ယင်းမာပင်မြို့နယ် မြောက်နုံးကျေးရွာကို မီးရှို့ဖျက်ဆီးနေသည့်စစ်ကောင်စီတပ်အား ပြည်သူ့ကာကွယ်ရေးတပ်များက ပိတ်ဆို့တိုက်ခိုက်ခဲ့ကြရာ စစ်ကောင်စီဘက်က သေဆုံးထိခိုက်မှုများကြောင်း ပြည်သူ့ကာကွယ်ရေးအဖွဲ့များကပြောသည်။
“ညကမီးရှို့တဲ့စစ်ကောင်စီကိုပြောက်ကျားအဖွဲ့နဲ့ဝင်လုံးတာ။စစ်ကောင်စီ အထိအခိုက်ရှိတယ်။ အလောင်းက အတည်မပြုနိုင်သေးတာ။ စစ်ကောင်စီက မီးရှို့သွားလို့ ရွာကတော့ အကုန်ကုန်သွားတယ်”ဟု ယင်းမာပင်မြို့အခြေစိုက် မြောက်ယမားပြည်သူ့ကာကွယ်ရေးတပ်ဖွဲ့ပြန်ကြားရေးတာဝန်ခံကပြောသည်။
ယင်းမာပင်မြို့နယ်တွင် ပြည်သူ့ကာကွယ်ရေးတပ်ဖွဲ့များနှင့် စစ်ကောင်စီတပ်သည် ဖေဖော်ဝါရီလကုန်ပိုင်းကတည်းက တိုက်ပွဲဖြစ်နေခြင်းဖြစ်သည်။ မြောက်နုံးရွာနှင့် ကျွဲကြားရွာအနီးတွင် တစ်ကြိမ်၊ မြောက်နုံးရွာထိပ်တွင် တစ်ကြိမ် တိုက်ပွဲဖြစ်ပြီးမတ်လ ၃ရက် ညနေဘက်တွင် စစ်ကောင်စီတပ်က မြောက်နုံးရွာထဲသို့ ဝင်ပြီး မီးရှို့ဖျက်ဆီးခဲ့ခြင်းဖြစ်ကြောင်း သိရသည်။
“ကျွန်တော်တို့တောက်လျှောက်လိုက်တိုက်နေတာ။ ညကလည်း တော်တော်လေး တိုက်ကြတယ်။ ကျွန်တာ်တို့ဘက်မှာ ပြင်းထန်ဒဏ်ရာမရှိပါဘူး။ ပွန်းတာပဲ့တာတော့ရှိပါတယ်။ စစ်တပ်ဖက်ကတော့ အကျအဆုံးရှိပါတယ်” ဟု ပြည်သူ့ကာကွယ်ရေးရဲဘော်တစ်ဦးကပြောသည်။
Public Service Announcement
လတ်တလောတွင် မြောက်နုန်းရွာဒေသခံများအတွက် အဝတ်အထည်နှင့် စားနပ်ရိက္ခာ အကူအညီများလိုအပ်နေသည်ဟု မြောက်ယမားပြည်သူ့ကာကွယ်ရေးတပ်ဖွဲ့က ပြောသည်။
စစ်ကိုင်းတိုင်းကို စစ်ကောင်စီက ယခုရက်ပိုင်းအတွင်းဆက်တိုက်စစ်ကြောင်းထိုးနေပြီး တိုက်ပွဲများလည်းပိုမိုပြင်းထန်နေသည်။
မတ်လ ၁ရက်ကလည်း ယင်းမာပင်မြို့၊ဇီးတောကျေးရွာအနီးတွင် တိုက်ပွဲဖြစ်ပွားခဲ့ရာ စစ်ကောင်စီတပ်ဖက်က အမျိုးသမီးတပ်ဖွဲ့ဝင်အချို့အပါအဝင် ဆယ်ဦးထက်မနည်း သေဆုံးပြီး လေကြောင်းမှ လာရောက်တိုက်ခိုက်ခဲ့ကြောင်း ပြည်သူ့ကာကွယ်ရေးရဲဘော်များကပြောသည်။ စစ်ကောင်စီတပ်သည် အထိနာသည့်နာသည့် လေကြောင်းစစ်ကူခေါ်၍ပြန်လည်ခုခံနေခြင်းဖြစ်သည်။
ထိုအပြင်ဖေဖော်ဝါရီလ ၂၈ ရက်ကလည်း ယင်းမာပင်မြို့နယ် ကုန်းရွာကို စစ်ကောင်စီတပ်က ရွာလုံးကျွတ်မီးရှို့ဖျက်ဆီးခဲ့ပြီး အရပ်သား သုံးဦးကိုသတ်ဖြတ်သွားကြောင်း ဒေသခံများကပြောသည်။ မြောက်နုံးကျေးရွာတွင်လည်း အရပ်သားနှစ်ဦးကို စစ်ကောင်စီကသတ်ဖြတ်သွားကြောင်း သတင်းများထွက်ပေါ်နေသော်လည်း သီးခြားအတည်ပြုချက်မရရှိသေးပေ။
