စက်တင်ဘာ-၁၆၊ ၂၀၂၅။ ဟန်နွေ/People’s Spring
အာဏာသိမ်းစစ်ကောင်စီပြုလုပ်မည့်ရွေးကောက်ပွဲသည်ဒီမိုကရေစီစံနှုန်းနှင့်မညီသောကြောင့်လွတ်လပ်မှုမရှိသော ရွေးကောက်ပွဲတွင် ပါဝင်မှုမပြုရန် တိုက်တွန်းကြောင်း ကရင်အမျိုးသားအစည်းအရုံး(KNU)ကထုတ်ပြန်သည်။
စက်တင်ဘာလ၁၅ ရက်ကအပြည်ပြည်ဆိုင်ရာဒီမိုကရေစီနေ့တွင် KNU က ယခုကဲ့သို့ထုတ်ပြန်ခဲ့ခြင်းဖြစ်ပြီး ကော်သူးလေအတွက်သာမက မြန်မာတပြည်လုံး ဒီမိုကရေစီ အပြည့်ဝရရှိရန်အတွက် တွန်းလှန်တိုက်ပွဲဝင်ကြသောလူငယ်များ၊တက်ကြွလှုပ်ရှားသူများ၊ရဲဘော်တပ်မှူးများ၊ တော်လှန် ရေး မိတ်ဖက်အဖွဲများအားလုံးနှင့် ခေါင်းဆောင်များ အားလုံးကို ဂုဏ်ပြုကြောင်း ဖော်ပြသည်။
KNU သည် ဒီမိုကရေစီ စံနှုးနှင့်အညီ Bottom-up ဖက်ဒရယ်ဒီမိုကရေစီမူကိုအခြေခံသော နိုင်ငံရေးလမ်းစဥ်များကို ချမှတ်လျက်ရှိပြီး ကော်သူးလေနှင့် မြန်မာပြည်သူများ လိုလားတောင့်တသည့် ဒီမိုကရေစီအစစ်အမှန်ကို ဖော်ဆောင်ရန် တော်လှန်ရေးတပ်ဖွဲများနှင့် ကြိုးစားလုပ်ဆောင် နေကြောင်း အသိပေးသည်။
Public Service Announcement
KNU အနေဖြင့်စစ်ကောင်စီကျင်းပမည့်ရွေးကောက်ပွဲကိုလက်မခံကြောင်း တရားဝင်ထုတ်ပြန်အသိပေးထားသကဲ့သို့ KNU လက်အောက်ခံ ခရိုင်နှင့် တပ်မဟာများကလည်း KNU ဗဟို၏ ရပ်တည်ချက်အတိုင်းရပ်တည်ကာ ရွေးကောက်ပွဲတွင် ပါဝင်ဆောင်ရွက်သူများကို အရေးယူမည်ဟု သတိပေးထားသည်။
စစ်တပ်က တဖက်သတ်ကျင်းပမည့် ရွေးကောက်ပွဲသည် ပြည်သူများကို ငရဲတွင်း ပို့ဆောင်ရန်သာဖြစ်ကြောင်း၊ စစ်အာဏာရှင်ကို သက်ဆိုးရှည်စေမည့် တိုင်းရင်းသား ပြည်သူတရပ်လုံးအပေါ် ဖိနှိပ်ကျွန်ပြု ဂုတ်သွေးစုတ်ပြီးအသက်ရှင်လျက်သေလူနှင့်မခြားသည့်ဘ၀သို့ တွန်းပို့မည့်ရွေးကောက်ပွဲ ဖြစ်ကြောင်း KNU ညောင်လေးပင်ခရိုင် တပ်မဟာ(၃)က ထုတ် ပြန်ထားသည်။
