ဇူလိုင် – ၁၁ ၊၂၀၂၅ ၊ နိုင်ပကောင်း/People’s Spring
အာဏာသိမ်းစစ်ကောင်စီ ခေါင်းဆောင် ဟာ ပြည်သူအကျိုးအတွက် လုပ်ကိုင်ဆောင်ရွက်ပေးတာမရှိဘဲ စစ်ခေါင်းဆောင်ကြောင့် လူထုမျက်ရည်ကျရတယ်လို့ စစ်တပ်လက်အောက်ခံ ကရင်နယ်ခြားစောင့်တပ် ( BGF) ရဲ့ ခေါင်းဆောင်ပိုင်း ဗိုလ်ချုပ်စောချစ်သူက ဝေဖန်လိုက်ပါတယ်။
ကရင့် နယ််ခြားစောင့်တပ်(BGF) ရဲ့ အထွေထွေအတွင်းရေးမှုးတာဝန်ယူထားသူ ဗိုလ်ချုပ်စောချစ်သူက ကရင်သတင်းရင်းမြစ်တစ်ခုဖြစ်တဲ့ KPTV News မှာ ဇူလိုင် ၈ ရက်က ကရင်ဘာသာစကား နဲ့ ဖြေကြားထားတဲ့ ရုပ်သံ မှာ စစ်ကောင်စီခေါင်းဆောင် ကို ရည်ညွှန်ပြီးဝေဖန်ပြောကြားလိုက်တာပါ။
“ပြောပြချင်တယ်၊ အခုက ပြည်သူလူထုမျက်ရည်ကျရတာ အများကြီး၊ ငါတော့ မှန်မှန်ပြောမယ် တိုင်းပြည်အကြီးအကဲကို ငါတော်တော်အတိုက်အခံလုပ်တယ်၊ ငါပြည်သူလူထုဘက်နေပြီးတော့မှ အတိုက်အခံလုပ်တာ၊ ပြည်သူအတွက်ဘာမှမလုပ်ဘူး ၊ပြည်သူတွေ မျက်ရည်အများကြီးကျရတာ ၊ ငါလည်း စိတ်မကောင်းဘူး၊ တွေ့လို့လည်းမကောင်းဘူး” လို့ ဗိုလ်ချုပ်စောချစ်သူက ပြောပါတယ်။
Public Service Announcement
အခုလို ဝေဖန်မှုဟာဆိုရင် ဗိုလ်ချုပ်စောချစ်သူ နဲ့သားသမီးတွေ ပိုင်ဆိုင်တဲ့ ချစ်လင်းမြိုင်တိုယိုတာကုမ္ပဏီကို နိုင်ငံခြားပို့ကုန်ဝင်ငွေ ပြန်မအပ်လို့ အမည်ပျက်ကုမ္ပဏီ စာရင်းသွင်းခံရပြီး ရက်သတ္တပတ်အကြာမှာ ထွက်လာတာလည်းဖြစ်ပါတယ်။
တိုင်းပြည်မှာ စစ်ပွဲတွေ ရပ်တန့်ဖို့အတွက် စစ်ကောင်စီခေါင်းဆောင်က ရှေ့ဆောင်လမ်းပြ လုပ်ဆောင်ရမှာ ဖြစ်တယ်လို့လည်း ဗိုလ်ချုပ်စောချစ်သူက ပြောပါတယ်။
သူကတော့ လူထုဘက်က ရပ်တည်ပြီး စစ်ခေါင်ဆောင်ကိုအတိုက်အခံ လုပ်ဆောင်နေရတယ်လို့ ဗိုလ်ချုပ်စောချစ်သူက ဆိုပါတယ်။
ဒါအပြင် ကရင်လက်နက်ကိုင်အဖွဲ့အစည်းတွေဖြစ်တဲ့ ကရင်အမျိုးသားအစည်းအရုံး(KNU)၊ ကရင်ငြိမ်းချမ်းရေးကောင်စီ(KNU/KNLA PC)၊ ကရင်နယ်ခြားစောင့်တပ်(BGF)၊ ဒီမိုကရေစီအကျိုးပြုကရင်တပ်မတော်(DKBA)အပါအဝင် ကရင်လက်နက်ကိုင်အဖွဲ့တွေအားလုံး စည်းလုံးညီညွှတ်ကြဖို့ကိုလည်း ဗိုလ်ချုပ်စောချစ်သူက တိုက်တွန်းပါတယ်။
“ကိုယ်တွေညီညွတ်ရင် ကိုယ့်အတွက်အားပဲ” လို့ သူကဆိုပါတယ်။
BGF ဟာ သူတို့ ထိန်းချုပ်ထားတဲ့ မြဝတီမြို့နယ် ၊ ရွှေကုက္ကိုလ်မြို့သစ်မှာ ကျားဖြန့် အွန်လိုင်းငွေလိမ်ဂိုဏ်းတွေ လက်ခံထားတယ်လို့ စွပ်စွဲခံထားရပါတယ်။
BGF ခေါင်းဆောင်ပိုင်း ဗိုလ်ချုပ်စောချစ်သူကတော့ ကျားဖြန့်နဲ့ ပတ်သက်ဆက်နွယ်ဆိုတဲ့ စွပ်စွဲချက်တွေကိုလူသိရှင်ကြား ငြင်းဆိုထားပါတယ်။
