ကဖေး/People’s Spring
ချင်းပြည်နယ်၊ ဖလမ်းမြို့ကို စစ်ကောင်စီက လေကြောင်းမှ ဗုံးကြဲတိုက်ခိုက်ခဲ့ပြီး နောက်ထပ်လေကြောင်းပျံသန်းမှုများရှိနေကြောင်း ဒေသခံသတင်းရင်းမြစ်များက ပြောသည်။
စစ်ကောင်စီသည် ဖလမ်းမြို့ကို ယနေ့(ဇန်နဝါရီ ၂၂ရက်) နေ့လည် ၁၂နာရီခန့်ကစ၍ ဂျက်ဖိုက်တာ၊ Y12 လေယာဉ်တို့ဖြင့် ဗုံးကြဲတိုက်ခိုက်ခြင်းဖြစ်ကြောင်း သတင်းရရှိသည်။
” Y12နဲ့ ကြဲတာ အလုံး ၃၀ကျော်တယ်။ ဂျက်ဖိုက်တာနဲ့လည်း မြို့ရဲ့အနောက်ဘက်တွေကို ကြဲတယ်” ဟု ဒေသခံတစ်ဦးက ပြောသည်။
Public Service Announcement
ထို့အပြင် နောက်ထပ်လေယာဥ်ပျံသန်းမှုများရှိနေပြီး လေကြောင်းအန္တရာယ်သတိပြုကြရန် ချင်းကာကွယ်ရေးရဲဘော်အချို့က သတိပေးထားသည်။
ချင်းညီနောင်အဖွဲ့နှင့်မဟာမိတ်များသည် ၂၀၂၄ နိုဝင်ဘာ ၉ရက်ကမှစ၍ ဖလမ်းမြို့သိမ်းတိုက်ပွဲတိုက်ခိုက်ခဲ့ပြီး မြို့ပေါ်ရှိ အမှတ်(၂၆၈)ခြေလျင်တပ်ရင်း တစ်ခုသာကျန်တော့သည်။ အဆိုပါ ခလရ(၂၆၈)ကို ချင်းကာကွယ်ရေးပူးပေါင်းတပ်ဖွဲ့များက ထိုးစစ်ဆင်တိုက်ခိုက်နေကြောင်း သိရပြီး အသေးစိတ်သတင်းမရရှိသေးပေ။
ထို့အပြင် မြို့နယ်အတွင်း တိုက်ပွဲများဖြစ်ပွားနေ၍ ဖလမ်းမြို့အဝင်လမ်းများဖြစ်သော ကလေးမြို့ – ဖလမ်း ၊ ဟားခါး − ဖလမ်းလမ်းပိုင်းတို့ကို ဇန်နဝါရီ ၇ရက်ကစ၍ ချင်းကာကွယ်ရေးတပ်ဖွဲ့များက ဖြတ်သန်းခွင့် တားမြစ်ထားသည်။
ဖလမ်းမြို့အား လေကြောင်းတိုက်ခိုက်မှုတွင် ထိခိုက်ပျက်စီးမှု မသိရှိရသေးပေ။ စစ်ကောင်စီသည် ယနေ့ နံနက်ပိုင်းတွင် စစ်ကိုင်းတိုင်း၊ ခါမ်းပါိတ်မြို့၊ ရှမ်းပြည်နယ် မြောက်ပိုင်း၊ နောင်ချိုမြို့တို့ကို ဗုံးကြဲတိုက်ခိုက်ခဲ့သည်။နောင်ချိုမြို့အား တိုက်ခိုက်မှုတွင် အရပ်သားပြည်သူ ၁၀ဦးထက်မနည်းသေဆုံးခဲ့ကြောင်း သတင်းရရှိသည်။
