‘စမှတ်’ ဇာတ်လမ်းတို ရုပ်ရှင် ပထမဆုံးပွဲစဉ်အတွက် လက်မှတ်ရောင်းချမှုကို ဩဂုတ် ၆ ရက် နေ့လည် ၁၂ နာရီတွင် ရောင်းချမှုပိတ်မည်ဟု အသိပေးထား သည်။
“”စ” မှတ် ရုပ်ရှင်ဇာတ်လမ်းတို လက်မှတ်ရောင်းချမှုကို August 6th ရက်နေ့ မြန်မာစံတော်ချိန် နေ့လည်-၁၂ နာရီတိတိတွင် ရောင်းချမှု ခေတ္တပိတ်ပါမယ် ခင်မျာ။ ဝယ်ယူထားပြီးသော မိသားစုများ အဆင်ပြေစွာ ကြည့်ရှုနိုင်စေရန် အတွက် ပြင်ဆင်ရမယ့်အချိန်ဟာ မှန်းဆထားတာထပ် ပိုမိုလိုအပ်ပါသော ကြောင့် နားလည်ပေးပါရန် အနူးအညွှတ် မေတ္တာရပ်ခံပါတယ်။”ဟု စမှတ် ၏ပေ့ခ်ျ၌ ကြေညာထားသည်။
ယင်းဇာတ်ကားလက်မှတ်ဝယ်ယူထားသူများအနေဖြင့် ဩဂုတ် ၈ ရက် နံနက် ၈ နာရီတွင် ကြည့်ရှုခွင့်ရရှိမည်ဖြစ်ပြီး လက်မှတ်မရရှိသေးသည့်သူများအတွက် လက်မှတ်များပြန်လည်ရောင်းချ ပေးကာ ပွဲချိန်အသစ်အနေဖြင့် ထပ်မံပြသပေးမည်ဖြစ်သည်။
စမှတ် ဇာတ်လမ်းတိုရုပ်ရှင်ကို အဆိုတော် လင်းလင်းက ဇာတ်ညွှန်း၊ ဒါရိုက်တာ အဖြစ်တာဝန်ယူ ရိုက်ကူးထားပြီး သရုပ်ဆောင် ဒေါင်း နှင့်ချစ်သုဝေတို့က အဓိကပါဝင်သရုပ်ဆောင်ထားသည်။
Public Service Announcement
ယင်းဇာတ်ကားအတွက် လက်မှတ်တစ်စောင်လျှင် ကျပ်သုံးသောင်း သတ်မှတ် ထားပြီး ပြည်ပနိုင်ငံများအတွက်လည်း သတ်မှတ်ထားသည့် ဈေးနှုန်းများဖြင့် ဝယ်ယူကြည့်ရှုနိုင်မည် ဖြစ်သည်။
လက်မှတ်များကို ဇူလိုင် ၃၁ ရက် ညပိုင်းတွင် စတင်ရောင်းချခဲ့ခြင်းဖြစ်ပြီး လက်မှတ်ဝယ်ယူ သူများပြားသောကြောင့် စမှတ် ပေ့ခ်ျ၏ မက်ဆန်ဂျာ Error တတ်ခဲ့၍ ချစ်သုဝေ၏ Treza’s Macrame Family ပေ့ခ်ျ၌ ရောင်းချခဲ့ရသည်။
လက်မှတ်များကို Treza’s Macrame Family ပေ့ခ်ျတစ်ခုတည်း၌ ရောင်းချခဲ့ခြင်းဖြစ်ပြီး လိမ်လည်၍ လက်မှတ်ရောင်းချမှုများရှိသောကြောင့် လိမ်လည်ရောင်းချနေသူများ၏ ပေ့ခ်ျများ ၊ အကောင့်များကို ဓာတ်ပုံရိုက်၍ စမှတ်ပေ့ခ်ျ၌ ကြေညာပေးထားသည်။
ရုပ်ရှင်လက်မှတ် ၅၀၀ ခန့်ရောင်းချရမည်ဟု မှန်းထားခဲ့သော်လည်း ထင်ထားသည်ထက် လက်မှတ်ဝယ်ယူသူများပြားခဲ့သောကြောင့် မနိုင်မနင်း ဖြစ်ခဲ့ရကြောင်းနှင့် လက်မှတ်ဝယ်ယူမှု အဆင်ပြေစေရန်အတွက် ဝယ်ယူရမည့် ပုံစံကို ချစ်သုဝေက Live လွှင့်၍ ပြောကြားခဲ့သည်။
ယင်းဇာတ်ကားမှ ရရှိလာသည့် ငွေကြေးများကို တော်လှန်ရေးအတွက် အသုံးပြုမည်ဖြစ်ပြီး တော်လှန်ရေးအတွက် ငွေအများအပြားလိုသောကြောင့် အားပေးကြရန် လင်းလင်းက မေတ္တာရပ်ခံထားသည်။
ထို့ပြင် ဇာတ်ကားပြသပြီးချိန်၌ လူမှူကွန်ရက်တွင် ပြန့်နှံ့ခြင်းမဖြစ်စေရန် အချင်းချင်းကူညီပေးစေလိုကြောင်း လင်းလင်းက တောင်းဆိုထားသည်။
