ဟာနာဆန်/People’s Spring
နိုဝင်ဘာ ၆ရက်က ပခုက္ကူခရိုင်၊ မြစ်ခြေမြို့နယ် ၊ ဖလံအိုကျေးရွာ၌ စစ်ကောင်စီ၏ လေကြောင်း တိုက်ခိုက်မှုကြောင့် ဧရာဒေါင်းပြည်သူ့ကာကွယ်ရေးအဖွဲ့ဝင် ရဲဘော်ဆင်ကြီး (ခ) မြို့လှိုင် နှင့် ရဲဘော်မီးလက်ဝါး (ခ) ချမ်းမြေ့ဦး တို့ ကျဆုံးခဲ့ရကြောင်း ပြည်သူ့ဒီမိုကရက်တစ်တပ်တော်က သတင်းထုတ်ပြန်သည်။
၎င်းတို့နှစ်ဦးသည် ပြည်သူ့ဒီမိုကရက်တစ်တပ်တော်၏ စစ်သင်တန်းအား တက်ရောက်အောင်မြင်ထားပြီး အသက်ရှိစဥ်အတွင်း အဖိနှိပ်ခံပြည်သူလူထုဘက်မှ ရပ်တည်၍ ဖက်ဆစ်စစ်အုပ်ချုပ်ရေးအား ဆန့်ကျင်လက်နက်ကိုင် တိုက်ပွဲဝင်ခဲ့ကြသူများဖြစ်ကြောင်း ပြည်သူ့ဒီမိုကရက်တစ်တပ်တော်က အသိပေးထားသည်။
စစ်ကောင်စီတပ်သည် ထိုနေ့က ဖလံအိုကျေးရွာ ဘုန်းကြီးကျောင်းကိုလည်း လေကြောင်းဖြင့် ဗုံးကျဲ တိုက်ခိုက်ခဲ့ရာ ကျောင်းအဆောက်အဦး အများအပြား ပျက်စီးခဲ့ကြောင်း ဒေသခံများက ပြောသည်။
Public Service Announcement
“မြစ်ခြေမြောက်ဘက်က ဖလံအို၊ ဇီးကုန်း၊ ရှင်မကန်ဘက်တွေ ကျဲသွားတာ။”ဟု ဒေသခံတစ်ဦးက ပြောသည်။
ရဲဘော်နှစ်ဦး ကျဆုံးခဲ့သည့်ဖြစ်စဥ်နှင့်ပတ်သက်၍ ဧရာဒေါင်းပြည်သူ့ကာကွယ်ရေးအဖွဲ့ထံ ဆက်သွယ်မေးမြန်းရန် ကြိုးစားသော်လည်း လက်တလောဆက်သွယ်၍ မရသေးပေ။
စစ်ကောင်စီတပ်သည် အောက်တိုဘာ ၁၂ရက်ကလည်း မြစ်ခြေမြို့ကို လေကြောင်းတိုက်ခိုက်ခဲ့ရာ နေအိမ်များ မီးလောင်ပျက်စီးပြီး ပြည်သူအချို့ ထိခိုက်ဒဏ်ရာရရှိခဲ့သေးသည်။
