ဟန်နွေ/People’s Spring
ကချင်ပြည်နယ် ချီဖွေမြို့နယ်ပန်ဝါမြို့ကို ကချင်လွတ်လပ်ရေးအဖွဲ့(KIO) အုပ်ချုပ်ရေး ယန္တရား ဖော်ဆောင်လျက်ရှိပြီး မြို့ သာယာလှပရေး နှင့် ပြည်သူ့ ကျန်းမာရေး ဝန်ဆောင်မှုပေးသည့်လုပ်ငန်းများကို သက်ဆိုင်ရာ ဌာနများက လုပ်ဆောင်နေကြောင်း KIO/KIA သတင်းပြန်ကြားရေးဌာနက ဒီဇင်ဘာ ၁၉ ရက်တွင် ဖော်ပြသည်။
ပန်ဝါကို အောက်တိုဘာ ၁၈ရက်တွင် KIA ပူးပေါင်းတပ်များက သိမ်းပိုက်ပြီးနောက် နိုဝင်ဘာလဆန်းမှ စတင်ကာ KIO အစိုးရ အုပ်ချုပ်ရေးယန္တရား လည်ပတ်နေခြင်းဖြစ်သည်ဟု ဆိုသည်။
ထိုသို့ KIO အစိုးရ အုပ်ချုပ်ရေးယန္တရား စတင်လည်ပတ်နေသည်မှာ အချိန် တစ်လကျော်ကြာပြီဖြစ်သော်လည်း ဒေသခံများ၏ လိုက်နာကျင့်သုံးမှု အားနည်းနေ၍ အခက်အခဲ ရှိနေဆဲဖြစ်ကြောင်း ပန်ဝါမြို့တော်ဝန် ဆလန်ကဘာ မဒိန်ဘောင်းချမ်၏ ပြောကြားချက်ကို KIA သတင်းပြန်ကြားရေးဌာနက ဖော်ပြသည်။
Public Service Announcement
ယခင်က စစ်ကောင်စီ လက်အောက်ခံ နယ်ခြားစောင့် BGFနှင့် ပြည်သူ့စစ်အဖွဲ့က အုပ်ချုပ်ခဲ့ခြင်းဖြစ်ပြီး အုပ်ချုပ်ရေး ယန္တရား လည်ပတ်ရာ၌ကျစ်လစ်ထိရောက်မှု မရှိခဲ့၍ လက်ရှိတွင် အခက်အခဲ ကြုံနေရခြင်းဖြစ်သည်ဟုလည်း KIO/KIA သတင်းပြန်ကြားရေးက အသိပေးသည်။
လက်ရှိတွင်မြို့အတွင်း အုပ်ချုပ်ရေး ကော်မတီအဖွဲ့၊ အမျိုးသမီးရေးရာအဖွဲ့၊ လူငယ်အဖွဲ့များဖွဲ့စည်းထားပြီးဖြစ်သည်ဟု ဖော်ပြသည်။
ပန်ဝါမြို့၌ KIO အစိုးရ၏ အုပ်ချုပ်ရေးယန္တရား လည်ပတ်လာသည်နှင့်အမျှ ရဲတပ်ဖွဲ့၊ လူဝင်မှုကြီးကြပ်ရေးဌာန ၊ စည်ပင်ဌာန၊ ကျန်းမာရေးဌာနများ ဖွဲ့စည်းဖွင့်လှစ်ကာ စည်ပင်ဌာနက မြို့တွင်း သာယာလှပရေးလုပ်ဆောင်နေသကဲ့သို့ ကျန်းမာရေးဌာနက ပြည်သူ့ ကျန်းမာရေးဌာနများ ဖွင့်လှစ်ပြီး ဆေးကုသပေးနေသည်ဟုဆိုသည်။
KIAသည် ပန်ဝါအပါအဝင်စစ်ကောင်စီ လက်အောက်ခံ ဦးဇခုန်တိန့်ယိန်း ဦးဆောင်သည့် ကချင်အထူးဒေသ(၁) တစ်ခုလုံးကို တိုက်ခိုက်သိမ်းပိုက်ပြီးနောက်နိုဝင်ဘာလ ၂၈ ရက်တွင်ကချင်အထူးဒေသ(၁) သတ်မှတ်ချက်ကို ပယ်ဖျက်လိုက်ကြောင်း ကြေညာခဲ့သည်။
