▪️ရွာသားအချို့လည်းပျောက်ဆုံးနေဟု ပြည်သူ့ကာ ကွယ်ရေးအဖွဲ့ပြော
စစ်ကိုင်းတိုင်း ပုလဲမြို့နယ် တောင်ရွာသစ်ကျေးရွာမှ အမျိုးသမီးသုံးဦးအပါအဝင် အရပ်သားပြည်သူလေးဦးကို အကြမ်းဖက်စစ်ကောင်စီနှင့် ပျုစောထီးများက သတ်ဖြတ်သွားပြီး ရွာသားအချို့လည်းပျောက်ဆုံးနေ သည်ဟု ပြည်သူ့ကာကွယ်ရေးအဖွဲ့က ဓာတ်ပုံမှတ်တမ်းများဖြင့် ထုတ်ပြန်သည်။
စစ်ကောင်စီတပ်နှင့် ပျုစောထီးများသည် တောင်ရွာသစ်ကျေးရွာကို ဇူလိုင် ၁၁ရက်က အကြမ်းဖက်ဝင်ရောက်ခဲ့ရာ ဒေသခံများထွက်ပြေးတိမ်းရှောင်ခဲ့ကြရသည်။ ၎င်းတို့ ပြန်ထွက်ခွာသွားပြီးနောက် ဒေသခံများနှင့် ပြည်သူ့ကာကွယ်ရေးရဲဘော်များက ကျေးရွာကို ပြန်လာစဥ် အသတ်ခံထားရသည့် ရုပ်အလောင်းများကို တွေ့ရှိခြင်းဖြစ်သည်။
” ဦးခေါင်းတွေ၊ ဝမ်းဗိုက်တွေမှာ ဒဏ်ရာတွေနဲ့ အသတ်ခံထားရတာ။ အမျိုးသမီးသုံးယောက်ပါတယ်ဗျာ။ ရက်ရက်စက်စက်အသတ်ခံထားရတာပါ”ဟု ပုလဲမြို့ နယ် ပြည်သူ့ကာကွယ်ရေးတပ်ဖွဲ့မှ တာဝန်ရှိသူတစ်ဦးက People’s Spring သို့ ယနေ့(ဇူလိုင်၁၄ရက်) ပြောသည်။
“ပျောက်ဆုံးနေတဲ့ ရွာသားတွေလည်း ရှိနေသေးတယ်။ ကျွန်တော်တို့ အသေးစိတ် စုံစမ်းနေဆဲပဲ”ဟု ၎င်းက ဆိုသည်။
Public Service Announcement
ပြည်သူ့ကာကွယ်ရေးရဲဘော်များအား ထောက်ပံ့နေသူ များဟု ဒေသခံများအားစွပ်စွဲကာ သတ်ဖြတ်သွားခြင်းဖြစ်နိုင်ကြောင်း ဒေသခံများက ပြောသည်။
သေဆုံးသူ အမျိုးသမီးသုံးဦးမှာ အသက် ၄၅နှစ်ခန့်နှစ်ဦးနှင့် အသက် ၃၀ခန့် တစ်ဦးဖြစ်သည်။ထို့အပြင် အမျိုးသမီးများအား အဓမ္မပြုကျင့်သတ်ဖြတ်သွားကြောင်း ဒေသခံအချို့က ယူဆနေသော်လည်း ယင်းအချက်ကို အတည်မပြုနိုင်သေးကြောင်း ပုလဲမြို့နယ် ပြည်သူ့ကာကွယ်ရေးတပ်ဖွဲ့က ဆိုသည်။
တောင်ရွာသစ်ကျေးရွာကို အကြမ်းဖက်သွားသည့် စစ်ကောင်စီတပ်သည် ပုလဲနယ်ကို ဖြတ်ပြီးနောက် ယခုအခါ မြိုင်မြို့နယ်ဘက်သို့ ဆက်လက်စစ်ကြောင်းထိုးနေသည်ဟု ပုလဲမြို့နယ်ဒေသခံများက သတိပေးသည်။
