သြဂုတ် – ၁၂ ၊၂၀၂၅ ၊ ဆိုင်းမင်း/People’s Spring
ရှမ်းပြည်နယ်မြောက်ပိုင်း ၊ ကျောက်မဲမြို့မှာ အသက် ငါးနှစ်အရွယ် မိန်းကလေးငယ်ကို အိမ်နီးချင်း အမျိုးသားက သတ်ဖြတ်ပြီး လမ်းဘေးမှာ စွန့်ပစ်ထားတဲ့အမှု ဖြစ်ပွားခဲ့တယ်လို့ ရုပ်အလောင်းသွားရောက်သယ်ယူခဲ့တဲ့ ကူညီရေးအဖွဲ့ဝင်ထံကသိရပါတယ်။
အဲဒီအမှုဟာ ကျောက်မဲမြို့ ၊ ရပ်ကွက် ၈ ၊ အင်ကြင်းတောင်ရပ်ကွက်မှာ ပြီးခဲ့တဲ့ရက်ပိုင်း သြဂုတ်လ ၉ ညနေပိုင်းက ဖြစ်ပွားခဲ့တာပါ။
အိမ်နီးချင်းဖြစ်သူအသက် ၃၂ နှစ်အရွယ် အမျိုးသားက ကလေးကို မုန့်ကျွေးမယ်ဆိုပြီး ခေါ်ဆောင်သွားပြီးနောက်သတ်ဖြတ်ခဲ့တာလို့သိရပါတယ်။
Public Service Announcement
“ကလေးမိဘနဲ့ သတ်တဲ့သူကလည်း အသိတွေပါပဲ”လို့ ကလေးရဲ့ ရုပ်အလောင်းသွားရောက်သယ်ယူခဲ့တဲ့ ကူညီရေးအဖွဲ့ဝင်က ပြောပါတယ်။
ကလေးငယ်ရဲ့ ဦးခေါင်း နဲ့ နောက်ကျောဘက်မှာ ဒဏ်ရာ တွေရထားတယ်လို့သိရပါတယ်။
သတ်ဖြတ်ပြီးရှောင်ပြေးနေတဲ့အမျိုးသားကိုလည်း ဖမ်းမိထားတယ်လို့သိရပါတယ်။ ကျောက်မဲမြို့ဟာ တအာင်းတပ်မတော် (TNLA) သိမ်းယူထိန်းချုပ်ထားတဲ့မြို့လည်းဖြစ်ပါတယ်။
