ဧပြီ ၂၃၊၂၀၂၅။ရှိန်း၊ဇော်ရမ်း/People’s Spring
စစ်ကိုင်းတိုင်း၊ဒီပဲယင်းမြို့နယ်၊တောင်ကျေးရွာကို စစ်ကောင်စီက ဒီနေ့(ဧပြီ ၂၃ရက်) မွန်းလွဲပိုင်းက လေကြောင်းတိုက်ခိုက်ခဲ့ရာ ကလေးငယ်တစ်ဦးအပါအဝင်ပြည်သူ ၅ ဦး သေဆုံးပြီး ၆ဦးထိခိုက်ဒဏ်ရာရရှိခဲ့တယ်လို့ ဒေသခံတွေက ပြောပါတယ်။
စစ်ကောင်စီက ဧပြီလကုန်အထိ အပစ်ရပ်တယ်လို့ကြေညာပြီးနောက်နေ့မှာပဲဗုံးကြဲခဲ့တာဖြစ်ပါတယ်။
ဒီပဲယင်းမြို့နယ် အရှေ့တောင်ခြမ်းက လက်လှုပ်တောင်ကျေးရွာကို ဒီနေ့ ၁၁နာရီ ၄၅မိနစ်အချိန်မှာ စစ်ကောင်စီက ဂျက်ဖိုက်တာနဲ့ ဗုံးကြဲခဲ့ပြီး စက်လက်တွေနဲ့ပါ ပစ်ခတ်ခဲ့တာလို့ သိရပါတယ်။
Public Service Announcement
ကျေးရွာအလည်ကို ဗုံးကျပေါက်ကွဲခဲ့ပြီး (၁၂)အရွယ်ကလေးအပါအဝင် အမျိုးသား၂ဦး ၊အမျိုးသမီး သုံးဦး စုစုပေါင်း ၅ဦး သေဆုံးပြီး ၆ဦး ထိခိုက်ဒဏ်ရာ ရခဲ့တယ်လို့သိရပါတယ်။
“ဘာတိုက်ပွဲမှ မရှိဘူးဗျ။ဘာသတင်းမှလည်းမထွက်ဘူး။ဒီအတိုင်းသူ့ဟာသူ အေး အေးချမ်းချမ်း တောင်သူလုပ်စား နေကြတာပါ”လို့ ရဲဘော် သုံးကျိပ်တပ်ဖွဲ့ခေါင်း ဆောင်ဗိုလ်လက်ဝါးက ပြောပါတယ်။
လက်ရှိအချိန်မှာ အဲဒီနေရာကို ရှင်းလင်းရေးလုပ် ဆောင်နေပြီး ဒဏ်ရာရသူတွေကို ဆေးရုံပို့ဆောင်ထားတယ်လို့ ဆိုပါတယ်။
“ဂျက်ဖိုက်တာနဲ့ ဗုံးကြဲသွားပြီး နောက်ပြီး ပါရာမိုတာလည်း ပျံနေတယ်။ နေ့ခင်းကြီး လာတိုက်တာရှင့်”လို့ ဒေသခံတစ်ဦးက ပြောပါတယ်။
စစ်ကောင်စီက ယခုဧပြီအတွင်းမှာ လေကြောင်းတိုက်ခိုက်မှု တွေဆက်တိုက်ပြုလုပ်နေပြီး လူအစုလိုက်အပြုံလိုက် သတ်ဖြတ်မှုတွေကို ဆက်တိုက်ကျူးလွန်နေပါတယ်။
ပြီးခဲ့တဲ့ တပတ်အတွင်း မန္တလေးတိုင်း၊သပိတ်ကျင်းမြို့နယ်မှာ စစ်ကောင်စီရဲ့ လေကြောင်းတိုက်ခိုက်မှု ကြောင့်ပြည်သူ ၅၀နီးပါး သေဆုံးထားပါတယ်။
