ဇွန်-၂၁၊ ၂၀၂၅။ ရဲခေါင်/People’s Spring
(၁၅၀)နှစ်မြောက် ကရင်နီအမျိုးသားနေ့ အထိမ်းအမှတ်နှင့် လူသားချင်း စာနာထောက်ထားမှုအရ အကျဉ်းကျခံနေရသူ ၁၇၆ဦးကို ပြစ်ဒဏ်လျှော့ပေါ့ခွင့်နှင့် လွတ်ငြိမ်းခွင့်ပြုကြောင်း ကရင်နီပြည်ကြားကာလအုပ်ချုပ်ရေးကောင်စီ IEC က ထုတ်ပြန်သည်။
ယနေ့သည် လွန်ခဲ့သော ၁၈၇၅ ခုနှစ်က ဗမာဘုရင်ကိုယ်စားလှယ် ကင်းဝန်မင်းကြီးနှင့် ဗြိတိသျှ အစိုးရမစ်ရှင်အဖွဲ့ခေါင်းဆောင်း ဆာသောမတ်ဒေါက်ကလပ်ဖောဆစ်တို့အကြား အနောက် ကရင်နီနယ်အား သီးခြားလွတ်လပ်သော နယ်မြေအဖြစ်အသိအမှတ်ပြု သမိုင်းဝင်လက်မှတ်ရေးထိုးခဲ့သည်မှာ နှစ်ပေါင်း ၁၅၀ ပြည့်ဟု ဆိုသည်။
ထို့ကြောင့် ကရင်နီပြည်ကြားကာလ အစီအမံ အပိုဒ် (၇၅)၊ အပိုဒ်ခွဲ (ခ) အရ ၂၀၂၁ ခုနှစ် ဇွန်လ ၂၁ ရက်နေ့ မတိုင်မီ ကျူးလွန်ခဲ့သော ပြစ်မှုတစ်ခုခုနှင့် ဆက်စပ်ပြီး ပြစ်ဒဏ်ချမှတ်ခံခဲ့ရသူ အကျဉ်းထောင်၊ စခန်းအသီးသီးမှ အကျဉ်းသူ အကျဉ်းသား ၁၇၆ ဦးမှာ ပြစ်ဒဏ်လွတ် ငြိမ်းခွင့်နှင့် ပြစ်ဒဏ်လျှော့ပေါ့ခွင့်ရရှိခဲ့သည်။
Public Service Announcement
IEC ၏ လျှော့ပေါ့၊လွတ်ငြိမ်းစာရင်းအရ ပြစ်ဒဏ်လျှော့ပေါ့ခွင့် ၁၄၈ ဦးနှင့် ပြစ်ဒဏ်လွတ်ငြိမ်းခွင့် ၂၈ ဦး ဖြစ်သည်။
“လွတ်ငြိမ်းထဲမှာ အသေးစားခိုးမှုနဲ့ အသေးစားမူးယစ်ဆေးဝါးမှုတွေပါတယ်”ဟု IEC ၏ တွဲဖက်အတွင်းရေးမှူးဦးဗညားက လူထုနွေဦးသို့ပြောသည်။
ယမန်နှစ် ဇွန်လ ၂၁ ရက်နေ့က ကရင်နီအမျိုးသားနေ့တွင်လည်း အကျဥ်းသူ ၊အကျဥ်းသား စုစုပေါင်း ၁၁၇ ဦးကိုလည်း IEC က ပြစ်ဒဏ်လျှော့ပေါ့ခွင့်နှင့် လွတ်ငြိမ်းခွင့်ပေးခဲ့သည်။
ထို့အပြင် ကရင်နီတပ်ပေါင်းစု၏ စစ်ဆင်ရေးများအတွင်း ကယ်ထုတ်ခဲ့ရသည့် Non-CDM ဝန်ထမ်းများနှင့် ၎င်းတို့မိသားစုဝင် ၁၀၀ ကျော်ကို IEC၏ ဆုံးဖြတ်ချက်ဖြင့် ၂၀၂၃ ခုနှစ်က ပြန်လွှတ်ပေးခဲ့သည်။
