အင်ကြင်း/People’s Spring
မန္တလေးတိုင်း၊ မတ္တရာမြို့နယ်အနောက်ခြမ်း၌ စစ်ကောင်စီက လေကြောင်းမှ ထပ်မံ တိုက်ခိုက်နေ၍ ကျေးရွာ ၅ ရွာထက်မနည်းမှ ဒေသခံထောင်ချီ ထွက်ပြေးတိမ်းရှောင်နေရကြောင်း သတင်းရရှိသည်။
မတ္တရာမြို့နယ်တွင် စစ်ကောင်စီက ပြည်သူ ၁၂ဦးသေဆုံးသည်အထိ လေကြောင်းတိုက်ခိုက်ခဲ့ပြီးနောက် ယနေ့(အောက်တိုဘာ ၁၂ရက်) နံနက် ၉ နာရီခန့်ကလည်း မတ္တရာမြို့နယ်မြောက်ခြမ်း၊ ရေချောင်းပိုကျေးရွာ၏တောင်ဘက်သို့ စစ်ကောင်စီတပ်က MI-35 နှစ်စီးဖြင့် လေကြောင်းမှ ထပ်မံတိုက်ခိုက်ခဲ့ကြောင်း ဒေသခံများက ပြောသည်။
Public Service Announcement
“ဗုံးလည်းကြဲ စက်သေနက်နဲ့ပါ ပစ်တယ်။အထိအခိုက်မရှိဘူး ပြောတယ်။”ဟု ဒေသခံတစ်ဦးက ပြောသည်။
ယမန်နေ့ ညနေ ၆နာရီခွဲခန့်ကလည်း စစ်ကောင်စီက ဂျက်ဖိုက်တာနှစ်စီးဖြင့် မတ္တရာမြို့နယ်၊ တုံကုန်းကျေးရွာအား ဗုံးကြဲတိုက်ခိုက်ခဲ့ပြီး လူထိခိုက်မှုမရှိကြောင်း သိရသည်။
စစ်ကောင်စီ၏ လေကြောင်းတိုက်ခိုက်မှုများကြောင့် မတ္တရာမြို့နယ်အနောက်ခြမ်းရှိ ကျေးရွာ ၅ ရွာထက်မနည်းမှ ဒေသခံပြည်သူထောင်ချီထွက်ပြေးတိမ်းရှောင်နေရကြောင်း Wetlet Informational Network အဖွဲ့၏ တာဝန်ရှိသူက ပြောသည်။
ယမန်နေ့က ဝေါစုကျေးရွာရှိ စစ်ရှောင်စခန်းလေကြောင်းတိုက်ခိုက်မှုတွင် သံဃာတော် သုံးပါးနှင့် ကလေးသူငယ်များအပါအဝင် စစ်ရှောင်ပြည်သူ၁၂ဦးသေဆုံးခဲ့ရပြီး ၃၀ထက်မနည်း ထိခိုက်ဒဏ်ရာရရှိခဲ့ကြောင်း ဒေသခံများက ပြောသည်။
စစ်ရှောင်စခန်း လေကြောင်းတိုက်ခိုက်မှုသည် စစ်ဆင်ရေးနှင့်လုံးဝမသက်ဆိုင်သော လုပ်ရပ်တစ်ခုဖြစ်ပြီး ဂုဏ်သိက္ခာအကင်းမဲ့ဆုံးသော စစ်ရာဇဝတ်မှုကို ပြောင်ပြောင်တင်းတင်း ကျူးလွန်နေခြင်းပင်ဖြစ်ကြောင်း မန္တလေး PDFက ထုတ်ပြန်ထားသည်။
ပြီးခဲ့သည့် စက်တင်ဘာ ၂၁ရက်က မတ္တရာအနောက်ခြမ်း သုံးဆယ်ပေးရွာအနီး တိုက်ပွဲဖြစ်ပွားပြီး PDF စခန်းအချို့ ယာယီဆုတ်ခွာခဲ့ရသည်။ အဆိုပါတိုက်ပွဲအတွင်း သုံးဆယ်ပေးကျေးရွာအနီးကို စစ်ကောင်စီတပ်က လက်နက်ကြီးဖြင့် ပစ်ခတ်ခဲ့ရာ ကလေးသူငယ်များအပါအဝင် ပြည်သူ ၆ ဦးသေဆုံးခဲ့သည်။
လက်ရှိတွင် မတ္တရာမြို့နယ်အရှေ့ခြမ်း၌လည်း စစ်ကောင်စီတပ်နှင့်ကာကွယ်ရေးပူးပေါင်းတပ်များ တိုက်ပွဲများဖြစ်ပွားနေသည်။
မေလမှ ဇူလိုင်လကုန်အထိ မတ္တရာမြို့နယ်အတွင်းရှိ စစ်ကောင်စီတပ်စခန်း ၃၅ ခုအား ပြည်သူ့ကာကွယ်ရေးတပ်မတော်(မန္တလေး)က သိမ်းပိုက်ရရှိထားသည်။
