အာဏာသိမ်းစစ်ကောင်စီ၏ စစ်ရေယာဥ်တစ်စီး ကလေးဝမြို့မှ ချင်းတွင်းမြစ်အောက်ဘက်သို့ ပြန်ဆင်းလာနေသဖြင့် မြစ်ရိုးတစ်လျှောက်ရှိ ဒေသခံပြည်သူများ သတိပြုသွားလာကြရန် ကျောက်လုံးကြီး KLG PDFက ယနေ့(သြဂုတ် ၁၃ ရက်) ထုတ်ပြန်သည်။
ယမန်နေ့ကစ၍ စစ်ရေယာဉ်သင်္ဘောတစ်စီး သည် ကလေးဝမြို့မှစတင်စုန်ဆင်လာခဲ့ပြီးနောက် မင်းကင်းမြို့နယ် ပန်းဆက် ပျူစောထီးရွာတွင် ညအိပ်စခန်းချခဲ့သည်ဟု ဆိုသည်။
“ဒီစစ်သင်္ဘောက အရင်လကတည်းက စခတွေရဲ့ လက်နက်ခဲယမ်း ရိက္ခာတွေကို လုံခြုံရေးယူခဲ့တာ။အခုက မုံရွာအထိ ကိုပြန်ဆင်းမယ်လို့ သိထားရတယ်”ဟု KLG PDF က လူထုနွေဦးသို့ ပြောသည်။
စစ်ကိုင်းအထက်ပိုင်းရှိ ခန္တီး၊ ဟုမ္မလင်းမြို့သို့ စစ်လက်နက်ရိက္ခာဖြည့်တင်ရန် အကြမ်းဖက်စစ်ကောင်စီက ချင်းတွင်းမြစ်ကြောင်းကို ဇူလိုင် ၁၈ ရက်ကစ၍ သုံးစွဲခဲ့ပြီး စစ်ရေယာဥ်များကိုပါ အင်အား ဖြည့်တင်းခဲ့သည်။
Public Service Announcement
ထို့ကြောင့် ချင်းတွင်းမြစ်ကြောင်း တစ်လျှောက်ရှိ ပြည်သူ့ကာကွယ်ရေးတပ်ဖွဲ့များက ဇူလိုင် ၁၈ ရက်ကစ၍ ၂၀ ရက်အထိ ပူးပေါင်းတိုက်ခိုက်ခဲ့ပြီးနောက် စစ်ကောင်စီတပ်မှသေဆုံးသူ ဆယ်ဂ ဏန်းအထက်ရှိခဲ့ပြီး သေဆုံးခဲ့သည့် စစ်ကောင်စီတပ်သားရုပ်အလောင်းတစ်ခုမှာ ချင်းတွင်းမြစ် ကြောင်း၌ မျောပါသည်ကိုတွေ့ရှိခဲ့ရသည်။
ထို့နောက် စစ်ရေယာဥ်အုပ်စုကို အကာအကွယ်ပေးရန် စစ်ကောင်စီတပ်က ကုန်းကြောင်းစစ် ကြောင်းတစ်ခုပါ အသုံးပြုခဲ့သည်ဟု ဆိုသည်။
