ရခိုင်မှာ လူ ၂ သန်းလောက် အငတ်ဘေး ကြုံလာနိုင်တယ်လို့ ကုလသမဂ္ဂ အရာရှိဆို

-People’s Spring

ရခိုင်ပြည်နယ်မှာ တိုက်ပွဲတွေ စတင်လာတာ တစ်နှစ်လောက် ကြာမြင့်လာခဲ့ပြီဖြစ်ပြီး အဲဒီအတွင်း ဒေသရဲ့ စီးပွားရေးဟာ လုံးဝဥဿုံ ပြိုကျသွားပြီလို့ ကုလသမဂ္ဂရဲ့ လက်ထောက် အတွင်းရေးမှူးချုပ်နဲ့ ကုလသမဂ္ဂ ဖွံ့ဖြိုးရေး အစီအစဉ် (UNDP)ရဲ့ ဒေသဆိုင်ရာ ဒါရိုက်တာ ကန်နီ ဝစ်နာရာဂျာက Guardian သတင်းဌာနကို ပြောကြားခဲ့ပါတယ်။

စစ်ပွဲကြောင့် ဒေသရဲ့ စီးပွားရေးနဲ့ စားနပ်ရိက္ခာ ထုတ်လုပ်နိုင်စွမ်းတွေ ဆိုးဆိုးရွားရွား ကျဆင်းသွားပြီး မိသားစု အများအပြားဟာ ဆိုးရွားတဲ့ ဆာလောင်မွတ်သိပ်မှု ပြဿနာနဲ့ စတင် ရင်ဆိုင်နေရပြီဖြစ်ကြောင်း၊ ပုံမှန်ဆိုရင် တိရစ္ဆာန် အစာအဖြစ် အသုံးပြုတဲ့ ဖွဲနုကို ဝမ်းစာအဖြစ် စားသောက်နေရတဲ့ မိသားစုတွေ ရှိလာကြောင်း သူက ဆိုပါတယ်။

မြန်မာနိုင်ငံရဲ့ ဘယ်အစိတ်အပိုင်းမှာမှ အခုလိုမျိုး စီးပွားရေး အခြေခံတွေအားလုံး ပြိုလဲသွားတာ မမြင်ဖူးကြောင်း၊ လက်ရှိ အခြေအနေအတိုင်း ၂၀၂၅ ခုနှစ်မှာ ဆက်ဖြစ်နေမယ် ဆိုရင်တော့ ရခိုင်ဒေသခံ ၂ သန်းလောက်ဟာ အငတ်ဘေးဆိုတဲ့ အဆင့်ထိ ကြုံသွားနိုင်ခြေ ရှိနေကြောင်း၊ အခုတောင်မှ မိသားစုတွေ အများကြီးဟာ နေ့စဉ် ရိက္ခာခွဲတမ်းကို လျှော့ချတာ၊ တစ်နေ့ကို ထမင်းတစ်နပ်ပဲ စားတာမျိုး နည်းလမ်းတွေကို မဖြစ်မနေ ရွေးချယ်နေရကြောင်း သူက ပြောပါတယ်။

Public Service Announcement

ရခိုင်ပြည်နယ်ထဲမှာ ငွေချေးယူ သုံးစွဲဖို့ လိုအပ်သူတွေ အများအပြား ရှိနေပေမယ့် ငွေကြေးထုတ်ချေးသူတွေ ကိုယ်တိုင်တောင် ငွေအရင်းအမြစ် နည်းပါးနေပြီလို့လည်း ဝစ်နာရာဂျာက ပြောပါတယ်။ UNDPရဲ့ သုတေသန အစီရင်ခံစာ တစ်စောင်မှာတော့ ပြီးခဲ့တဲ့နှစ်မှာ စစ်ပွဲတွေ စတင်လာချိန် ကတည်းက ဒေသ လူဦးရေ ထက်ဝက်လောက်နဲ့ ညီမျှတဲ့ လူပေါင်း ၁.၄ သန်းလောက်ဟာ မိသားစုတွေရဲ့ ပျမ်းမျှ လစဉ်ဝင်ငွေဟာ ၆၆၆၀၀ ကျပ်ကနေ ၄၆၆၂၀ ကျပ်ကို လျော့ကျသွားမှုမျိုး ကြုံနေရတယ်လို့ ဖော်ပြထားပါတယ်။

တစ်ဖက်မှာတော့ အာရက္ခ တပ်တော် (AA)နဲ့ စစ်ခင်းတိုက်ခိုက်နေတဲ့ မြန်မာ စစ်ကောင်စီဟာ ဖြတ်လေးဖြတ် ဗျူဟာအရ ရခိုင်ပြည်နယ်ရဲ့ ကုန်သွယ်ရေး လမ်းကြောင်းတွေကို တင်းတင်းကျပ်ကျပ် ပိတ်ဆို့နေတာကြောင့် ကုန်စည်တွေ ဝင်ရောက်မှု ရပ်တန့်ကုန်ပြီး စားနပ်ရိက္ခာ၊ ဆေးဝါးနဲ့ လူသုံးကုန်တွေ အရမ်းရှားပါးကုန်ပါတယ်။ အကျိုးဆက်အဖြစ် စျေးတွေလည်း အဆမတန် မြင့်တက်ကုန်တယ်လို့ UNDP အစီရင်ခံစာက ထောက်ပြထားခဲ့ပါတယ်။ စစ်ကောင်စီဟာ ရခိုင်ပြည်နယ်ကို နိုင်ငံရဲ့ တခြားဒေသ အားလုံးနဲ့ အဆက်အသွယ် ဖြတ်တောက်ပြီး ထီးတည်းရပ်တည်ရအောင် ရည်ရွယ်ချက်ရှိရှိ လုပ်ဆောင်နေကြောင်း ဝစ်နာရာဂျာက ပြောပါတယ်။

လက်ရှိမှာတော့ စစ်ပွဲတွေကြောင့် ရခိုင်ပြည်နယ်ထဲမှာ ရိုဟင်ဂျာ မွတ်ဆလင်တွေ အပါအဝင် လူပေါင်း ၅၁၁၀၀၀ လောက်ဟာ နေရပ်စွန့်ခွာ ထွက်ပြေးနေရပြီး အလှူရှင်တွေ၊ စစ်ရှောင်ရာ ဒေသက လူ့အဖွဲ့အစည်းတွေ၊ လူသားချင်း စာနာမှု အေဂျင်စီတွေအပေါ် အမှီပြုပြီး ရှင်သန် ရပ်တည်နေရပါတယ်။ ဒါပေမဲ့ ပဋိပက္ခတွေနဲ့ စစ်ကောင်စီရဲ့ ဖိအားပေးမှုတွေကြောင့် ရခိုင်ပြည်နယ်ကနေ အန်ဂျီအို အဖွဲ့အစည်းတွေ စွန့်ခွာနေရတဲ့ အခြေအနေက အကူအညီ လိုအပ်နေသူတွေရဲ့ ဒုက္ခတွေကို ပိုမို ကြီးထွားလာစေတယ်လို့လည်း UNDPက ထောက်ပြထားပါတယ်။

ကိုးကား: Guardian