတို့ကို ထပ်မံမီးရှို့သွားခဲ့သည်။

မေလ ၁၄ ရက်​ကလည်း ချပ်သင်းရွာမှ အကြမ်းဖက်စစ်​အုပ်စုသည် ဆားကျင်း​ကျေးရွာရှိ နေအိမ် ​လေးလုံးကို မီးရှို့ဖျက်ဆီးခဲ့သေးသည်။

အကြမ်းဖက်စစ်တပ်နှင့် ပျူစောထီးများဝင်ရောက်ဖျက်ဆီးမီးရှို့နေမှုကြောင့် ချပ်သင်းနှင့် ချပ်ကြီးဒေသရှိ ကျေးရွာများမှ ပြည်သူထောင်ချီ ထွက်ပြေးတိမ်းရှောင်နေရကြောင်း ဒေသခံများက ပြောသည်။