သက်ဝေ/People’s Spring
လားရှိုးမြို့ မန်ဆူဘုရားအနီး စစ်ကောင်စီ လေကြောင်း တိုက်ခိုက်ခဲ့ရာ အရပ်သား ၃ဦး ဒဏ်ရာရခဲ့ကြောင်း ကိုးကန့်တပ်မတော် (MNDAA)က သတင်းထုတ်ပြန်သည်။
လောက်ကိုင်မြို့နှင့် ကွမ်းလုံမြို့နယ် နမ့်ဟူးကျေးရွာကို စစ်ကောင်စီက လေကြောင်းဗုံးကြဲတိုက်ခိုက်ခဲ့ပြီးနောက် အောက်တိုဘာ ၂၂ရက် ယနေ့နံနက်စောတွင် စစ်ကောင်စီက လားရှိုးမြို့မန်ဆူဘုရားအနီးရှိ ရပ်ကွက် (၁၂)ကို ဗုံးကြဲတိုက်ခိုက်ခဲ့သည်ဟု ဖော်ပြသည်။
Public Service Announcement
အဆိုပါ ဗုံးကြဲတိုက်ခိုက်မှုကြောင့် အရပ်သား သုံးဦး ဒဏ်ရာရရှိခဲ့ပြီးရှာဖွေကယ်ဆယ်ရေး ဝန်ထမ်းများက ဆေးရုံသို့ ပို့ဆောင်ကုသခဲ့သည်ဟု အသိပေးသည်။
ထို့အပြင် ပေါက်ကွဲမှုဖြစ်ပွားရာနေရာနှင့် အနီးတစ်ဝိုက်ရှိ လူနေအိမ်အများအပြားလည်း ပြင်းထန်စွာ ပျက်စီးခဲ့သည်ဟု MNDAAက ထုတ်ပြန်သည်။
မင်းအောင်လှိုင်ဦးဆောင်သည့် စစ်ကောင်စီတပ်သည် MNDAA၏ အထူးဒေသ(၁) လောက်ကိုင်မြို့ ၊ သိန္နီခရိုင်နှင့် လားရှိုးမြို့စသောဒေသသို့ ပစ်မှတ်ထားဗုံးကြဲတိုက်ခိုက်မှု များ ဆက်တိုက်ပြုလုပ်လျက်ရှိရာ သုံးလကျော်အတွင်း အရပ်သားထိခိုက်ဒဏ်ရာရရှိသူနှင့်သေဆုံးသူ ၁၀၀ ကျော်ရှိခဲ့ကြောင်း ဖော်ပြသည်။
သေဆုံးသူ အရေအတွက်နှင့် ထိခိုက်သူ အရေအတွက်ကို ခွဲခြား ဖော်ပြထားခြင်းမရှိပေ။
စစ်ကောင်စီတပ်သည် အရပ်သားများ နေထိုင်ရာ ဒေသများ၊ ဈေးများနှင့် အခြေခံ အသက်မွေးဝမ်းကျောင်း အဆောက်အအုံများ ဖြစ်သည့် ကျောင်း၊ ဆေးရုံ၊ လျှပ်စစ်ဓာတ်အားပေး စက်ရုံသို့ ဗုံးကြဲတိုက်ခိုက်ခဲ့ခြင်းဖြစ်၍ ဒေသခံ ပြည်သူများ၏ အသက်အိုးအိမ် စည်းစိမ်ကို ထိခိုက်စေခဲ့ပြီး ဒေသခံများ ကြောက်ရွံ့ထိတ်လန့်နေကြရသည်ဟု ထုတ်ပြန်သည်။
စစ်ကောင်စီတပ်သည် ယခုရက်ပိုင်းအတွင်း ကိုးကန့်တပ်၊ တအာင်းတပ်(TNLA)၊ ကချင်တပ်(KIA) စသည့် စစ်ကောင်စီကို အထိနာအောင် တိုက်ခိုက် ထားသည့် တိုင်းရင်းသားလက်နက်ကိုင်တပ်ဖွဲ့များ၏ နယ်မြေများအတွင်း လေကြောင်းဗုံးကြဲတိုက်ခိုက်မှုများ ဆက်တိုက်ပြုလုပ်နေခြင်းဖြစ်ပြီး ပစ်မှတ်အများစုသည် အရပ်သား နေထိုင်ရာ နေရာများဖြစ်ကာ အရပ်သားသေဆုံးထိခိုက်မှုများရှိခဲ့သည်ဟု ဒေသခံတို့က အသိပေးထားသည်။
