နောင်ပိန်ရွာအနီးမှာ တိုက်ပွဲ​တွေပြင်းထန်

■စစ်တပ်စစ်​ကြောင်း​တွေကို TNLA တပ်​တွေကပိတ်ဆို့တိုက်ခိုက်​နေလို့ စစ်တပ်က​​ပြည်သူ​တွေကိုရွာထဲကထွက်ခွင့်မ​ပေးပဲ လူသားဒိုင်းလုပ်​နေတယ်လို့​ဒေသခံအချို့​ပြော

ဩဂုတ်-၂၄၊၂၀၂၅။​နေ့သစ်/People’s Spring

​ကျောက်မဲမြို့နယ်အစပ်က နောင်ပိန်ကျေးရွာမှာ တိုက်ပွဲတွေပြင်းထန်နေပြီး စစ်တပ်က အင်အားအများအပြားနဲ့ထိုးစစ်ဆင်လာတဲ့အတွက် TNLA က ခုခံ​စစ်နဲ့တိုက်ခိုက်​နေပြီးတိုက်ပွဲ​တွေပြင်းထန်​​နေတယ်လို့တအာင်းတပ်မတော် (TNLA) ရဲ့ပြောရေးဆိုခွင့်ရှိသူလွေးယေဦးက လူထုနွေဦးကိုပြောပါတယ်။

“နောင်ပိန်ကျေးရွာဘက်မှာပဲ တိုက်ပွဲတွေ ပြင်းထန်နေတာဖြစ်တယ်။လောလောဆယ်မှာတော့စစ်ကောင်စီသည်အင်အားအလုံးအရင်းနဲ့ ကျွန်မတို့ထိန်းချုပ်တဲ့ ကျောက်မဲ မြို့ကို ထိုးစစ်ဆင်တိုက်ခိုက်တာမျိုးတွေရှိပါတယ်။ လောလောဆယ်မှာတော့ ကျွန်မတို့ကတော့ ခုခံကာကွယ်စစ်အနေနဲ့ ခုခံကာကွယ်ဆောင်ရွက်နေတာဖြစ်ပါတယ်။လောလောဆယ်မှာတော့ မြို့တွေကိုထိန်းချုပ်နိုင်ဆဲအခြေအနေေမျိုးဖြစ်တယ်”လို့ လွေးယေဦးက​ပြောပါတယ် ။

Public Service Announcement

ဩဂုတ်၂၃ရက်မှာလည်းကျောက်မဲမြို့နယ်အစပ်က နောင်ပိန်ကျေးရွာဘုန်းကြီးကျောင်းအနားမှာ တိုက်ပွဲတွေပြင်းထန်ခဲ့တယ်လို့ TNLAက ပြောပါတယ်။ဒါ့အပြင် လေကြောင်းတိုက်ခိုက်မှုတွေကိုလည်း အပြင်းအထန်ပြုလုပ်နေတယ်လို့ ဆိုပါတယ်။

” စစ်ကောင်စီသည် အထူးသဖြင့် ကျောက်မဲ၊ မိုးကုတ်လိုမျိုးဒေသမှာဆိုရင်တော့ ဗုံးတွေမကြာခဏဗုံးကြဲတိုက်ခိုက်တာမျိုးတွေ ရှိတယ်။ဗုံးကြဲတိုက်ခိုက်မှုကြောင့် အရပ်သားတွေ အစုလိုက်၊အပြုံလိုက် သေကြေပျက်စီးတာမျိုးတွေရှိတယ်။ပြီးတော့ နေအိမ်‌တွေကလည်း ပျက်စီးတာမျိုးတွေရှိတယ်”လို့ လွေးယေဦးက ပြောပါတယ်။

စစ်ကောင်စီဟာအရပ်သားပြည်သူတွေကိုရည်ရွယ်ချက်ရှိရှိပစ်မှတ်ထားတိုက်ခိုက်နေတာကြောင့် လူထုတွေအနေနဲ့စစ်ကောင်စီရဲ့ဗုံးကြဲတိုက်ခိုက်မှုကို ရှောင်ရှားနိုင်ဖို့ စစ်ရေးသတိအမြဲရှိဖို့ လိုအပ်တယ်လို့ TNLAက ပြောပါတယ်။

နောင်ချိုမြို့ကိုသိမ်းပိုက်ပြီးနောက် စစ်တပ်က ပြီးခဲ့တဲ့ ဩဂုတ် ၁၉ရက် နေ့လည်ပိုင်းကစပြီး စစ်ကောင်စီရဲ့အမှတ်(၁၁)ခြေမြန်တပ်မဌာနချုပ်က ဦးဆောင်တဲ့ အင်အား ၇၀၀လောက်ပါတဲ့ စစ်ကြောင်းနဲ့ ​ကျောက်မဲမြို့နယ်အစပ်က နောင်ပိန်ရွာနားမှာစတင်စစ်ကြောင်းထိုးခဲ့တာပါ။ ဒါအပြင်နောင်ချိုနဲ့ ကျောက်မဲမြို့နယ်အစပ်ကနောင်ပိန်ကျေးရွာတောင်ဘက်နားက ထန်းတပင်ရွာနားမှာ တိုက်ပွဲတွေပြင်းထန်နေတယ်လို့ ဆိုပါတယ်။

သြဂုတ်၂၀ရက်​နေ့မှာစစ်တပ်က နောင်ပိန်ရွာကိုလေကြောင်းကနေပေါင်၅၀၀ ဗုံးကြဲလို့ ကလေးငယ်တွေအပါအဝင် အရပ်သား၁၀ဦး ထက်မနည်းသေဆုံးခဲ့ပြီး ၃၀ကျော် ဒဏ်ရာရခဲ့ပါတယ်။စစ်ကောင်စီတပ်ဟာ နောင်ချိုမြို့ကိုပြန်ရပြီးနောက် မြို့မြောက်မှာရှိတဲ့ မန္တလေးတိုင်းက မိုးကုတ်မြို့ဆီကို စစ်ကြောင်းထိုးနေပါတယ်။

နောင်ပိန်တိုက်ပွဲမှာ TNLA တပ်ဖွဲ့ဝင်တွေက စစ်တပ်စစ်​ကြောင်းတွေကို ဝိုင်းပတ်ပိတ်ဆို့တိုက်ခိုက်​နေလို့ဆိုပြီး ဒေသခံတွေကို စစ်တပ်က ရွာတွေကနေ ထွက်ခွင့်မပေးဘဲ လူသားဒိုင်းလုပ်​နေတယ်လို့​ဒေသခံအချို့က​ပြောပါတယ် ။ ဒဏ်ရာရထားတဲ့​ဒေသခံပြည်သူ​တွေကို လာခေါ်တဲ့ လူမှုကူညီရေးအဖွဲ့ကားတွေရှိရာဘက်ကိုပါ စစ်တပ်က သေနတ်နဲ့ ပစ်ခတ်နေတယ်လို့ ​ဒေသခံအချို့က​ပြောတယ်။

ဒါ​ကြောင့်လူမှုရေးအဖွဲ့အချို့ဟာသူတို့ရဲ့ကားတွေကို ရွာနားမှာထားခဲ့ရပြီး ဘေးလွတ်ရာ တိမ်းရှောင်ခဲ့ရတယ်လို့ သြဂုတ်လ၂၄ရက်အခြေအနေကို နောင်ပိန်ဒေသခံတဦးကပြောပါတယ်။ ဒါအပြင် စစ်တပ်က လေကြောင်းကနေဗုံးထပ်ကြဲခဲ့သလို တိုက်ပွဲဆက်လက်ပြင်းထန်နေတယ်လို့​ဒေသခံအချို့က​ပြောပါတယ်။