ကနီမြို့နယ်တွင် အင်အား ၈၀ခန့်ပါ စစ်ကောင်စီခြေလျင်စစ်ကြောင်းကို ဗိုလ်နဂါးဦးဆောင်သောတပ်နှင့် PDFတို့ ပူးပေါင်းတိုက်ခိုက်ရာ ၁၅ဦးသေ

အင်အား၈၀ခန့်ပါရှိသော စစ်ကောင်စီတပ် စစ်ကြောင်းကို ကနီမြို့နယ်တွင် တိုက်ခိုက်ခဲ့ရာ ၁၅ ဦးခန့်သေဆုံးကြောင်း မြန်မာ့တော်ဝင်နဂါးတပ်တော်(MRDA)က ယနေ့(ဇွန် ၆ ရက်) ထုတ် ပြန်သည်။

တိုက်ပွဲဖြစ်စဥ်အရ ယမန်နေ့(ဇွန် ၅ ရက်) နံနက် ၈နာရီခွဲခန့်က ချင်းတွင်းမြစ်ကြောင်းရှိ စစ် ကောင်စီတပ်ကို ကာကွယ်ရန် ကနီမြို့နယ် အိုင်းတောင်မှထွက်ခွာလာသော စစ်ကောင်စီ ခြေလျင်စစ်ကြောင်းကို သပြေတောရွာမရောက်မီ အနောက်ဘက်၌ မိုင်းဆွဲတိုက်ခိုက်ခဲ့သည်ဟု ဆိုသည်။

တိုက်ခိုက်မှုဖြစ်စဥ်နေရာတွင် စစ်ကောင်စီတပ်သား ၁၅ဦးလဲကျသွားသည်ကို MRDA က အတည်ပြုသည်။

ထို့နောက် အထိနာခဲ့သောအကြမ်းဖက်စစ်ကောင်စီက အနီးရှိကျေးရွာများကို မီးရှို့ဖျက်ဆီးခဲ့ကြောင်း အသိပေးသည်။

Public Service Announcement

အဆိုပါ တိုက်ခိုက်မှုကို ဆားလင်းကြီးအခြေစိုက် မြန်မာ့တော်ဝင်နဂါးတပ်တော် (M.R.D.A/ဆားလင်းကြီး)မှ ဒေါင်းမျိုးဆက်PDF တော်လှန်ရေးတပ်ပေါင်းစုတို့ ပူးပေါင်းဆောင်ရွက်ခဲ့ပြီး ဘေးကင်းစွာဆုတ်ခွာနိုင်ခဲ့ကြောင်း ထုတ်ပြန်ချက်၌ ဖော်ပြသည်။

ယမန်နေ့က ချင်းတွင်းမြစ်ရိုးတစ်လျှောက် ကျောက်စိမ်းဖလပ်ခွန်များကို ကုန်းကြောင်းမှ တပ်ကူပေးနေသည့် စစ်ကောင်စီတပ်ကို တိုက်ခိုက်ရာ စစ်ကောင်စီတပ်သား ၁၅ ဦးထက်မနည်းထိခိုက်သေဆုံးကြောင်းနဂါးညီနောင်အထူးတပ်ဖွဲ့(DBTF)ကလည်း ထုတ်ပြန်ထားသည်။

တိုက်ပွဲအတွင်း စစ်ကောင်စီ၏လက်နက်ကြီးကြောင့် ရဲဘော်နှစ်ဦး(မစိုးရိမ်ရ) ဒဏ်ရာရရှိခဲ့ပြီး ပြန်လည်ဆုတ်ခွာနိုင်ခဲ့သည်ဟု ဆိုသည်။

“အခုက ရန်သူလာမယ့် လမ်းကြောင်းတွေကို ကြိုသိနေပေမယ့်တိုက်ပွဲကို ကြားဖြတ်လောက်ပဲ ကျွန်တော်တို့ တိုက်နိုင်နေတယ်။အဓိကတော့ ကျည်၊ခဲယမ်း မလုံလောက်ဘူးဖြစ်နေတယ်”ဟု DBTF တာဝန်ရှိသူက People’s Springသို့ ပြောသည်။

၁နာရီအကြာထိတွေ့မှုနောက်ပိုင်း စစ်ကောင်စီတပ်က ကနီမြို့နယ်၊ အုန်းပင်ဆိပ်ရွာကို မီးရှို့ခဲ့ သည်ဟု DBTF က အသိပေးသည်။