ဩဂုတ်-၂၃၊၂၀၂၅။ရောင်နီ/People’s Spring
နိုင်ငံရေးအကျဉ်းသားဟောင်း စာရေးဆရာနောင်ကျော်(ခ) ဌေးသိန်း ရဲ့နာရေးကို ဩဂုတ် ၂၃ နေ့လည်က ရေဝေးသုဿန်မှာပြုလုပ်ခဲ့ပါတယ်။
စာရေးဆရာတစ်ဦး ဖြစ်သလို နိုင်ငံရေး အကျဉ်းသားဟောင်းဖြစ်တာကြောင့် စာပေနယ် နဲ့ နိုင်ငံရေးနယ်ပယ်က မိတ်ဆွေ တွေလိုက်ပါပို့ဆောင်ပေးခဲ့ကြပါတယ်။
ဆရာနောင်ကျော်က အနေအထိုင်အေးဆေးသူဖြစ်သလို ထွက်ခွာသွားချိန်မှာလည်း တိုးတိုးတိတ်တိတ်ထွက်ခွာသွားခဲ့တယ်လို့ ရင်းနှီးတဲ့ မိတ်ဆွေတွေကပြောပါတယ်။
Public Service Announcement
ဆရာနောင်ကျော်က ဩဂုတ် ၂၁ ရက်နံနက်က ဒေါပုံမြို့နယ်က နေအိမ်မှာပဲကွယ်လွန်ခဲ့တာဖြစ်ပြီး ကွယ်လွန်ချိန်မှာ ၆၈ နှစ်ရှိပြီဖြစ်ပါတယ်။
ပြီးခဲ့တဲ့ ဇူလိုင် ၁၁ ရက်က ကွယ်လွန်သွားတဲ့ စာရေးဆရာမောင်သာချိုနဲ့ ဆရာနောင်ကျော်က အရင်းနှီးဆုံးမိတ်ဆွေတွေဖြစ်ပြီး ကွယ်လွန်ချိန်ကလည်း တစ်လကျော်သာကွာခြားခဲ့တာပါ။
ဆရာနောင်ကျော်က ၁၉၈၈ အရေးတော်ပုံကာလမှာ အထွေထွေသပိတ်ကော်မတီ နဲ့ တက္ကသိုလ်ဆရာများသမဂ္ဂတို့မှာ ပါဝင်လှုပ်ရှားခဲ့တာကြောင့် ၁၉၈၉ မှာ ဖမ်းဆီးခံခဲ့ရပြီး ပုဒ်မ ၅(ည) ၊ ၁၇(၂) တို့နဲ့ ထောင်ဒဏ်နှစ်နှစ်ဆယ် ပြစ်ဒဏ်ချမှတ်ခံခဲ့ရပါတယ်။
ထောင်ထဲမှာ ၁၄ နှစ်ခန့် နေခဲ့ရပြီး ၂၀၀၃ ဧပြီလကုန်မှာ မန္တလေးအကျဉ်းထောင်ကနေ ပြန်လည်လွတ်မြောက်ခဲ့တာဖြစ်ပါတယ်။
ဆရာနောင်ကျော်က ခိုင်မျိုးဇော် ကလောင်နဲ့လည်းစာတွေရေးသားခဲ့ပြီး ဆောင်းပါး၊ အက်ဆေး ၊ ဝတ္ထုတိုတွေအပါအဝင် လုံးချင်းစာအုပ် ၁၇ အုပ် အထိရေးသားထုတ်ဝေခဲ့ပါတယ်။
