ဟန်နွေ/People’s Spring
ပြည်သူ့ကာကွယ်ရေးတပ်မတော်၊ တောင်ပိုင်းစစ်ဒေသ၌ တပတ်အတွင်း စစ်ကောင်စီတပ်ကို အကြိမ် ၃၀နီးပါး တိုက်ခိုက်ခဲ့ရာ စစ်ကောင်စီတပ်ဖွဲ့ဝင် ၅၀ကျော်သေဆုံးခဲ့ဟု တောင်ပိုင်း စစ်ဒေသက ယနေ့ (နိုဝင်ဘာ ၃၀ရက်)တွင် ထုတ်ပြန်သည်။
နိုဝင်ဘာ ၂၃ ရက်မှ နိုဝင်ဘာ ၂၉ ရက်အတွင်း တောင်ပိုင်းစစ်ဒေသနယ်မြေ၌ စစ်ရေးဖော် ဆောင်မှုအခြေအနေကို ပြည်သူလူထုသို့ အသိပေးခဲ့ရာပူးပေါင်းတပ်ဖွဲ့က စစ်ကောင်စီ စစ်ကြောင်းများနှင့် စစ်ကောင်စီတပ်စွဲရာနေရာများ သွားရောက်တိုက်ခိုက်မှု ၂၇ကြိမ်ရှိခဲ့သည်ဟု ဆိုသည်။
တိုက်ပွဲများအတွင်း စစ်ကောင်စီတပ်သား ၅၂ဦး သေဆုံးခဲ့ကြောင်းဖော်ပြပြီး တော်လှန်ရေးပူးပေါင်းတပ်ဖွဲ့မှ ရဲဘော်နှစ်ဦးကျဆုံးကာ လေးဦးဒဏ်ရာရရှိဟု အသိပေးသည်။
Public Service Announcement
PDFနှင့် မဟာမိတ်ပူးပေါင်းတပ်ဖွဲ့များသည်အာဏာသိမ်းစစ်တပ်အား နည်းမျိုးစုံဖြင့် ဖိအားပေးတိုက်ခိုက်လျက်ရှိပြီး ကော့ကရိတ် – မြဝတီ အာရှလမ်းပိုင်းတွင်လည်း စစ်ကောင်စီတပ်၏ ရိက္ခာနှင့် တပ်ကူလမ်းကြောင်းများကို လိုက်လံပိတ်ဆို့ ဖြတ်တောက်ကာ တိုက်ခိုက်လျက်ရှိကြောင်း ထုတ်ပြန်သည်။
တိုက်ပွဲများအနက် ကရင်ပြည်နယ် ဖာပွန် မြို့နယ် အတွင်း တိုက်ခိုက်မှုဖြစ်စဉ်များလည်းပါဝင်သည်။ နိုဝင်ဘာ ၂၂ရက်တွင် တော်လှန်ရေးပူးပေါင်းတပ်က တိုက်ခိုက်သိမ်းပိုက်ခဲ့သည့် မထောစခန်းမှထွက်ပြေးသည့် စစ်ကောင်စီတပ်များကို ပူးပေါင်းတပ်ဖွဲ့က စောင့်ကြို တိုက်ခိုက်မှုများလုပ်ဆောင်ခဲ့ရာ စစ်ကောင်စီတပ် အထိနာခဲ့သည်။
မထောစခန်းမှထွက်ပြေးသည့် စစ်ကြောင်းအား နိုဝင်ဘာ ၂၃ရက်တွင် တိုက်ခိုက်ရာ စစ်ကောင်စီတပ်မှ ၁၀ဦး ခန့်သေဆုံးပြီး နိုဝင်ဘာ ၂၇ရက်တွင် ထပ်မံတိုက်ခိုက်ရာ စစ်ကောင်စီတပ်ဖွဲ့ဝင် ၅ဦး သေဆုံးခဲ့ကြောင်း ကရင်အမျိုးသားလွတ်မြောက်ရေးတပ်မတော်(KNLA) တပ်မဟာ(၅) ပြောရေးဆိုခွင့်ရှိသူ ဗိုလ်မှူးကြီး စောကလယ်ဒိုက ပြောကြားထားသည်။
အဆိုပါတိုက်ပွဲများအတွင်း စစ်ကောင်စီတပ်ထံမှ လက်နက်ကြီး၊ လက်နက်ငယ်နှင့် ခဲယမ်းများလည်း သိမ်းရခဲ့သည်။
