စဉ့်ကူးမြို့နယ်၊လက်ပန်လှရွာ ကိုစစ်​ကောင်စီ ဗထပ်မံဗုံးကြဲ အမျိုးသမီးတဦး သေဆုံး

ဇွန်၂၉၊၂၀၂၅၊မေ၊ထားမြတ်/People Spring

မန္တလေးတိုင်း၊စဉ့်ကူးမြို့နယ်၊လက်ပန်လှကျေးရွာကို စစ်ကောင်စီတပ်ကလေကြောင်းမှ ဗုံးကြဲခဲ့တာကြောင့် အမျိုးသမီးတဦး သေဆုံးကာ နေအိမ်‌၃လုံးပျက်ဆီးခဲ့တယ်လို့ ပြင်ဦးလွင်ခရိုင်ပကဖ သတင်းတာဝန်ခံဆီကသိရပါတယ်။

ဇွန်လ၂၉ရက်နေ့၊ မနက်၁၁နာရီ၅၀ မိနစ်မှာ လက်ပန်လှ ကျေးရွာ၊ပြည်စိုးအောင် ရပ်ကွက်ကို စစ်​ကောင်စီ တိုက်​လေယာဥ်က ပေါင်၃၀၀ ဗုံးကြဲခဲ့တာလို့ သူက​ပြောပါတယ် ။

“အသက်‌‌၄၀ အရွယ်အမျိုးသမီး တဦး သေသွားတယ်။အရိုးရော၊အသားရော တစဆီဖြစ်သွားတယ်”လို့ ပြင်ဦးလွင်ခရိုင်ပကဖသတင်းတာဝန်ခံက ပြောပါတယ်။ဒါ့အပြင် နေအိမ်၃လုံး လည်းပျက်စီးခဲ့ပါတယ်။

Public Service Announcement

စစ်ကောင်စီတပ်က လက်ပန်လှ ကျေးရွာက ပြည်စိုး အောင် ရပ်ကွက်ကို မကြာခဏ လေကြောင်းက​နေ ဗုံးကြဲခဲ့တာပါ။

“ဘုန်းကြီးကျောင်း၊စာသင်ကျောင်း၊စစ်ဘေးရှောင်စခန်း၊ ဆေးရုံ အဲဒီလို မကြဲသင့်တဲ့နေရာတွေကို အများကြီး ကြဲပြီး လေကြောင်း တိုက်ခိုက်မှုတွေလုပ်နေတယ်”လို့ ပြင်ဦးလွင်ခရိုင်ပဖက တာဝန်ရှိသူက ပြောပါတယ် ။

စစ်ကောင်စီကနိုင်ငံတကာအမြင်ကောင်ဖို့ ငြိမ်းချမ်းရေးဖိုရမ်ကဲ့သို့သော ဟန်ပြလုပ်ရပ်​တွေကို လုပ်ပြီး တဖက်မှာပြည်သူ​တွေကို လေယာဉ်နဲ့ဗုံးကြဲ တိုက်ခိုက်သတ်ဖြတ်နေတယ်လို့ သူကဆက်​ပြောတယ် ။

ပြီးခဲ့တဲ့မတ်လ ၁၄ ရက်နေ့ကလည်း လက်ပန်လှ ကျေးရွာဈေးထဲကို စစ်တပ် တိုက်​လေယာဥ်​တွေက ဖျက်အားပြင်းဗုံးကြဲခဲ့တာ​ကြောင့် ပြည်သူ ၂၇ ဦး သေဆုံးပြီး ၃၈ဦး ဒဏ်ရာရရှိခဲ့ပါသေးတယ်။

စစ်တပ်က တော်လှန်ရေးတပ်တွေ သိမ်းထားတဲ့ စဉ့်ကူး၊မတ္တရာနဲ့သပိတ်ကျင်းမြို့နယ်တို့ကို လေကြောင်းတိုက်ခိုက်မှု တွေမကြာခဏ ပြုလုပ် ခဲ့ပြီး ၂၀၂၅ ခုနှစ်ထဲမှာပဲ လေကြောင်းတိုက်ခိုက်မှု အကြိမ်ဆယ်နဲ့ချီပြုလုပ်ခဲ့ပါတယ်။ဗုံးကြဲမှု​ကြောင့် ဒေသခံပြည်သူရာနဲ့ချီပြီး ​သေဆုံး ဒဏ်ရာ ရခဲ့ပါတယ် ။

ပြည်သူ့ကာကွယ်ရေးတပ်မတော်(PDF) ဗျူဟာ (၃၃) စစ်ဆင်ရေးမှူး ရဲဘော်စောဒါးကိုက “(စစ်​ကောင်စီက) ငြိမ်းချမ်းရေးဆွေးနွေးနေတယ်ဆိုပြီး လုပ်နေတယ်။တဖက်မှာ ဗုံးကြဲနေတယ်။တဖက်မှာ ရွာတွေဝင် မီးရှို့တယ်။တဖက်မှာလူထုတွေကို ညှင်းပန်းသတ်ဖြတ်နေပြီး ငြိမ်းချမ်းရေးဆိုတဲ့ဟာကအဲဒါက မဖြစ်ဘူး”လို့​ပြောပါတယ်။

စစ်ကောင်စီဟာ ဇွန်လ ၂၅ရက်က​နေ ၂၇ရက်အထိ နေပြည်တော်မှာ စစ်တပ်ကို မတိုက်တဲ့​လက်နက်ကိုင်အဖွဲ့​တွေ ၊​ရွေး​ကောက်ပွဲရှုံးပါတီ​တွေ စစ်တပ်​ထောက်ခံသူ​တွေနဲ့ ငြိမ်းချမ်းရေးဖိုရမ်ဆိုပြီး လုပ်ခဲ့ပါတယ်။ ​တဖက်မှာ​တော့​ဆွေး​နွေးပွဲ ကျင်းပ​နေတုန်းမှာပဲ ​ကျောက်မဲ ၊​နောင်ချို ၊မိုးကုတ် ၊ကရင်နီပြည် စတဲ့ ​ဒေသအနှံကို ပြည်သူ​တွေကိုပါပစ်မှတ်ထားဗုံးကြဲခဲ့ပါတယ် ။