လစဉ် မြန်မာနိုင်ငံသား ၄ သောင်းနီးပါး နိုင်ငံကိုစွန့်ခွာနေကြ

စစ်တပ်အာဏာသိမ်းပြီးနောက် ဖြစ်ပေါ်လာတဲ့ ပဋိပက္ခတွေနဲ့ စီးပွားရေးကျပ်တည်းမှုတွေကြောင့် လစဉ် မြန်မာနိုင်ငံသား ၄ သောင်းခန့် နိုင်ငံကိုစွန့်ခွာနေကြတယ်လို့ ကုလသမဂ္ဂရဲ့ နိုင်ငံတကာရွှေ့ပြောင်းသူများဆိုင်ရာ အဖွဲ့အစည်း(IOM) က ဒီဇင်ဘာလ ၂၈ ရက်မှာထုတ်ပြန်ပါတယ်။

ပဋိပက္ခတွေဖြစ်ပွားနေတာ ၊စီးပွားရေးအကျပ်အတည်းကိုကြုံရတာအပြင်အခြားသောအကြောင်းအရာတွေကြောင့် နိုင်ငံကိုစွန့်ခွာနေကြတာဖြစ်ပြီးအများစုဟာထိုင်းနိုင်ငံကိုသွားရောက်ကြတယ်လို့ IOM က ဆိုထားပါတယ်။

ပြည်ပကို ထွက်ခွာကြသူတွေအပြင် ပြည်တွင်းမှာလည်း နေရာစွန့်ခွာ ထွက်ပြေးနေရသူတွေ များပြားလာတယ်လို့ IOM ကပြောပါတယ်။

စစ်တပ်အာဏာသိမ်းချိန်ကစပြီး ပြည်တွင်းမှာ နေရပ်စွန့်ခွာ တိမ်းရှောင်ရသူဦးရေဟာ ၁သန်းကျော်ရှိလာပြီလည်းဖြစ်ပါတယ်။

Public Service Announcement

ဒီစာရင်းထဲမှာ စစ်ကိုင်းတိုင်းတစ်ခုထဲကတင်လူဦးရေ ၆ သိန်းကျော် ပါဝင်တယ်လို့ IOM က ဖော်ပြပါတယ်။

လာမယ့် ၂၀၂၃ ခုနှစ်မှာလည်း မြန်မာနိုင်ငံမှာ ပညာရေးနဲ့ကျန်းမာရေးကဏ္ဍတွေ ဆက်ပြီး အခက်အခဲ ကြုံတွေ့ရဦးမှာဖြစ်ပြီး ကိုဗစ် ကုသမှုနဲ့ ကာကွယ်မှုတွေလည်း အခက်အခဲတွေရှိနေတဲ့အတွက် အန္တရာယ်ရှိနိုင်တဲ့ အခြေအနေတွေပိုများလာမယ်လို့ IOM က တွက်ဆထားပါတယ်။

ဒါအပြင် လာမယ့် ၂၀၂၃ မှာ စစ်တပ်က လုပ်မယ်ဆိုတဲ့ရွေးကောက်ပွဲကြောင့် ဒီနှစ်ထက်ပိုဆိုးမယ့်အခြေအနေတွေကြုံလာရနိုင်တယ်လို့ IOM က ပြောထားပါတယ်။