ဒီဇင်ဘာ-၂၊၂၀၂၅။ဇော်ဝင်း/People’s Spring
နေပြည်တော် PDFတပ်ရင်း (၈၀၂)မှာ တပ်တွင်း အလောင်းဖျောက်ခဲ့တဲ့ဖြစ်စဥ်ကို စစ်ရုံးချုပ်ရုံးက စုံခုံဖွဲ့စစ်ဆေးမှုလုပ်နေပြီလို့ နေပြည်တော်တိုင်းစစ်ဌာနတိုင်းကွပ်ကဲရေးမှူး ဗိုလ်လကျာ်က ပြောပါတယ်။
အလောင်းဖျောက်ဖျက်ကျူးလွန်တယ်ဆိုတဲ့တပ်ရင်း(၈၀၂)ကဒုတပ်ရင်း မှူးနဲ့ ဆရာကျောင်း (ခ) နိုင်လင်းအောင်နဲ့ တပ်ခွဲမှူး ဥက္ကာတို့ကို ရာထူးဖြုတ်သိမ်းပြီး ဖမ်းဆီးထားတယ်လို့ အသိပေးပါတယ်။
“အမှုကို စစ်ရုံးချုပ်၊စစ်ရေးဌာနကနေပြီးစုံခုံဖွဲ့ စစ်ဆေးဆောင်ရွက်နေပြီဖြစ်ပါတယ်။တိုင်းစစ်ဌာနအနေနဲ့ကတော့ အမှု့မှန်ပေါ်ပေါက်ရေးကိုအပြည့်အဝပူးပေါင်းဆောင်ရွက်သွားမှာပါ”လို့ ဗိုလ်လကျာ်က ပြောပါတယ်။
Public Service Announcement
အမှုဖြစ်စဥ်အရ အခုနှစ် ဧပြီအတွင်းမှာ ဒရုန်းတပ်ဖွဲ့ဝင် ရဲဘော်လွှမ်းမိုးက ရဲမေတစ်ဦးအပေါ် အဓမ္မမှုကျူးလွန်တယ်ဆိုတဲ့ အကြောင်းအရင်းနဲ့ပတ်သက်ပြီး စစ်ဆေးနေချိန်မှာ သေဆုံးခဲ့တာလို့ သိရပါတယ်။
အဲဒီဖြစ်စဥ်ကို တပ်ရင်း(၈၀၂) ရဲဘော်ဟောင်းတစ်ဦးဖြစ်တဲ့ ရှိုင်းထက်က တရားလိုပြုလုပ်ပြီး ကရင်နီပြည်ရဲဌာန KSPနဲ့ အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာနကို တိုင်ကြားစာ ပေးပို့ခဲ့ပါတယ်။
တိုင်ကြားစာပါအချက်အလက်တွေအရ ရဲဘော်လွှမ်းမိုးက ဒရုန်းသင်တန်းတက်နေစဥ်မှာ ရဲဘော်ဂျူးဂျူးကို အဓမ္မပြုကျင့်မှု ကျူးလွန်တယ်လို့ စွပ်စွဲခံရလို့ဒရုန်းသင်တန်းတာဝန်ခံကရဲဘော်လွှမ်းမိုးကို တပ်ရင်း (၈၀၂)ကို ပြန်ပို့ခဲ့ပါတယ်။
အဲဒီနောက် ဒုတပ်ရင်းမှူး ဆရာကျောင်း(ခ)နိုင်လင်းအောင်က စခန်းရဲ့ခြောက်ပေါက်မှာ နှစ်ညထည့်ပြီး အမှုနဲ့ပတ်သက်လို့ ရိုက်နှက်စစ်ဆေးတာလို့ သိရပါတယ်။
ရဲဘော်လွှမ်းမိုး ရေတောင်းသောက်ချိန်မှာ တပ်ခွဲမှူး ဥက္ကာက ရေးပုံးထဲ ဆားဖျော်ပြီးလည်ပင်းကို ခြေထောက်နဲ့ ဖိနင်းပြီး ဆားရေတွေလောင်းချခဲ့တယ်လို့ တိုင်ကြားစာမှာ တွေ့ရပါတယ်။
ရဲဘော်လွှမ်းမိုးဟာ ရတဲ့ဒဏ်ရာတွေနဲ့ သုံးရက်မြောက်နေ့မှာ ခြောက်ပေါက်ထဲမှာဘဲ သေဆုံးခဲ့ရပြီးအ လောင်းကို စခန်းရဲ့ ပေ ၃၀၀အကွာမှာ ရဲဘော်ရှစ်ဦးကသွားရောက်မြှုပ်နှံခဲ့ရတယ်လို့ ဆိုပါတယ်။
ရဲဘော်လွှမ်းမိုး သေဆုံးခဲ့တာ၊အလောင်းဖျောက်တာနဲ့ပတ်သက်ပြီး တပ်တွင်းရဲဘော်တွေကို တပ်ရင်းမှူးနဲ့ ဆရာကျောင်း (ခ) နိုင်လင်းအောင်နဲ့ တပ်ခွဲမှူး ဥက္ကာတို့က ခြိမ်းခြောက်ခဲ့တယ်လို့ တိုင်းကြားတဲ့ရဲဘော်ဟောင်းက အသိပေးပါတယ်။
ရဲဘော်လွှမ်းမိုးရဲ့အလောင်းကို ကရင်နီပြည်ရဲဌာနနဲ့ကျေးရွာတာဝန်ရှိသူတွေက ပြီးခဲ့တဲ့နိုဝင်ဘာ နောက်ဆုံးပတ်က တူးဖော်တွေ့ရှိခဲ့ပါတယ်။
