ဇေအောင်/People’s Spring
မန္တလေးတိုင်း၊ မတ္တရာမြို့နယ်၊ ဝေါစုကျေးရွာဘုန်းကြီးကျောင်းအား စစ်ကောင်စီက လေကြောင်းမှဗုံးကြဲတိုက်ခိုက်ရာ သံဃာတော်သုံးပါးအပါအဝင် ၁၂ ဦးသေဆုံးခဲ့ကြောင်း ဒေသခံများက ပြောသည်။
ယနေ့(အောက်တိုဘာ ၁၁ရက်) နေ့လယ် ၁နာရီခန့်က ဝေါစုကျေးရွာရှိ အောင်မင်္ဂလာသုခ ကျောင်းတိုက်ကို စစ်ကောင်စီက လေကြောင်းမှ ဗုံးသီးကြဲချတိုက်ခိုက်ခဲ့ရာ ကျောင်းရှိသံဃာတော် သုံးပါး ပျံလွန်တော်မူခဲ့ပြီး ကျောင်းသို့လာရောက် စစ်ရှောင်နေသည့် ပြည်သူ ၉ ဦးလည်း သေဆုံးခဲ့ကြောင်း ဒေသခံများက ပြောသည်။
“ပေါင်နှစ်ရာ ဗုံးသီးတစ်လုံးချတယ်။ ပြည်သူ ၉ ဦး၊ ဘုန်းကြီး ၃ ပါး၊ စုစုပေါင်း ၁၂ ဦး သေဆုံးတယ်။ အထိအခိုက်လည်းများတယ်။”ဟု Wetlet Informational Network အဖွဲ့ဝင်တစ်ဦးက ပြောသည်။
Public Service Announcement
သေဆုံးသူပြည်သူများတွင် ကလေးငယ်တစ်ဦးပါဝင်ပြီး ပြည်သူ ၃၀ဦးထက်မနည်း ထိခိုက်ဒဏ်ရာရရှိခဲ့ကြောင်း ဒေသခံများက ပြောသည်။
သေဆုံးသည့်ပြည်သူများ၏ အသေးစိတ်အချက်အလက်များ မသိရသေးပေ။
လက်ရှိတွင် မတ္တရာမြို့နယ်အရှေ့ခြမ်း၌ စစ်ကောင်စီတပ်နှင့်ကာကွယ်ရေးပူးပေါင်းတပ်များ တိုက်ပွဲများဖြစ်ပွားနေသည်။
ပြီးခဲ့သည့် စက်တင်ဘာ ၂၁ရက်ကလည်း မတ္တရာအနောက်ခြမ်း၌ တိုက်ပွဲဖြစ်ပွားပြီး PDF စခန်းယာယီဆုတ်ခွာခဲ့ရသည်။ ထိုနေ့က မတ္တရာမြို့နယ် သုံးဆယ်ပေးကျေးရွာအနီးကို စစ်တပ်က လက်နက်ကြီးဖြင့် ပစ်ခတ်ခဲ့ရာကလေးသူငယ်များအပါအဝင် ပြည်သူ ၆ ဦးသေဆုံးခဲ့သည်။
မေလမှ ဇူလိုင်လကုန်အထိ မတ္တရာမြို့နယ် အတွင်း စစ်ကောင်စီတပ်စခန်း ၃၅ ခုအား ပြည်သူ့ကာကွယ်ရေးတပ်မတော်(မန္တလေး)က သိမ်းပိုက်ရရှိထားသည်။
