ထားမြတ်/People’s Spring
တနင်္သာရီတိုင်း၊ ထားဝယ်ခရိုင်အတွင်းရှိ ပြည်သူ့ကာကွယ်ရေးတပ်(PDF)နှင့် ပြည်သူ့ကာကွယ်ရေးအဖွဲ့ (ပကဖ)တပ်ဖွဲ့များ စုပေါင်းပြီး ထားဝယ်ခရိုင်တပ်ပေါင်းစု ဖွဲ့စည်းလိုက်ကြောင်း သက်ဆိုင်ရာတပ်ရင်းမှူးနှင့် တာဝန်ခံများလက်မှတ်ရေးထိုးပြီး ယနေ့(နိုဝင်ဘာ ၂၄ရက်) တွင် ကြေညာသည်။
အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန(MOD)၏ ညွှန်ကြားမှုအောက်ရှိ ပြည်သူ့ကာကွယ်ရေးတပ်မတော်၊ ထားဝယ်ခရိုင်အမှတ်(၁)တပ်ရင်း ၊ အမှတ်(၂)တပ်ရင်းနှင့် ထားဝယ်မြို့နယ် ၊ သရက်ချောင်းမြို့နယ် ၊ လောင်းလုံးမြို့နယ်နှင့် ရေဖြူမြို့နယ်များရှိ မြို့နယ်အလိုက် ပြည်သူ့ကာကွယ်ရေးအဖွဲ့ (ပကဖ)များပူးပေါင်း၍ ထားဝယ်ခရိုင်တပ်ပေါင်းစုကို အောက်တိုဘာ ၂၈ရက်တွင် စတင်ဖွဲ့စည်းခဲ့ခြင်းဖြစ်ဟု အသိပေးသည်။
ထားဝယ်ခရိုင်အတွင်း၌ MOD၏ လက်အောက်ခံ PDFတပ်ရင်း (၂)ရင်းနှင့် မြို့နယ် ပကဖတပ်ဖွဲ့ လေးဖွဲ့ရှိရာ အဆိုပါ တပ်ဖွဲ့များအားလုံး စုပေါင်းလိုက်ခြင်း ဖြစ်သည်။
Public Service Announcement
” အရင်ကဆို PDF၊ ပကဖ ပူးပေါင်းပြီး စစ်ဆင်ရေးတွေလုပ်တာရှိပေမဲ့ သိပ်ပြီးတော့ထိရောက်မှုမရှိဘူးပေါ့။ အထူးသဖြင့် တိုက်ပွဲအတွင်း အမိန့်ပေးကွပ်ကဲတဲ့ အပိုင်းမှာ ပြဿနာရှိတာတွေ့ရတယ်။ အခု ပူးပေါင်းပြီး တပ်ပေါင်းစုဖွဲ့လိုက်တဲ့ခါကျတော့ စုဖွဲ့မှုအရ၊ စစ်ရေးအရ ပိုပြီး အားကောင်းလာမယ့်အပြင် တိုက်ပွဲအတွင်း အမိန့်ပေးကွပ်ကဲမှုကလဲ ပိုပြီးတော့ အားကောင်းလာမယ်လို့ ယူဆပါတယ်”ဟု ထားဝယ်ခရိုင် အတွင်း စစ်ရေးလေ့လာနေသူတစ်ဦးက ပြောသည်။
ထိုကဲ့သို့ MODလက်အောက်ရှိ ခရိုင်တစ်ခုအတွင်း တပ်ဖွဲ့များစုပေါင်းမှု အသိပေးကြေညာမှုမှာ ထားဝယ်ခရိုင်က ပထမဆုံးဖြစ်ကြောင်း ၎င်းက ပြောသည်။
ထားဝယ်ခရိုင်တပ်ပေါင်းစုကို ထားဝယ်ခရိုင် အတွင်းရှိ လက်နက်ကိုင်တော်လှန်ရေး အင်အားစုများ အားလုံးနှင့် ချိတ်ဆက်ဆောင်ရွက်နိုင်ရန်၊ အမိန့်တစ်ခုတည်းအောက် ပူးပေါင်းတိုက်ပွဲဝင်နိုင်ရန် အတွက် ဖွဲ့စည်းခြင်းဖြစ်ကြောင်း ဖော်ပြသည်။
ထို့ပြင် ဘုံရန်သူကို စုပေါင်းအားဖြင့် တွန်းလှန် တိုက်ခိုက်နိုင်ရန်နှင့် တူညီသောဘုံရည်မှန်းချက် အတိုင်း အကောင်အထည်ဖော် ဆောင်ရွက်နိုင်ရန်အတွက် ဖွဲ့စည်းတည်ထောင် ခြင်းဖြစ်ကြောင်း ထုတ်ပြန်သည်။
ထားဝယ်ခရိုင်တပ်ပေါင်းစုကို ထားဝယ်ခရိုင် အတွင်းရှိ တိုင်းရင်းသားလက်နက်ကိုင်အင်အားစုများ၊ ဒေသအခြေပြု လက်နက်ကိုင်အင်အားစုများ(Local PDF)၊ ထောက်ပို့အင်အားစုများ၊ နိုင်ငံရေးအင်အားစုများ၊ သက်ဆိုင်ရာ ကဏ္ဍအလိုက် အင်အားစုများ၊ သတင်း မီဒီယာကွန် ယက်များအားလုံးနှင့် ပူးပေါင်းဆောင်ရွက်နိုင်ရန် ဆောင်ရွက်မည်ဟု ဆိုသည်။
အပြန်အလှန် ယုံကြည်မှုလေးစားမှုနှင့် ဖေးမကူညီထိန်းကျောင်းသွားကြပြီး စည်းလုံးညီညွတ်စွာပူးပေါင်း၍ စစ်အာဏာရှင်စနစ်အမြစ်ပြတ်ချေမှုန်းနိုင်ရေးနှင့် ဖက်ဒရယ်ဒီမိုကရေစီစနစ် အောင်မြင်စွာ ဖော်ဆောင်နိုင်ရေးအတွက်ပူးပေါင်းဆောင်ရွက်သွားမည် ဖြစ် ကြောင်း အသိပေးကြေညာသည်။
ထိုကဲ့သို့ တပ်ပေါင်းစုဖွဲ့မှုနှင့်ပတ်သက်ပြီး ကာကွယ်ရေးဝန်ကြီးဌာန (MOD)ထံ ဆက်သွယ်မေးမြန်းရာ ဆက်သွယ်၍ မရပေ။
