လုယက်မှုများကြောင့် ရွှေဆိုင်များလုံခြုံရေးတိုးမြှင့်ထားရန် ရွှေလုပ်ငန်းရှင်များအသင်း သတိပေး

ရဲခေါင်/People’s Spring

လုယက်မှုများကြောင့် ရွှေဆိုင်များ လုံခြုံရေးတိုးမြှင့်ထားရန် ရွှေလုပ်ငန်းရှင်များအသင်းက သတိပေး ထုတ်ပြန်သည်။

ရွှေဆိုင်ပိုင်ရှင်များအနေဖြင့် မိမိရွှေဆိုင်တွင် CCTV တပ်ဆင်ထားသည့်အတိုင်း မိမိနေထိုင်ရာ အိမ်ပတ်ဝန်းကျင်နှင့် ကားပါကင်နေရာများတွင်လည်း CCTV ကင်မရာများတပ်ဆင်ရန်နှင့် အရေးပေါ်အချက်ပေး စနစ်များတပ်ဆင်ရန် တိုက်တွန်းထားသည်။

Public Service Announcement

ထို့အပြင် ရွှေ၊ငွေသယ်သည့် ကားများတွင်ပါ ကင်မရာနှင့် GPS များတပ်ဆင်ခြင်းဖြင့် ကြိုတင်ကာကွယ်ရန်လည်း ထပ်မံအသိပေးထားသည်။

“ပြီးခဲ့တဲ့ ရက်ပိုင်းက လှိုင်မြို့နယ်က မြရွှေယုံရွှေဆိုင်က ရွှေတွေလမ်းမပေါ်မှာ အနုကြမ်းစီးခံရတယ်။ရွှေငါး ပိဿာလောက်ပါသွားတယ် ပြောတယ်။ မမိသေး ဘူး။အဲဒါကြောင့် တခြားရွှေဆိုင်ပိုင်ရှင်တွေ သတိထားလို့ရအောင်စာထုတ်တာ”ဟု ရန်ကုန်တိုင်းရွှေလုပ်ငန်း ရှင်းအသင်းမှ တာဝန်ရှိသူက လူထုနွေဦးသို့ ပြောသည်။

စက်တင်ဘာ ၁၀ ရက်ကလည်း မန္တလေးမြို့၊ချမ်းမြသာစည်မြို့နယ်ရှိ ချောင်ချောင်ရွှေဆိုင်မှ ရွှေ၁၀ပိဿာ‌ကျော်နှင့် ကျပ်သိန်း ၁၀၀၀ ဓားပြတိုက်ခံခဲ့ရသည်။

Data For Myanmar နှင့် People’s Spring ၏အချက်အလက်များအရ စစ်တပ်အာဏာသိမ်းပြီး သုံးနှစ်ကျော်အတွင်း နိုင်ငံတစ်ဝန်း ရွှေဆိုင်လုယက်ခံရသည့် ဖြစ်စဥ် ၆၁ခုထက်မနည်းရှိသည်။

ရွှေဆိုင်လုယက်၊ဖောက်ထွင်မှုများအနက် ဖြစ်စဥ်များ၏ ၂၀ရာခိုင်နှုန်းဝန်းကျင်ကိုသာ စစ်ကောင်စီက ဖမ်းဆီးနိုင်ခဲ့သည်။

ရွှေဆိုင်လုယက်ဖောက်ထွင်းမှုသည် ရန်ကုန်နှင့် မန္တလေးတို့တွင် အများဆုံးဖြစ်ပွားခဲ့ပြီး စစ်ကိုင်းတိုင်း ကချင်နှင့် ရှမ်းပြည်နယ်တို့လည်း ပါဝင်နေသည်။

ထိုကဲ့သို့ ဓားပြတိုက် လုယက်မှုဖြစ်စဉ် အများစုမှာ စစ်ကောင်စီ​၏ အဖွဲ့ဝင်များနှင့် ပျူစောထီးက ပြုလုပ်နေခြင်းဟု ပြည်သူများက ပြောသည်။