■တနိုင်ငံလုံးရှိရင်းမြစ်စိတ်ကြိုက်စီမံပြီး နိုင်ငံတကာပံ့ပိုးမှုရထားသည့် အာဏာသိမ်းစစ်တပ်၏ ထိုးစစ်ကိုမည်သည့်နိုင်ငံထံမှ အကူအညီမရဘဲ ရက်ပေါင်း ၅၀၀ ကျော်ပိတ်ဆို့နိုင်ခဲ့ဟု အသိပေး
■KNU ၏ကော်သူလေးအစိုးရထူထောင်ရေးစီမံချက်ကိုအပြီးတိုင်ရိုက်ချိုးဖျက်ဆီးနိုင်ခဲ့ဟုစစ်ကောင်စီကြုံးဝါး
စက်တင်ဘာ ၇၊ ၂၀၂၅။ ထားမြတ်/People’s Spring
အာဏာသိမ်းစစ်ကောင်စီ၏ နိုင်ငံတော်အဆင့် စစ်ဆင်ရေးကိုမည်သည့် နိုင်ငံ၏ အကူအညီမည်သည့်အခါမှ မရရှိဘဲ ရက်ပေါင်း ၅၀၀ ကျော်ဟန့်တားနိုင်ခဲ့ကြောင်းနှင့် အာရှလမ်းတိုက်ပွဲ၌ ပါဝင်ဆင်နွှဲသူအားလုံးကို ဂုဏ်ပြုကြောင်း ကရင်အမျိုးသားလွတ်မြောက်ရေးတပ်မတော်(KNLA) ဗဟို ဌာနချုပ်က ယနေ့ စက်တင်ဘာ ၇ရက်တွင် ထုတ်ပြန်သည်။
Public Service Announcement
KNU/KNLA၊ PDF မဟာမိတ်ပူးပေါင်းတပ်များက စစ်ကောင်စီ၏ သင်္ဃန်းညီနောင် အခြေစိုက် တပ်ရင်းဌာနချုပ်များ သိမ်းပိုက်ပြီးနောက် စစ်ကောင်စီက ၂၀၂၄ ဧပြီတွင် အောင်ဇေယျ စစ်ဆင်ရေး စတင်ခဲ့ခြင်းဖြစ်သည်။
အဆိုပါထိုးစစ်ကြောင့် ကော့ကရိတ်မြို့နှင့်အနီးပတ်ဝန်းကျင်တွင်တိုက်ပွဲဖြစ်ပွားခဲ့ရာ ဧပြီ ၂၀ရက်တွင် တောနော်ရေတံခွန်သို့ ရောက်ရှိလာခဲ့ပြီး သံချပ်ကာကားတန်းနှင့်အတူနာရီပိုင်းအတွင်းမြဝတီအရောက်ချီတက်ရန်ပြင်ဆင်ခဲ့သော်လည်း KNLA ဦးဆောင်သောအဖွဲ့က ယင်းနေရာသို့ အားဖြည့် ခုခံခဲ့ရာ ၂၀၂၅ စက်တင်ဘာ ၅ရက်နေ့အထိ ရက်ပေါင်း ၅၀၃ ရက်ကြာ အောင်ဇေယျစစ်ဆင်ရေးအား ဟန့်တားနိုင်ခဲ့ကြောင်း ရှင်းပြသည်။
” ကရင်အမျိုးသားအစည်းအရုံးကတစ်လျောက်လုံးကျင့်သုံးလာသည့်စစ်နည်းဗျူဟာမှာခံစစ်ရှင်ပျောက် ကြားဖြစ်တယ်။သို့သော်၂ဝ၂၄ခုနှစ်နှစ်ဦးပိုင်းမှစ၍၂ဝ၂၅ခုနှစ်အတွင်း ခြေကုပ်စခန်းများကိုကွပ်ကဲသောနည်းဗျူဟာ စခန်းသုံးခု၊အခြေချစစ်ဗျူဟာစခန်းတစ်ခု၊တပ်ရင်းဌာနခ မ်းပိုက်နိုင်ခဲ့သည့်အထိအောင်မြင်မှုရရှိခဲ့ တယ်။ထိုပြင်စကစ၏နိုင်ငံတော်အဆင့်အောင်ဇေယျစစ်ဆင်ရေးထိုးစစ်ကို(၅ဝ၃+)ရက်တိုင်တိုင်ပိတ်ဆိုဟန်တားနိုင်ခဲ့တဲ့အပြင်အောင်ဇေယျစစ်ကြောင်းနှင့်ကော့ကရိတ်တွင်အခြေပြုသည့်စကခ၁၂နှင့်တပ်ရင်းဌာနချုပ်အချိုတို အားကနဦးတွင်(KNLA)ဦးဆောင်တပ်ဖွဲကဝိုင်းပတ်ပိတ်ဆို နိုင်ခဲ့တယ်” ဟု KNLA ဗဟိုဌာနချုပ်၏ ထုတ်ပြန်ချက်၌ ဖော်ပြထားသည်။
ထိုသို့ ဟန့်တားပိတ်ဆိုနေစဉ် တပ်မဟာ (၆)နှင့်တပ်မဟာ(၇)နယ်မြေအတွင်း မဆုပ်တမ်းနယ်စပ်ခြေကုပ်စခန်းပေါင်း(၁၈)လုံးကို(KNLA)ဦးဆောင်တပ်က သိမ်းပိုက်နိုင်ခဲ့ဟုလည်း အသိပေးသည်။
စစ်ကောင်စီသည် နိုင်ငံတကာမျက်နှာစာ၌ နိုင်ငံရေး ဂုဏ်သိက္ခာဆည်ရန် အာရှလမ်းမ တခုကို အာရုံစိုက်နေရ၍ စစ်သားမလုံလောက်သဖြင့်ပြည်သူစစ်မှုထမ်းဥဒေနှင့်အကျုံးဝင်သော(ပစ)များကိုအစားထိုးနေရ ကြောင်းလည်း ဖော်ပြသည်။
“စစ်သားတွေကိုဆေးတိုက်ကြွေးပြီးဒိုင်းအဖြစ်အသုံးချကာအတင်းမောင်းတင်တယ်။စကစ တပ်ဖွဲဝင်များထိုးစစ်လုပ် နေစဉ်အတွင်းတော်လှန်ရေး တပ်ဖွဲ့သို့ ရောက်ရှိလာသောစကစတပ်ဖွဲဝင်အားလုံးလိုလိုဆေးအာနိသင်မပျက်ပျယ် သေးတာမို့ ရက်သတ္တပတ်ကြာအထိဦးနှောက်ပုံမှန်မဟုတ်ဖြစ်နေတာကိုတွေ့ရှိရတယ် ။စစ်သားတွေအားတဒင်္ဂလူစိတ်ပျောက်အောင် လုပ်ဆောင် ကာ စက်ရုပ်သဖွယ် ရှေ့သို့ မောင်းတင်နေရပြီးလက်နက်ကြီး၊အမြောက်၊မစ်ဇိုင်း ဒုံးကျည်၊ဒရုန်း၊လေကြောင်းပစ်ကူသာလွန်လက်နက်ဖြင့်တပ်၏အရင်းအမြစ်အားလုံးထုတ်သုံးလိုက်ရတယ်” ဟု KNLAက ထုတ်ပြန်သည်။
တနိုင်ငံလုံးရှိမြေထုနှင့် သယံဇာတအရင်းအမြစ်ဖြင့် နှစ်ပေါင်း၇၀ကျော်စိတ်ကြိုက်စီမံ၍ လိုသလိုနိုင်ငံတကာ၏ပံ့ပိုးမှုရရှိထားသောတပ်(စစ်ကောင်စီတပ်) အားမည်သည့်နိုင်ငံထံမှအကူအညီဘယ်သောအခါမရရှိသည့် KNU လက်အောက်ခံ တပ်မတော်က နိုင်ငံတော်အဆင့် စစ်ဆင်ရေးကို ရက်ပေါင်း ၅၀၀ကျော် ပိတ်ဆို့ နိုင်ခြင်းသည် ခံစစ်ရှင်ပျောက်ကြားနည်းဗျူ ဟာကိုကျော်လွန်ပြီးစိတ်ဓါတ်ရေးရာတွင် ဆီနှင့် ရေကဲ့သို့ ကွာခြားနေပြီဖြစ်၍ တဆင့်တက်ကာ စစ်အောင်နိုင်ခြင်း အမှတ်သင်္ကေတတစ်ခုသို့ရောက်နေပြီ ဖြစ်ဟု ဖော်ပြသည်။
ထို့ကြောင့် အာရှလမ်းမကြီးစစ်ဆင်ရေးတွင်ပါဝင်ကြသော(KNLA /KNDO/PDF/ MLA) တပ်ဖွဲဝင်နှင့်အခြားတို့အား ဂုဏ်ပြုမှတ်တမ်းတင်ကြောင်း ထုတ်ပြန်သည်။
အာဏာသိမ်းစစ်တပ်ကလည်း ကော့ကရိတ်-သင်္ဃန်းညီနောင်-မြဝတီ အာရှလမ်းမကြီး အား ပြန်လည်ထိန်းချုပ်နိုင်ခဲ့ကြောင်း ဝါဒဖြန့်မီဒီယာများမှတဆင့် ဖော်ပြထားပြီး KNU/KNLA ၏ စိတ်ကူးယဉ် စစ်ရေး ရည်မှန်းချက်ဖြစ်သည့် မြဝတီမြို့၊ ကော့ကရိတ်မြို့နှင့် ဘားအံမြို့တို့အား သိမ်းယူကာ သီးခြားလွတ်လပ်သော ကော်သူလေးပြည်နယ်နှင့် ကော်သူလေးအစိုးရ ထူထောင်ရေး စီမံဆောင်ရွက်မှုကို အပြီးတိုင်ရိုက်ချိုး ဖျက်ဆီးနိုင်ခဲ့ဟု ဖော်ပြခဲ့သည်။
ကော့ကရိတ်-သင်္ဃန်းညီနောင်-မြဝတီ အာရှလမ်းမကြီးအား ပြန်လည်ထိန်းချုပ်နိုင်ရေးနှင့် သင်္ဃန်းညီနောင်မြို့အား ပြန်လည်ထိန်းချုပ်နိုင်ရေး ကြိုးပမ်းဆောင်ရွက်ခဲ့ရာတွင် စစ်ဆင်ရေးကာလ တစ်နှစ်ကျော်ကာလအတွင်းတိုက်ပွဲကြီး/ငယ် ၃၈၂ကြိမ် ဖြစ်ပွားခဲ့ပြီး တော်လှန်ရေး ပူးပေါင်းတပ်ဖွဲ့ဝင် အလောင်း ၆၃လောင်း လက်နက် ၅၇လက်ရဟု စစ်ကောင်စီက ဝါဒဖြန့်ထားသည်။
အရာရှိများ အပါအဝင်စစ်ကောင်စီတပ် သေဆုံးထိခိုက်မှု များရှိခဲ့ကြောင်း ဖော်ပြသော်လည်း အရေအတွက် ဖော်ပြမထားပေ။ ထို့ပြင် KNU/KNLAထံ ထွက်ပြေးအလင်းဝင်ရောက်ခဲ့သူများ၏ အခြေအနေကိုလည်း ဖော်ပြမထားပေ။
