လွိုင်ကော်မြို့နယ် တစ်လတာ တိုက်ပွဲများအတွင်း စစ်ကောင်စီတပ်သား ၁၅ ဦးထက်မနည်းသေဆုံးကြောင်း ကရင်နီအမျိုးသားများကာကွယ်ရေးတပ် (KNDF) တပ်ရင်း – ၂က ယနေ့(အောက်တိုဘာ ၁၇ ရက်) ထုတ်ပြန်သည်။
လွိုင်ကော်မြို့ကိုအခြေပြု၍ စက်တင်ဘာ ၁၇ရက်ကစ၍ ယခုလ ၁၅ရက်အထိ တိုက်ပွဲများအတွင်း စစ်ကောင်စီတပ်ကို ကရင်နီတပ်မတော် (KA)၊ KNDF ၊ ညီညွတ်သောရှမ်းတောင်ဖယ်ဒရယ်တပ်ပေါင်းစု (USSFU)နှင့် လွိုင်ကော် PDF တို့ပူးပေါင်းတိုက်ခိုက်ခဲ့သည်ဟု ဆိုသည်။
တိုက်ပွဲဖြစ်စဥ်များအရ စက်တင်ဘာ ၁၇ ရက်က မော်ချီးစု နှင့် ပဒါးညေးကျေးရွာသို့ စစ်ကြောင်းထိုးလာသော စစ်ကောင်စီတပ်နှင့် ကရင်နီတပ် ပေါင်းစု ထိတွေ့တိုက်ခိုက်မှု ဖြစ်ပွားခဲ့ပြီး စစ်ကောင်စီဘက်မှ သုံးဦးသေဆုံးကာ တပ်ပေါင်းစုမှ ရဲဘော်တစ်ဦးကျဆုံးခဲ့ကြောင်း ဖော်ပြသည်။
စက်တင်ဘာ ၂၆ ရက်တွင် စစ်ကောင်စီတပ်စွဲထားသော ကယန်းသာယာလမ်းခွဲတွင်တိုက်ပွဲဖြစ်ပွားခဲ့ပြီး စစ်ကောင်စီတပ်မှ နှစ်ဦးသေဆုံးပြီး ပူးပေါင်းတပ်မှ သုံးဦးဒဏ်ရာရရှိခဲ့သည်။
Public Service Announcement
ထို့နောက် ကယန်းသာယာလမ်းခွဲ၌ပင် စက်တင် ဘာ ၂၇ ရက်က Sniper mission ပြုလုပ်ခဲ့ရာစစ်ကောင်စီတပ်သား သုံးဦးသေဆုံးသည်ဟု ဆိုသည်။
ယခုလ ၃ရက်က မော်ချီးစုကျေးရွာအနီး တိုက်ပွဲတွင် လည်း စစ်ကောင်စီတပ်သား နှစ်ဦးသေဆုံးကြောင်း အသိပေးသည်။
နန်းကွတ်ရေစီးကွေ့အနီး အောက်တိုဘာ ၇ရက်က စစ်ကောင်စီကင်းလှည့်အဖွဲ့နှင့် ထိပ်တိုက်ထိတွေ့မှုတွင် စစ်ကောင်စီတပ်သားသုံးဦး သေဆုံးခဲ့ကြောင်းလည်း KNDF တပ်ရင်း -၂က ပြောသည်။
အောက်တိုဘာ ၉ ရက်က ပွန်ချောင်းရွာတွင် တပ်စွဲထားသော စစ်ကောင်စီစခန်းကို ကရင်နီတပ်ပေါင်းစုမှ သွားရောက်ပစ်ခတ်ရာ ထိခိုက်မှုမရှိခဲ့ပေ။
အလားတူ နွားလဝိုးနယ်မြေတွင်တပ်ဆွဲထားသော စစ်ကောင်စီတပ်နှင့် တပ်ပေါင်းစုတို့ ယခုလ ၁၄ ရက် က တိုက်ပွဲတွင် KNDF တပ်ရင်း -၂မှ ရဲဘော် သုံးဦးဒဏ်ရာရရှိခဲ့ပြီး နှစ်ဦးကျဆုံးခဲ့ရသည်။
ထိုတိုက်ပွဲတွင် စစ်ကောင်စီဘက်မှ အသေအဆုံးများရှိခဲ့သော်လည်း အတည်မပြုနိုင်သေးပေ။
အောက်တိုဘာ ၁၅ ရက်ကလည်း မိုးဗြဲမြို့ဘက်မှ ဝါရီကောခူဘက်သို့ စစ်ကြောင်းထိုးလာသော စစ်ကောင်စီတပ်နှင့် ကရင်နီတပ်ပေါင်းစုများထိတွေ့မှုများဖြစ်ပွားခဲ့ပြီး စစ်ကောင်စီတပ်သား လေးဦး သေဆုံးပြီး ဒဏ်ရာအများအပြားရရှိခဲ့ကြောင်း ဖော်ပြထားသည်။
“လွိုင်ကော်ကနေ စကစက နေ့တိုင်းလက် နက်ကြီးနဲ့ နေ့တိုင်း ပစ်နေတာ။လမ်းရှင်းနိုင်တာ ဖြစ် နိုင်သလို ရမ်းသမ်းထုတာလည်း ပါတယ်။ဒါပေမယ့် လွိုင်ကော်မှာ အရင်လပိုင်းတွေကထက် တိုက်ပွဲပိုစိတ် လာတယ်။မနေ့ကလည်း မိုးဗြဲ- လွိုင်ကော် အစပ်က ဆောင်ကန်းလမ်းခွဲ တိုက်ပွဲ မှာလည်း စစ်ကောင်စီတပ်က အထိနာခဲ့တယ်” ဟု ကရင်နီဒေသခံစစ်ရေးသတင်းရင်းမြစ်က လူထုနွေဦးသို့ ပြောသည်။
ကရင်နီဒေသအတွင်း နေ့စဥ်ထိတွေ့တိုက်ပွဲ များ ရှိနေပြီး အကြမ်းဖက်စစ်ကောင်စီက နယ်မြေစိုး မိုးရေးအသာစီးရယူရန် ပိုမိုကြိုးပမ်းလာနေ သည်ဟုလည်း ကရင်နီအခြေစိုက်တပ်ဖွဲ့များက ဆိုသည်။
