စစ်အုပ်စု၏ မိုက်ရိုင်းရူးသွပ်စွာကွပ်မျက်မှုက နိုင်ငံရေးနည်းဖြင့် ငြိမ်းချမ်းစွာ ဖြေရှင်းနိုင်ရေးကို ပြောင်ကျကျ အဆုံးသတ်ခြင်းဖြစ်ဟု DPNS ထုတ်ပြန်

ဒီမိုကရေစီအရေးတက်ကြွလှုပ်ရှားသူ ၄ ဦးကို စစ်အုပ်စုက မိုက်ရိုင်းရူးသွပ်စွာ သတ်ဖြတ်ကျူးလွန်လိုက်ခြင်းသည် နိုင်ငံရေးပြဿနာအဝဝကို နိုင်ငံရေးနည်းဖြင့် ငြိမ်းချမ်းစွာ ဖြေရှင်းနိုင်ရေး အခွင့်အလမ်းတံခါး အပြီးအပိုင် ပိတ်လိုက်ပြီဟု ‘ပြောင်’ ကြေညာလိုက်ခြင်းဖြစ်ကြောင်း လူ့ဘောင် သစ်ဒီမိုကရက်တစ်ပါတီ(DPNS)က ထုတ်ပြန်သည်။

စစ်အုပ်စုသည် နိုင်ငံတကာက လိုလားနေသည့် စေ့စပ်ဆွေးနွေး ညှိနှိုင်းရေးနည်းလမ်းအား ယတိပြတ်ပယ်ချကြောင်း ‘ပြောင်’ကြေညာလိုက်ခြင်းဖြစ်သည်ဟုလည်း DPNS က အလေးအနက်မှတ်ယူသည်ဟု ဆိုသည်။

ထို့အတွက် စစ်အာဏာရှင်စနစ် အမြစ်ဖြတ်သုတ်သင်ရေး၊ ၂၀၀၈ ခြေ/ဥ ဖျက်သိမ်းရေး၊ ဖက်ဒရယ်ဒီမိုကရေစီ ပြည်ထောင်စု တည်ဆောက်ရေး ဟူသည့် နွေဦးတော်လှန်ရေး၏ အဓိက ဦးတည်ချက်များအနက် အခြေခံအကျဆုံး ဖြစ်သော စစ်အာဏာရှင်စနစ် အမြစ်ဖြတ်သုတ်သင်ရေး တာဝန်ကို လူမျိုးပေါင်းစုံ မြန်မာပြည်သူတရပ်လုံးနှင့်အတူ ပူးပေါင်းလက်တွဲလျက် အကျေအပွန် ထမ်းရွက်သွားမည်ဟု DPNS က ကတိပြုသည်။

ဦးဂျင်မီ၊ ဦးဖြိုးဇေယျာသော်၊ ကိုလှမျိုးအောင်၊ ကိုအောင်သူရဇော်တို့ ၄ ဦးကို ပြစ်ဒဏ်စီရင်ခြင်းသည် အာဏာသိမ်း စစ်အုပ်စုအနေဖြင့် ဥပဒေမဲ့ လူသတ်မှုကျူးလွန်ခြင်း ဖြစ်ကြောင်း DPNS က ပြင်းပြင်းထန်ထန် ကန့်ကွက် ရှုတ်ချသည်။

Public Service Announcement

တပြိုင်တည်းတွင် DPNS ပါတီခေါင်းဆောင်ဟောင်း ဦးဂျင်မီအား လူမျိုးစုံမြန်မာပြည်သူများအတွက် အသက်ခန္ဓာ စွန့်လွှတ်ရသည်အထိ ပြောင်မြောက်စွာ တိုက်ပွဲဝင်ခဲ့ခြင်းကို လေးစားဂုဏ်ယူ မှတ်တမ်းတင်ပါကြောင်းလည်း ဖော်ပြသည်။

ထိုနည်းတူ ကြိုးပေးသတ်ဖြတ်ခံရသူ ရဲဘော် ၄ ဦးလုံး၏ မိသားစုများနှင့်ထပ်တူ DPNS က အထူးကြေကွဲ ဝမ်းနည်းရပါကြောင်း အလေးအနက်ဖော်ပြသည်။