ဇွန် – ၂၃ ၊၂၀၂၅ ၊ ဆိုင်းမင်း/People’s Spring
မန္တလေးတိုင်း၊ မတ္တရာမြို့နယ်နဲ့ စဉ့်ကူးမြို့နယ်အစပ် ယက္ကန်းစင်တောင်ကျေးရွာအနီးရှိ မေတ္တာ နန္ဒ ဆေးရုံ (ယက်ကန်းစင် )ဆေးရုံကို မနေ့ ညနက်ပိုင်းက ဗုံးကြဲခံရပြီး မီးနေသည် အမျိုးသမီးတစ်ဦးသေဆုံးခဲ့တယ်လို့ ပြင်ဦးလွင်ခရိုင် ပြည်သူ့ကာကွယ်ရေးအဖွဲ့ (ပ.က. ဖ) က သတင်းထုတ်ပြန်ပါတယ်။
မနေ့ ဇွန်လ ၂၂ ရက် ည ၁၁ နာရီ ၅ မိနစ်အချိန်မှာ ဆေးရုံကို နှစ်ကြိမ် တိုင်တိုင်ဗုံးကြဲခဲ့တာလို့သိရပါတယ်။
အဲဒီဗုံးကြဲတိုက်ခိုက်မှုကြောင့် ဆေးရုံမှာ ကလေးမွေးဖွားပြီးစ အသက် ၃၀ အရွယ် မီးနေသည် အမျိုးသမီး သေဆုံးခဲ့ပြီး ၃၅ နှစ်အရွယ်အမျိုးသမီးတစ်ဦးလည်း ပြင်းထန် ဒဏ်ရာရခဲ့တယ်လို့ ပြင်ဦးလွင် ပ.က.ဖက ဆိုပါတယ်။
Public Service Announcement
သေဆုံးသွားတဲ့ မီးနေသည် အမျိုးသမီးဟာ မတ္တရာမြို့နယ် ဆည်တော်လမ်းခွဲ ကျေးရွာက ဖြစ်ပါတယ်။
စစ်ကောင်စီလေတပ်ရဲ့ ဗုံးကြဲတိုက်ခိုက်မှုကြောင့် ဆေးရုံမှာ ဆေးကုသဖို့ရောက်နေတဲ့ ပြည်သူ ၁၁ ဦး လည်း ထိခိုက်ဒဏ်ရာရသလို သားဖွားမီးယပ် အဆောင်အပါအဝင် အဆောက်အဦး သုံးလုံး ပျက်စီးသွားတယ်လို့ ပြင်ဦးလွင် ပ.က.ဖ က အသိပေးထားပါတယ်။
အခုလို ဗုံးကြဲခံရတဲ့ မေတ္တာ နန္ဒ ဆေးရုံ (ယက်ကန်းစင် ) ဟာ မတ္တရာနဲ့ စဉ့်ကူးမြို့နယ်အစပ်မှာ တည်ရှိပြီး အနီးဝန်းကျင် ကျေးရွာတွေက ပြည်သူတွေအားထားရတဲ့ ဆေးရုံတစ်ခုလည်းဖြစ်ပါတယ်။
