သေဆုံးမှုများ၍ တပ်ဆုတ်သွားရသည့် အကြမ်းဖက် စစ်ကောင်စီတပ်က တကျော့ပြန်ထိုးစစ်ဆင်လာကြောင်း မိုးဗြဲပြည်သူ့ကာကွယ်ရေးတပ်(MBPDF)က ယနေ့(စက်တင်ဘာ ၁၅ ရက်) ထုတ်ပြန်သည်။
လက်ရှိစစ်ကောင်စီစစ်ကြောင်းသည် ဝှါရီဆူးပလိုင်ရွာနှင့် မိုးဗြဲမြို့ကြား ရထားလမ်းတွင် ရောက်ရှိနေပြီး မိုးဗြဲမြို့အတွင်းသို့ လက်နက်ကြီးဖြင့် ရမ်းသမ်းပစ်ခတ်နေသည်ဟု ဆိုသည်။
ထို့ကြောင့် ဒေသခံပြည်သူများအနေဖြင့် လုံခြုံစိတ်ချရသောနေရာတွင် နေပေးရန်နှင့် ပြည်သူများအနေဖြင့် မိုးဗြဲလမ်းကို အသုံးမပြုသေးရန် MB PDFက တိုက်တွန်းသည်။
“စခ အင်အား ၁၀၀နီးပါးအပြင်တင့်ကား နှစ်စီး ပါလာတယ်။ပြီးခဲ့တဲ့ ရက်ပိုင်းကထက် တိုက်ပွဲပိုပြင်းထန် လာနိုင်တယ်လို့ သုံးသပ်ရမယ်”ဟု MBPDF တာဝန်ရှိသူက လူထုနွေဦးသို့ ပြောသည်။
Public Service Announcement
ယခုလ ၈ ရက်ကစ၍ အင်အား ၁၀၀ကျော်ပါ စစ်ကောင်စီတပ်သည် မိုးဗြဲမြို့တွင်တပ်စွဲရန် ကြိုးပမ်းလာခြင်းကြောင့် ကရင်နီပူးပေါင်းတပ်များက ခုခံတိုက်ခိုက်ခဲ့သည်။
ထို့နောက် နေ့စဥ်တိုက်ပွဲများပြင်းထန်ခဲ့ပြီး စက်တင်ဘာ ၁၂ ရက်တွင် စစ်ကောင်စီတပ်စွဲထားသည့်နေရာကို ကရင်နီပူးပေါင်းတပ် နယ်မြေရှင်းလင်းနိုင်ခဲ့သည်။
အဆိုပါ ၅ ရက်တာ တိုက်ပွဲ၌စစ်ကောင်စီတပ်ထံမှ MA1 – ၃ လက်၊ MA2 – ၃ လက်၊ MA3 – ၆ လက်၊ ငါးကြင်းမှီး – ၁ လက် အပါအဝင်လက်နက်ကြီးကျည်များအပါအဝင် ခဲယမ်းများသိမ်းဆည်းရရှိခဲ့သည်။
ထို့အပြင် စစ်ကောင်စီတပ်သား ၆၀ဦးထက်မနည်းသေဆုံးခဲ့ကာ အများအပြားဒဏ်ရာရရှိခဲ့ပြီး ကရင်နီပူးပေါင်းတပ်မှ ရဲဘော်နှစ်ဦး ကျဆုံးခဲ့သည်။
