ရှေ့တန်းရှိ ရဲဘော်များဆေးကုသပေးနေသည့်ဆေးခန်းသို့ ပြည်ထောင်စုဝန်ကြီးချုပ်သွားရောက်ပြီး ဒဏ်ရာရရဲဘော်များအား တွေ့ဆုံအားပေး

-People’s Spring

အမျိုးသားညီညွတ်ရေးအစိုးရ(NUG)၊ပြည်ထောင်စုဝန်ကြီးချုပ် မန်းဝင်းခိုင်သန်းသည် ရှေ့တန်းတနေရာရှိ ဒဏ်ရာရရဲဘော်များ ဆေးကုသနေသည့်ဆေးခန်းသို့ သွားရောက်ပြီး တွေ့ဆုံအားပေးစကားပြောကြားခဲ့ကြောင်း NUGက ထုတ်ပြန်သည်။

ပြည်ထောင်စုဝန်ကြီးချုပ်နှင့်အတူ ပြည်ထောင်စုဝန်ကြီးချုပ်၏ ကိုယ်ရေးအရာရှိ ကိုနောင်ရိုး၊ အမျိုးသားညီညွတ်ရေးအစိုးရ ကာကွယ်ရေးဝန်ကြီးဌာန ဒုစစ်ရေးချုပ် ဒေါက်တာယင်းမာ၊ တောင်ပိုင်းစစ်ဒေသ၊ ဒုစစ်ဒေသမှူး(၂)ရဲဘော်စောရှား၊ပညာရေးဝန်ကြီးဌာနအမြဲတမ်း အတွင်းဝန်ဦးမျိုးသန့်တို့ လိုက်ပါခဲ့သည်။ အဆိုပါ ဆေးခန်းတွင် CDM ဆရာဝန် (၃)ဦးနှင့်အတူ သူနာပြုများ၊ ဆေးအကူများ ပူးပေါင်း၍ ဒဏ်ရာရရဲဘော်များကို ကျန်းမာရေး စောင့်ရှောက်မှုပေးနေခြင်းဖြစ်သည်။

ထို့အပြင် ပြည်ထောင်စုဝန်ကြီးချုပ်က ဆေးခန်းအသုံးစရိတ်များ ထောက်ပံ့ခဲ့သည်ဟု ဆိုသည်။

Public Service Announcement

ဝန်ကြီးချုပ်နှင့်အဖွဲ့သည် ပြီးခဲ့သည့်ရက်ပိုင်းအတွင်း စစ်မြေပြင်ရှိ ရဲဘော်များထံ သွားရောက်ခဲ့သည်။ မှတ်တမ်းဓာတ်ပုံများထုတ်ပြန်အသိပေးမှုအရ NUG၏ပြည်ထောင်စုဝန်ကြီးချုပ်နှင့်အဖွဲ့သည် ရန်ကုန်မြို့သို့ ဦးတည်သော စစ်ရေးဖော်ဆောင်မှုမည့် ရန်ကုန်တပ်ရင်းများဖြစ်သော တပ်ရင်း(၅၁၀၁)၊ တပ်ရင်း(၅၁၀၂)နှင့် ရန်ကုန်တိုင်းပြည်သူ့ကာကွယ်ရေးအဖွဲ့(ပကဖ) တိုက်ခိုက်ရေးတပ်ဖွဲ့ (၄)တို့မှ ရဲဘော်များအား တွေ့ဆုံခဲ့ကြောင်း ဇန်နဝါရီ ၁ရက်တွင် အသိပေးသည်။

ထို့အပြင် ပြည်ထောင်စုဝန်ကြီးချုပ်သည် PDFသင်တန်းကျောင်းများသို့ သွားရောက်ပြီး PDFများအဖြစ် တော်လှန်ရေး၌ ပါဝင်လာကြသည့် လူငယ်များကို ကျေးဇူးတင်ကြောင်း ပြောကြားခဲ့သည်ဟု ဒီဇင်ဘာ ၃၁ရက်က ထုတ်ပြန်ထားသည်။

ထို့နောက် ပြည်ထောင်စုဝန်ကြီးချုပ်နှင့်အဖွဲ့သည် စစ်တပ်၏ အောင်ဇေယျစစ်ကြောင်းအား ထိုးစစ်ဆင် ချေမှုန်းလျက်ရှိသော ဗျူဟာ(၃၂) စစ်ဆင်ရေးမှူး ဗိုလ်မှူးဒါဘောဦးဆောင်သည့် ကော်ဘရာစစ်ကြောင်းမှ တပ်ဖွဲ့ဝင်များအား သွားရောက်တွေ့ဆုံခဲ့သည်ဟု NUGက ဒီဇင်ဘာ ၂ရက်တွင် ထုတ်ပြန်သည်။