လေကြောင်းတိုက်ခိုက်မှုကြောင့် သားအမိနှစ်ဦး သေဆုံး
လေကြောင်းတိုက်ခိုက်မှုကြောင့် သားအမိနှစ်ဦး သေဆုံးဇေအောင်/People’s Spring
မန္တလေးတိုင်း၊ သပိတ်ကျင်းမြို့နယ်၊ တွင်းငယ်ကျေးရွာတွင် တိုက်ပွဲဖြစ်ပွားနေပြီး စစ်ကောင်စီတပ်က လေကြောင်းတိုက်ခိုက်ခဲ့၍ သားအမိနှစ်ဦးသေဆုံးကာ ဒေသခံအများအပြားထွက်ပြေးတိမ်းရှောင်နေရကြောင်း သတင်းရရှိသည်။
နိုဝင်ဘာ ၁၆ ရက် နံနက်ပိုင်းက သပိတ်ကျင်းမြို့နယ်၊ တွင်းငယ်ကျေးရွာရှိ တန်းမြင့် လေ့ကျင့်ရေးသင်တန်းကျောင်း(တကသ -၁၃)ကို တော်လှန်ရေးတပ်ဖွဲ့များက ပိတ်ဆို့ထား၍ ထိတွေ့ တိုက်ပွဲဖြစ်ပွားခဲ့ကြောင်း ဒေသခံများက ပြောသည်။
ထို့နောက် နံနက် ၉ နာရီခန့်တွင် တံတားဦးလေတပ်စခန်းမှလာသော ဂျက်ဖိုက်တာတစ် စီးသည် တွင်းငယ်ရွာအနီးရှိ ရေညာဦးကျေးရွာကို လေကြောင်းတိုက်ခိုက်ခဲ့ရာ (၆)နှစ်အရွယ်နှင့် ၎င်း၏မိခင်တို့ သေဆုံးခဲ့ကြောင်း ဒေသခံများက ပြောသည်။
Public Service Announcement
“မအေဖြစ်တဲ့သူက ပေါင်ပြတ်သွားတယ်။ သားအမိနှစ်ယောက်ဆေးရုံပို့တာကို သွေးထွက်လွန်ပြီး လမ်းမှာတင်ဆုံးတယ်။”ဟု ဒေသခံတစ်ဦးက ပြောသည်။
ထို့နောက် ၈ မိနစ်ခန့်အကြာတွင် တွင်းငယ်ရွာအနီးရှိ ကျောက်ဖြူကျေးရွာကိုပါ စစ်တပ်က ဗုံးသီး နှစ်လုံးကြဲချပြီး လေကြောင်းထပ်မံတိုက်ခိုက်ခဲ့ရာ ဒေသခံပြည်သူသုံးဦး ထိခိုက်ဒဏ်ရာများရရှိခဲ့ကြောင်း ဒေသခံများက ပြောသည်။
စစ်ကောင်စီ၏ လေကြောင်းတိုက်ခိုက်မှုများကြောင့် တွင်းငယ်ကျေးရွာတဝိုက်ရှိ ကျေးရွာများမှ ဒေသခံပြည်သူအများအပြား ထွက်ပြေးတိမ်းရှောင်နေရသည်။
“စစ်ရှောင်ကတော့များတယ်။ တပ်တွေနားမှာရှိတဲ့ရွာတွေ ပတ်ပတ်လည်ကရွာတွေ လက်နက်ကြီးရမ်းပစ်နေတဲ့အတွက်ကြောင့် စစ်ရှောင်ကတော့ များနေတဲ့အနေအထားရှိတယ်။”ဟု ဒေသခံစစ်ရှောင်ကူညီနေသူတစ်ဦးက ပြောသည်။
သပိတ်ကျင်းမြို့ကို ပြီးခဲ့သည့်သြဂုတ် ၂၅ရက်တွင် ပြည်သူ့ကာကွယ်ရေးပူးပေါင်းတပ်များက တိုက်ခိုက်သိမ်းပိုက်ခဲ့သည်။
သပိတ်ကျင်းမြို့နယ်အတွင်းရှိ စစ်ကောင်စီစခန်းအများအပြားအား ပြည်သူ့ကာကွယ်ရေးပူးပေါင်းတပ်များက တိုက်ခိုက်သိမ်းပိုက်ပြီးနောက် စစ်ကောင်စီက လေကြောင်းတိုက်ခိုက်မှု ၇ ကြိမ်ထက်မနည်း ပြုလုပ်ခဲ့ပြီး ဒေသခံပြည်သူ ၁၂ ဦးထက်မနည်း သေဆုံးခဲ့သည်။
