ကမ္ဘာ့ကုလသမဂ္ဂအဖွဲ့ဝင်နိုင်ငံနှင့် အခြားသော နိုင်ငံတကာအသိုင်းအဝိုင်းများအနေဖြင့် စစ်ကောင်စီ၏ လူသားမဆန်သည့် လုပ်ရပ်များကို လျစ်လျူမရှုဘဲ မြန်မာပြည်သူလူထုလိုလားသည့် လူမှုဘ၀လုံခြုံမှု၊ စိတ်ပိုင်းဆိုင်ရာ လုံခြုံမှုများအမြန်ဆုံးပိုင်ဆိုင်နိုင်ရေး တက်ကြွစွာပါဝင်ဆောင်ရွက်ပေးရန် ကျောက်ကြီးမြို့နယ် ကရင်အရေးပေါ် ကူညီကယ်ဆယ်ရေးကော်မတီက ထုတ်ပြန်လိုက်သည်။
စစ်တပ်အာဏာသိမ်းပြီးနောက် ကျောက်ကြီးမြို့နယ်အတွင်း စစ်ကောင်စီတပ်၏ လူမဆန်စွာ လူ့အခွင့်အရေးချိုးဖောက်မှုများနှင့်ပတ်သက်ပြီး ကျောက်ကြီးမြို့နယ် ကရင်အရေးပေါ် ကူညီကယ်ဆယ်ရေးကော်မတီက ယခုကဲ့သို့ သဘောထား ထုတ်ပြန်လိုက်ခြင်းဖြစ်သည်။
မေလ ၁၀ရက်က စစ်ကောင်စီ၏ တပ်မ(၄၄)နှင့် ခလရ(၈၄) တပ်များက ညောင်လေးပင်ခရိုင် မုန်းမြို့နယ်အတွင်းရှိ ကလေးငယ်များအပါအဝင် ကျေးရွာသူ၊ ကျေးရွာသား ၁၉ဦးအား အစု လိုက်၊ အပြုံလိုက် မီးရှို့သတ်ဖြတ်ခဲ့မှုကို ကော်မတီအနေဖြင့် လုံး၀လက်သင့်မခံနိုင်ဘဲ များစွာ ဝမ်းနည်း ယူကြုံးမရဖြစ်ရကြောင်းဖော်ပြသည်။
လူ့အခွင့်အရေးတွင် ပါဝင်လှုပ်ရှားသည့် ပြည်တွင်း၊ ပြည်ပအဖွဲ့အစည်းများမှ စစ်ကောင်စီ၏ ထင်ထင်ပေါ်ပေါ်လူသားမဆန်စွာ လူ့အခွင့်အရေးချိုးဖောက်နေမှုများ ရပ်တန့်ရန်နှင့် စစ်တန်းလျားသို့ ပြန်ပြီး ပြည်သူလူထုကို အနှောက်အယှက်မပေးနိုင်ရေး ဘက်ပေါင်းစုံမှ တက်ကြွစွာ ပါဝင်ဆောင်ရွက်ပေးရန် တိုက်တွန်းကြောင်း ကျောက်ကြီးမြို့နယ် ကရင်အရေးပေါ် ကူညီကယ်ဆယ်ရေးကော်မတီက ထုတ်ပြန်ခဲ့သည်။
Public Service Announcement
စစ်ကောင်စီတပ်သည် ကျေးရွာများအတွင်းသို့ လူသားမဆန်စွာ လက်နက်ကြီးငယ်များ ပစ်ခတ်ခြင်း၊ လူနေအိမ်များကို မီးရှို့ဖျက်ဆီးခြင်း၊ ပြည်သူပိုင် ပစ္စည်းများကို ခိုးယူခြင်း၊ စာသင်ကျောင်းများ ၊ ဘာသာရေး အဆောက်အအုံများသို့ လက်နက်ကြီးပစ်ခတ်ခြင်း၊ အပစ်မဲ ပြည်သူများအား ဖမ်းဆီးခြင်း၊ ချုပ်နှောင်ခြင်းများ ဆက်တိုက်ပြုလုပ်နေကြောင်း ဖော်ပြထားသည်။
ကရင်ပြည်သူလူထုများမှ ခေတ်အဆက်ဆက်သော စစ်အစိုးရများမှ ကျင့်သုံးခဲ့သည့် မဟာလူမျိုးကြီးဝါဒနှင့် စစ်အာဏာရှင်စနစ်ကို ယနေ့အထိ ခံစားနေရပြီး မွေးရာပါ အခွင့်အရေးကိုလည်း ယနေ့အထိ ဆုံးရှုံးနေရကြောင်း၊ လက်ရှိ စစ်ကောင်စီတပ်မှ ရက်စက်ကြမ်းကြုတ်စွာ ကျူးလွန်ထားသည့် လူသားမဆန်သည့် လုပ်ရပ်များအား ရှုတ်ချကြောင်း၊ ပြည်သူလူထုများ ရသင့်ရထိုက်သည့် အခွင့်အရေးများ ရရှိခံစားနိုင်ရန် ဆက်လက် လုပ်ဆောင်သွားမည်ဖြစ်ကြောင်း ကျောက်ကြီးမြို့နယ် ကရင်အရေးပေါ် ကူညီကယ်ဆယ်ရေးကော်မတီက ထုတ်ပြန်သည်။
ထို့အပြင် စစ်ကောင်စီတပ်က ပြည်သူများအား ရန်သူသဖွယ်အဓိက ပစ်မှတ်ထား ဖမ်းဆီးနှိပ်စက် တိုက်ခိုက်သတ်ဖြတ်နေမှုအပေါ် မုန်းမြို့နယ် ကရင်အရေးပေါ်ကယ်ဆယ်ရေးကော်မတီကလည်း သဘောထား ထုတ်ပြန်ခဲ့ရာ ညောင်ပင်သာရွာ ပြည်သူများအား ရက်စက်စွာ မီးရှို့သတ်ဖြတ်ခဲ့သည့် လုပ်ရပ်အပေါ် ပြင်းထန်စွာ ဆန့်ကျင်ရှုတ်ချကြောင်း ဖော်ပြခဲ့သည်။
နိုင်ငံတကာအစိုးများ၊ လူ့အခွင့်အရေးအဖွဲ့အစည်းများအနေဖြင့် အာဏာသိမ်းစစ်ကောင်စီတပ်မှ ပြည်သူများအပေါ် ပစ်မှတ်ထား တိုက်ခိုက်နေခြင်းအား ထိရောက်စွာ အရေးယူဆောင်ရွက်ပေးရန်လည်း တိုက်တွန်းတောင်းဆိုခဲ့သည်။ ထို့ပြင် ထိခိုက်နစ်နာသည့် ပြည်သူများအား လူသားချင်းဆိုင်ရာ စာနာထောက်ထားမှု အကူအညီများနှင့် လူမှုဘ၀ လုံခြုံမှုများ ရရှိရေး ကူညီပေးရန် တောင်းဆိုခဲ့သည်။
