မေ ၂၆၊၂၀၂၅။ဇော်ရမ်း/People’s Spring
မေလနောက်ဆုံးရက်သတ္တပတ်အတွင်း ဘင်္ဂလားပင်လယ်အော်တွင် လေဖိအားနည်းရပ်ဝန်းဖြစ်နိုင်ပြီး မုန်တိုင်းငယ်အဆင့်သို့ အားကောင်းလာနိုင်ကြောင်း အမျိုးသားညီညွတ်ရေးအစိုးရ၊လူသားချင်းစာနာထောက်ထားရေးနှင့်ဘေးအန္တရာယ်ဆိုင်ရာစီမံခန့်ခွဲရေးဝန်ကြီးဌာန (MOHADM)က ထုတ်ပြန်သည်။
ယနေ့ (မေလ ၂၆ရက်)မှ ဇွန်လ ၁ရက်အထိ ရာသီဥတုခန့်မှန်းချက်၌ မုန်းတိုင်းငယ်ဖြစ်နိုင်ဖွယ်သတိပေးချက် ထုတ်ပြန်ခြင်းဖြစ်သည်။
မုန်တိုင်းငယ်၏ ပြင်းအားနှင့် ဝင်ရောက်မည့် လမ်းကြောင်းကို ဆက်လက်စောင့်ကြည့်ရန် လိုအပ်သည်ဟု အသိပေးထားသည်။
Public Service Announcement
ဒေသအများအပြား မိုးရွာနိုင်ပြီး အချို့ဒေသများတွင်နေရာကွက်၍ မိုးကြီးနိုင်သည်ဟု သတိပေးထားသည်။မုတ်သုံလေအားကောင်းနေပြီး လေပြင်းတိုက်ခတ်ခြင်းနှင့်အတူ လျှပ်စီးလက်ခြင်း၊ မိုးကြိုးပစ်ခြင်း ၊ နေရာကွက်၍ မိုးကြီးခြင်း၊မိုးသီးများ ကြွေကျခြင်း၊ လျှပ်တပြက်ရေကြီးခြင်း၊ မြေကျွံခြင်းနှင့် မြေပြိုခြင်း စသည့် ဘေးအန္တရာယ်များ ဖြစ်ပေါ်နိုင်ပါသဖြင့် ဂရုပြုကြရန် သတိပေးထားသည်။
ယခုရက်ပိုင်းတွင် ရှမ်းပြည်နယ်၊ စစ်ကိုင်းတိုင်းနှင့်မန္တလေးတိုင်းတို့မှ မြို့အချို့တွင် မိုးသည်းထန်စွာရွာသွန်းပြီး ရေကြီးနစ်မြုပ်မှုများဖြစ်ပွားနေသည်။
လတ်တလော ရာသီဥတုအခြေအနေကြောင့် ငလျင်ဘေးသင့်ဒေသများ၌ မြေကျွံ၊ မြေပြိုခြင်းနှင့် ယိုင်နဲ့နေသည့် အဆောက်အအုံများ ပြိုကျခြင်းများသတိပြုကြရန် MOHADMက ထုတ်ပြန်ထားသည်။
