ဟန်နွေ/People’s Spring
ကရင်အမျိုးသားအစည်းအရုံး(KNU) ညောင်လေးပင်ခရိုင်အတွင်း ရေကြီးရေလျှံမှုကြောင့် ပျက်စီးခဲ့ရသည့် လယ်ယာများတွင် ပြန်လည်စိုက်ပျိုးမည့် လယ်သမားများအား ခရိုင် လယ်ယာစိုက်ပျိုးရေးဌာမှမျိုးစပါးများ ပေးအပ် ခဲ့ကြောင်း KNU ဗဟိုက သတင်းထုတ်ပြန်သည်။
နိုင်ငံတဝန်းရေကြီးမှုကြုံရသည့်နည်းတူ KNU ညောင်လေးပင်ခရိုင်တွင်လည်း ရေးဘေးကြုံခဲ့ရသည်။ ဇူလိုင်လလယ်မှစ၍ ပထမအကြိမ်ရေကြီးမှုကြောင့် ခရိုင်းအတွင်း ကျေးရွာ ၂၆၀ကျော် ရေလွှမ်းမိုးခံရပြီး လယ်သမား ၄ထောင်ကျော်၏ လယ်များ ပျက်စီးခဲ့သည်ဟု ဆိုသည်။ လယ်ဧက ၃၉,၀၀၀ ကျော်ရှိရာ ထက်ဝက်ကျော် ဖြစ်သည့် ဧက ၂သောင်းကျော်ပျက်စီးခဲ့ဟု အသိပေးထားသည်။
ပျက်စီးသွားသောလယ်ယားများအား ပြန်လည်စိုက်ပျိုးမည့် လယ်သမားများကို ခရိုင် လယ်ယာစိုက်ပျိုးရေးဌာနကစာရင်းပြုစုခဲ့ရာ ဧက ၄၀၀ ကျော်ရှိပြီး ယင်းအတွက်မျိုးစပါး တင်း ၁,၂၀၀ ကျော်နှင့် စက်သုံးဆီ ဂါလံ ၈၀၀ကျော်လိုအပ်နေ၍ စက်တင်ဘာ ၁၉ရက်မှစပြီး လယ်သမားများအား မျိုးစပါးများစတင်ပေးအပ်ခဲ့သည်ဟုဆိုသည်။
Public Service Announcement
စက်တင်ဘာ ၁၀ရက်မှစသည့် ဒုတိယအကြိမ်ရေဘေးတွင်လည်း ပထမအကြိမ်ထက်လယ်စပါး စိုက်ခင်းပျက်စီးမှု ပိုခဲ့၍ ပျက်စီးသည့် လယ်ဧကများကို စာရင်းပြုစုလျက်ရှိကြောင်း အသိပေးသည်။
တစ်ဖက်တွင်လည်း KNU ညောင်လေးပင်ခရိုင် မုန်း(မူး)မြို့နယ် ကရင်အရေးပေါ် ကူညီကယ်ဆယ်ရေးကော်မတီက စက်တင်ဘာ ၂၀ရက် က သဘောထား ထုတ်ပြန်ခဲ့ရာ ရေးဘေးကြုံနေရသည့်ကျေးရွာများအား အရပ်ဖက်ကူညီရေးအဖွဲ့များက လာရောက် ကူညီမှုကို စစ်ကောင်စီက တားဆီးခြင်း၊ ခြိမ်းခြောက်ခြင်း ပစ္စည်းများ သိမ်းယူဖမ်းဆီးခြင်းများ ပြုလုပ်လျက်ရှိပြီး ယင်းလုပ်ရပ်အပေါ် ပြင်းထန်စွာ ရှုတ်ချကြောင်း ဖော်ပြသည်။ မည်သည့်ဒေသ၌ ဖြစ်ပွားခဲ့သည့် ဆိုသော အသေးစိတ် ဖြစ်စဉ်များကိုထုတ်ပြန်ချက်၌ ဖော်ပြမထား၍ အသေးစိတ် အချက်အလက်များ မေးမြန်းရန် အဆိုပါ ကော်မတီသို့ဆက်သွယ်ထားဆဲဖြစ်သည်။
ကော်မတီ၏ထုတ်ပြန်ချက်တွင် ရေးဘေးကြုံနေရ၍ ဒေသခံများလူသားချင်းစာနာမှု ဆိုင်ရာ အကူအညီများစွာ အရေးတကြီးလိုအပ်နေချိန်ဖြစ်၍ ပြည်တွင်းပြည်ပရှိသက်ဆိုင်ရာ လူမှုအကျိုးပြု အဖွဲ့များ၏ အကူအညီများပံ့ပိုးရန် တောင်းဆိုကြောင်း ဖော်ပြထားသည်။
မုန်းမြို့နယ် ကရင်အရေးပေါ် ကယ်ဆယ်ရေးကော်မတီသည် အာဏာရှင်စနစ်ကို ကျင့်သုံးသောမည်သည့်အဖွဲ့အစည်းမဆိုလက်ခံမည်မဟုတ်ဘဲ ပြည်သူနှင့်အတူ ယှဉ်တွဲ၍ အမှန်တရားဘက် အမြဲရပ်တည်သွားမည်ဟုလည်း သဘောထား ထုတ်ပြန်ခဲ့သည်။
