ရှမ်းပြည်မြောက်ပိုင်းမှာ တိုက်ပွဲဖြစ်ပွားနေချိန်မှာ တရုတ်နယ်စပ်အနီးက ကိုးကန့်ဒေသ လောက်ကိုင်မြို့မှာ ထိုင်းနိုင်ငံသား ၁၆၂ ဦးပိတ်မိနေတယ်လို့ ထိုင်းသတင်းဌာန Thai PBS က ဒီနေ့ မှာဖော်ပြပါတယ်။
လောက်ကိုင်မှာ ပိတ်မိနေတဲ့ ထိုင်းနိုင်ငံသားတွေကို ကယ်ထုတ်ဖို့ ရန်ကုန်မြို့မှာရှိတဲ့ ထိုင်းသံရုံးဟာစစ်ကောင်စီနဲ့ ညှိနှိုင်းနေတယ်လို့ဆိုပါတယ်။
ပိတ်မိနေတဲ့နိုင်ငံသားတွေရဲ့ အခြေအနေကို လည်း ထိုင်းဝန်ကြီးချုပ်ထံ တင်ပြထားတယ်လို့ထိုင်းအစိုးရအဖွဲ့ ပြောရေးဆိုခွင့်ရှိသူရဲ့ပြောကြားချက်ကို THAI PBS က ဖော်ပြပါတယ်။
စစ်ကောင်စီဘက်ကတော့ လောက်ကိုင်မှာ ပိတ်မိနေတဲ့ နိုင်ငံခြားသားတွေရဲ့အခြေအနေကို ထုတ်ပြန်တာမျိုးမရှိပါဘူး။
တရုတ် − မြန်မာ နယ်စပ် လောက်ကိုင်မြို့ဟာ လောင်းကစားဝိုင်းတွေကြောင့် နာမည်ကျော်ပြီး နိုင်ငံခြားသားတွေလည်း လာရောက်လုပ်ကိုင်ကြတာရှိပါတယ်။
Public Service Announcement
ပြီးခဲ့တဲ့ အောက်တိုဘာလတတိယပတ်အတွင်းမှာတော့ လောက်ကိုင်မြို့က အွန်လိုင်းငွေလိမ်ဂိုဏ်းတွေမှာ လူကုန်ကူးခံရတဲ့ ထိုင်းနိုင်ငံသား ၁၂၀ ကျော်ကို ပြန်ခေါ်ထုတ်ဖို့ ပြင်ဆင်နေတဲ့အကြောင်းထိုင်းအစိုးရဘက်က ပြောဆိုထားပါတယ်။
စစ်ကောင်စီတပ်နဲ့ ကိုးကန့်ပြည်သူ့စစ်တို့ထိန်းချုပ်ထားတဲ့ လောက်ကိုင်မြို့ဆီတိုက်ပွဲတွေရောက်မလာသေးပေမယ့် လောက်ကိုင်မြို့အဝင် ချင်းရွှေဟော်မြို့ကို ကိုးကန့်တပ်(MNDAA) က ပြီးခဲ့တဲ့ရက်ပိုင်းက သိမ်းယူထားပါတယ်။
