မကွေးတိုင်း စေတုတ္တရာမြို့နယ်တွင် စစ်ကောင်စီတပ်စစ်ကြောင်းနှင့် စစ်ဆေးရေးဂိတ်တစ်ခုကို တစ်ရက်တည်းတွင် နှစ်ဖွဲ့ခွဲ၍ သွားရောက်တိုက်ခိုက်ခဲ့ကြောင်း လူထုတော်လှန်ရေးမဟာမိတ်အင်အားစု PRA Magway မှ တာဝန်ရှိသူတစ်ဦးက ပြောသည်။
မေ ၂၃ ရက်က စေတုတ္တရာနယ် မဏ္ဍိပ်ကိုင်ကျေးရွာအနီးသို့ရောက်ရှိလာသော စစ်ကောင်စီတပ်စစ် ကြောင်းကို PRA-Magway နှင့် Z-Fighter အဖွဲ့တို့ပူးပေါင်းပြီး ယင်းနေ့နံနက် ၁၁ နာရီတွင် တိုက်ခိုက်ခဲ့ခြင်းဖြစ်သည်ဟု ပြောသည်။
“အင်အားကတော့ဆိုင်ကယ် ၁၂ စီးနဲ့ ၂၄ ယောက်ပါပါတယ်။ ဆိုင်ကယ်တွေက ခွဲပြီးတော့ လာတော့ ပထမဆုံးမိုင်းကွင်းထဲဝင်လာတဲ့ ဆိုင်ကယ် ၃ စီးကို မိုင်းဆွဲတိုက်ခိုက်ပြီး ၁၅ မိနစ်လောက် အပြန်အလှန် ပစ်ခတ်မှု ဖြစ်ပွားခဲ့ပါတယ်”ဟု PRA-Magway မှ တာဝန်ရှိသူတစ်ဦးက People’s Spring သို့ ပြော သည်။
ထို့နောက် ကျသွားသည့် ရန်သူ့ထံမှ လက်နက်သွားကောက်စဉ် နောက်မှာကျန်နေသော ရန်သူ့တပ်များရောက်လာပြီး ၄၀ မမ အပါအဝင် လက်နက်ငယ်များဖြင့် ပြန်လည်ပစ်ခတ်ရာလက်နက်အင်အားမမျှသဖြင့်ပူးပေါင်းတပ်များပြန်လည်ဆုတ်ခွာခဲ့ရပြီး တော် လှန်ရေးရဲဘော်တစ်ဦးကျဆုံးခဲ့သည်ဟု ၎င်းက ရှင်းပြသည်။
Public Service Announcement
အဆိုပါတိုက်ခိုက်မှုတွင် စစ်ကောင်စီတပ်မှ ၃ ဦးသေ၊ ၄ ဦးဒဏ်ရာရသွားကာ ရန်သူ့ထံမှ သေနတ်တစ်လက် သိမ်းဆည်းရရှိခဲ့ကြောင်း PRA-Magway က အသိပေးသည်။
အလားတူ ယင်းနေ့(မေ ၂၃)၌ပင် စေတုတ္တရာနယ် ကျွန်းတောလမ်းထိပ်ရှိ စစ်တပ်စစ်ဆေးရေးဂိတ်ကို မင်းဘူးခရိုင် တပ်ရင်း ၁ PDF စလင်းမှ ရဲဘော်များက အဝေးပစ်ဒုံးများဖြင့် သွားရောက်ပစ်ခတ်တိုက် ခိုက်ခဲ့ရာ စစ်ကောင်စီတပ်မှ ၂ ဦးသေဆုံးသွားသည်ဟု ဆိုသည်။
အထက်ပါစစ်ဆင်ရေးများကို မဟာမိတ်တပ်ဖွဲ့များညှိနှိုင်းပြီး ဧရာဝတီမြစ်အနောက်ဘက်ခြမ်းဒေသလွတ်မြောက်ရေးအတွက် မဟာဗျူဟာမြောက် တပြိုင်နက်တိုက်ခိုက်ခဲ့ခြင်းဖြစ်ကြောင်း PRA-Magway က အသိပေးထားသည်။
