ဆိုင်းမင်း၊ ရှိန်း/People’s Spring
မန္တလေးတိုင်း၊ မြင်းခြံမြို့နယ် မြောက်ဘက် ခြမ်းက သစ်ရုံကျေးရွာကို ဒီနေ့ မနက်အစောပိုင်း ၅ နာရီခွဲခန့်က စစ်ကောင်စီ တပ် ဝင်ရောက် စီးနင်းခဲ့ရာမှာ PDF ၂ဦး ကျဆုံးခဲ့ရတယ်လို့ သိရပါတယ်။
သစ်ရုံကျေးရွာကို မြင်းခြံအခြေစိုက် အမှတ် (၁၅) ခြေမြန်တပ်ရင်းနဲ့ ဒေါ်သီတာယုမွန်ဦးစီးတဲ့ ပျုစောထီးတပ်တွေ ဝင်ရောက် စီးနင်းတာလို့သိရပါတယ်။
” ကျွန်တော်တို့ဘက်က ၂ဦးကျတယ်ဗျာ” လို့ မြင်းခြံမြို့နယ်အတွင်းက တော်လှန်ရေးတပ်ဖွဲ့ဝင်တစ်ဦးကပြောပါတယ်။
Public Service Announcement
အခြားသောတော်လှန်ရေးတပ်ဖွဲ့ဝင်တစ်ဦးကလည်း “”အင်အားအလုံးအရင်းနဲ့ဝင်ရောက်စီးနင်းသွားတဲ့သဘောပါဗျ” လို့ဆိုပါတယ်။
ရွာကို ဝင်စီးနင်းပြီးနောက် မနက် ၁၀ နာရီခန့်မှာတော့ သစ်ရုံကျေးရွာအနီးဝန်းကျင်မှာ တိုက်လေယာဥ်တွေ ဝဲနေတယ်လို့ ဒေသခံတွေကပြောပါတယ်။
စစ်တပ်ဝါဒဖြန့် တယ်လီဂရမ် ချန်နယ်အချို့မှာ လည်း သစ်ရုံရွာကို စစ်တပ်နဲ့ ပျုစောထီး ပူးပေါင်းတပ်က ဝင်စီးရာ PDF တပ်ဖွဲ့ဝင် ၂ဦး သေဆုံးသွားတယ်လို့ ဖြန့်ဝေပါတယ်။
အဲဒီဖြန့်ဝေမှုမှာ သွေးအလိမ်းလိမ်းနဲ့ သေဆုံးနေတဲ့ အမျိုးသား ၂ ဦးရဲ့ရုပ်အလောင်းနဲ့အတူ လက်လုပ်သေနတ် ၂ လက်ကို ထည့်သွင်း ဖော်ပြထားတာတွေ့ရပါတယ်။
သစ်ရုံကျေးရွာဟာ မြင်းခြံမြို့အနီးမှာရှိပြီး ပျူစောထီးတွေအထိုင်ချထားတဲ့ လယ်သစ်ကျေးရွာ အနီးမှာရှိတယ်လို့သိရပါတယ်။
မြင်းခြံမြို့နယ်မှာ ပျူစောထီးတွေဦးဆောင်ပြီးကျေးရွာတွေကို စစ်ကြောင်းထိုးနေသလို မြင်းခြံမြို့တောင်ဘက်က ကူရွာ၊ကွမ်းစိုက်၊ခြေဆေးရွာတွေကို သိမ်းယူပြီး ယနေ့အထိတပ်စွဲထားတယ်လို့သိရပါတယ်။
