နိုင်ပကောင်း/People’s Spring
ကရင်ပြည်နယ်၊ ဖာပွန်မြို့အနီးက စစ်ကောင်စီတပ်ရဲ့ ကူးဆိပ်စခန်းကို KNU တပ်မဟာ(၅) နဲ့ ပူးပေါင်းတပ်တွေ နိုဝင်ဘာလ ၉ ရက်က တိုက်ခိုက်သိမ်းယူလိုက်တယ်လို့ တပ်မဟာ (၅) ပြောရေးဆိုခွင့်ရှိသူ ဗိုလ်မှုးကြီး စောကလယ်ဒိုက အတည်ပြုပါတယ်။
ဖာပွန်မြို့ တောင်ဘက် ၇ မိုင်ခန့်အကွာမှာ ဖာပွန် – ကတိုင်တိ – ကမမောင်းကားလမ်းပေါ်က ကူးဆိပ် စခန်းကို နိုဝင်ဘာလ ၆ ရက် မနက် ၈ နာရီမှာ KNU နဲ့ ပူးပေါင်းတပ် က စတင်တိုက်ခိုက်ပြီး နိုဝင်ဘာလ ၉ ရက် ညနေပိုင်း စခန်းသိမ်းနိုင်ခဲ့တာပါ။
ကူးဆိပ်တပ်စခန်းက ၁၉၅၄ – ၅၅ ခုနစ်တွေကတည်းက စစ်တပ်က နေရာယူ တပ်စွဲထားခဲ့တဲ့ သက်တမ်းရင့် စခန်း ဖြစ်တယ်လို့ KNU တပ်မဟာ (၅) ပြောရေးဆိုခွင့်ရှိသူ ဗိုလ်မှုးကြီး စောကလယ်ဒိုက ဆိုပါတယ်။
Public Service Announcement
အဲဒီစခန်းသိမ်းတိုက်ပွဲမှာစစ်သား ရုပ်အလောင်း ၈ လောင်းတွေ့ရပြီး ပခုံးထမ်း အာပီဂျီ ၃ လက်နဲ့ အခြားသော လက်နက်ခဲယမ်းတွေ သိမ်းဆည်းရမိတယ်လို့သိရပါတယ်။
စခန်းသိမ်းပြီးနောက် စစ်ကောင်စီလေတပ်က ဗုံးကြဲ တိုက်ခိုက်ခဲ့ပေမယ့် ပူးပေါင်းတပ်ဘက်က အထိအခိုက်မရှိဘူးလို့လည်း ပြောပါတယ်။
ပြီးခဲ့တဲ့ လအတွင်းကလည်း ဖာပွန်မြို့အရှေ့မြောက်ဘက် ၁၀ မိုင်ခန့်အကွာ မှာ တည်ရှိတဲ့ စစ်ကောင်စီတပ်ရဲ့ အရေးပါတဲ့ ခေါပုတ်စခန်းကို KNU ပူးပေါင်းတပ်က သိမ်းနိုင်ခဲ့ပါသေးတယ်။
အခု ကူးဆိပ်စခန်းကို သိမ်းယူလိုက်ပေမယ့် ဖာပွန်-ကတိုင်တိ-ကမမောင်း ကားလမ်းမပေါ်မှာ မထော၊ တောင်သုံးလုံး၊ ကတိုင်တိ၊ ကမမောင်းဗျူဟာ၊ BGF တပ်စခန်းတွေ ရှိနေသလို ဖာပွန်မြို့အနီးမှာလည်း အခြေချ စစ်ဗျုဟာကျန် ရှိပါတယ်။
