ဇူလိုင် – ၂၇ ၊၂၀၂၅ ၊နိုင်ပကောင်း/People’s Spring
ကရင်ပြည်နယ်၊လှိုင်းဘွဲမြို့နယ်၊မြိုင်ကြီးငူအထူးဒေသမှာ ဒီနေ့ (ဇူလိုင် ၂၇) မနက်ပိုင်းက ကျင်းပပြုလုပ်ခဲ့တဲ့ ငြိမ်းချမ်းရေးဆုတောင်းပွဲမှာ ကရင်အမျိုးသားအစည်းအရုံး( KNU)လက်အောက်ခံ ကရင်အမျိုးသားလွတ်မြောက်ရေးတပ်မတော် ( KNLA) ရဲ့ စစ်ဦးစီးချုပ် ဗိုလ်ချုပ်ကြီးစောဂျော်နီအပါအဝင်KNLAဖားအံခရိုင် တပ်မဟာ(၇)ရဲ့ ထိပ်ပိုင်းခေါင်းဆောင်တွေ ပါဝင်တက်ရောက်ခဲ့တယ်လို့ ဆုတောင်းပွဲမှာတက်ရောက်သူတွေရဲ့ ဖော်ပြချက်အရ သိရပါတယ်။
ကရင်ပြည်နယ်ငြိမ်းချမ်းရေးဆုတောင်းပွဲဆိုတဲ့ခေါင်းစဉ်နဲ့ကရင်လက်နက် ကိုင်အဖွဲ့လေး ဖွဲ့ရဲ့ နာယကဖြစ်တဲ့ မဲဆမိတ်ဆရာတော်က စီစဉ်ဖိတ်ကြားခဲ့တာဖြစ်ပြီး ဒီဆုတောင်းပွဲမှာတော့ ရဟန်းသံဃာတွေ၊ ပြည်သူတွေလူထုတွေ၊ ကရင်နိုင်ငံရေးပါတီဝင်တွေ၊ ကရင်လက်နက်ကိုင်အဖွဲ့လေးဖွဲ့ရဲ့ တာဝန် ရှိသူတွေ တက်ရောက်ခဲ့ကြပါတယ်။
ငြိမ်းချမ်းရေးဆုတောင်းပွဲမှာKNUဘက်ကကရင်အမျိုးသားလွတ်မြောက် ရေးတပ်မတော်(KNLA)စစ်ဦးစီးချုပ် ဗိုလ်ချုပ်ကြီးစောဂျော်နီ၊ KNU ဖားအံခရိုင်ဥက္ကဋ္ဌ ပဒိုစောအောင်မော်အေး၊ KNLA တပ်မဟာ(၇) တပ်မဟာမှူး ဗိုလ်မှူးချုပ်စောဒီးကွယ် တက်ရောက်ခဲ့ပါတယ်။
Public Service Announcement
ကရင်နယ်ခြားစောင့်တပ်(BGF)ဘက်ကလည်း ဥက္ကဋ္ဌ ဗိုလ်ချုပ်ထွန်းလှိုင်၊ အထွေထွေအတွင်းရေးမှူး ဗိုလ်ချုပ်စောချစ်သူအပါအဝင် အခြားထိပ်ပိုင်းခေါင်းဆောင်တွေ၊စစ်ဒေသမှူးတွေတက်ရောက်ခဲ့ကြပြီးဒီမိုကရေစီအကျိုး ပြုကရင်တပ်မတော်(DKBA)နဲ့ ကရင်ငြိမ်းချမ်းရေးကောင်စီဘက်က တာဝန်ရှိသူတွေ တက်ရောက်ခဲ့တယ်လို့ သိရပါတယ်။
ရေရှည်တည်တံ့ခိုင်မြဲတဲ့ ငြိမ်းချမ်းရေးကိုဦးတည်ပြီး ငြိမ်းချမ်းရေးရရှိနိုင်ဖို့အတွက် ငြိမ်းချမ်းရေးဆုတောင်းပွဲကို ကျင်းပပြုလုပ်ခဲ့တာဖြစ်တယ်လို့ ကရင်လက်နက်ကိုင်အဖွဲ့လေးဖွဲ့ရဲ့ နာယကဖြစ်တဲ့ မဲဆမိတ်ဆရာတော် ဖိတ်ကြားတဲ့ ဖိတ်ကြားလွှာမှာ ဖော်ပြထားပါတယ်။
ပြီးခဲ့တဲ့ရက်သတ္တပတ် ဇူလိုင် ၂၀ ရက်နေ့က လှိုင်းဘွဲမြို့နယ်၊ မြိုင်ကြီးငူအထူးဒေသမှာ ကျင်းပပြုလုပ်သွားခဲ့တဲ့ ငြိမ်းချမ်းရေး၊ ဒေသတည်ငြိမ်ရေးနဲ့ စည်းလုံးညီညွတ်ရေးတွေ့ဆုံပွဲမှာ ကရင်နယ်ခြားစောင့်တပ်(BGF) က ကရင်အမျိုးသားတပ်မတော်(KNA)အဖြစ် ပြောင်းလဲဖွဲ့စည်းသွားဖို့ တင်ပြဆွေးနွေးသွားခဲ့ပြီးအဆိုပါဆွေးနွေးပွဲကနေတဆင့်အခုလို ငြိမ်းချမ်းရေးဆုတောင်းပွဲကျင်းပဖို့ ဆုံးဖြတ်ခဲ့တာဖြစ်ပါတယ်။
