ဒီဇင်ဘာ-၂၅၊၂၀၂၅၊ဇော်ဝင်း/People’s Spring
မွန်ပြည်နယ်၊ ရေးမြို့နယ်မြောက်ပိုင်း စစ်ကြောင်းထိုးလာတဲ့ စစ်ကောင်စီတပ်နဲ့ တိုက်ပွဲဖြစ်ပြီး နှစ်ဖက်ထိခိုက်မှုရှိတယ်လို့ မွန်ပြည်တော်လှန်ရေးတပ်(MSRF)က ထုတ်ပြန်ပါတယ်။
ကူးတို့ဆိပ်ရွာနဲ့ နှစ်ကရင်ကျေးရွာကြားကို စစ်ကောင်စီတပ်က အင်အား ၁၅၀နဲ့ စစ်ကြောင်းထိုးလာတာကြောင့် ဒီဇင်ဘာ ၂၂ ရက် နေ့လယ်၂ နာရီခွဲကနေ ၃နာရီ ၁၅ မိနစ်အထိ တိုက်ပွဲဖြစ်ခဲ့တာလို့ ဆိုပါတယ်။
စစ်ကောင်စီတပ်က ဗိုလ်ကြီးတစ်ဦး အပါအဝင် ၂၉ ဦးဝန်းကျင်သေဆုံးပြီး ၁၀ဦးခန့် ဒဏ်ရာရတယ်တယ်လို့ MSRF က အသိပေးပါတယ်။စစ်တပ်ရဲ့သေဆုံးမှုတွေနဲ့ပတ်သက်လို့ လူထုနွေဦးက သီးခြားအတည်မပြုနိုင်သေးပါဘူး။
Public Service Announcement
တိုက်ပွဲမှာ မွန်ပြည်တော်လှန်ရေးတပ်က ရဲဘော်နှစ်ဦး ကျဆုံးခဲ့တယ်လို့ ထုတ်ပြန်ချက်မှာ ဖော်ပြပါတယ်။
“စစ်ကြောင်းကတော့ အမတ(၃၁၇)ထဲ ကို ပြန်ဝင်သွားပါတယ်”လို့ MSRF ရဲ့တာဝန်ရှိသူ မိတလဥာဏ်က ပြောပါတယ်။
အမှတ်(၃၁၇)အမြောက်တပ်(အမတ-၃၁၇)က ရေးမြို့နယ်၊လမိုင်းမြို့က မော့ကနင်ကျေးရွာအနီးမှာ အခြေစိုက်ထားပါတယ်။
လက်ရှိစစ်ရေးအရ ပြည်သူလူထုအနေနဲ့ စစ်ကောင်စီတပ်စစ်ကြောင်းရဲ့ သတင်းတွေကို နားစွင့်ပြီး သတိနဲ့သွားလာနေထိုင်ကြဖို့လည်း MSRFက တိုက်တွန်းပါတယ်။
အခုနှစ် စက်တင်ဘာလကတည်းက ရေးမြို့နယ်နဲ့ ရေး-ထားဝယ်လမ်းပိုင်းကို ထိန်းချုပ်ဖို့ကြိုးစားနေတဲ့ စစ်ကောင်စီတပ်နဲ့ ဒေသတွင်းတော်လှန်ရေးတပ်ဖွဲ့တွေကြားတိုက်ပွဲတွေ ဆက်တိုက်ဖြစ်ပွားနေပါတယ်။
ရေးမြို့နယ်မှာ စစ်ကောင်စီရဲ့ အမှတ်(၁၉) စစ်ဆင်ရေးကွပ်ကဲမှုဌာနချုပ်(စကခ ၁၉) လက် အောက်ခံ တပ်ရင်းတွေ ဖြစ်တဲ့ ခလရ-၆၁၊ ခလရ -၂၉၉၊ ခမရ -၃၄၃ ၊ ခမရ -၅၈၆၊ ခမရ -၂၈၇တပ်ရင်းနဲ့ အမြောက်တပ် (အမတ ၃၁၆) တပ်တွေလည်း အခြေစိုက်ထားပါတယ်။
