မတ်-၂၃၊ ၂၀၂၆။ဟာနာဆန်/People’s Spring
မကွေးတိုင်း၊ ပေါက်မြို့နယ်တောင်ပိုင်းရှိ ကျေးရွာတွေကို စစ်ကောင်စီတပ်နဲ့ ပျူစောထီးအဖွဲ့တွေစစ်ကြောင်းထိုးလာလို့ ဒေသခံပြည်သူ ထောင်ချီနဲ့ ဘေးလွတ်ရာသို့ ထွက်ပြေးတိမ်းရှောင်နေရပါတယ်။
မနေ့က မတ်လ ၂၂ ရက်က ပေါက်မြို့ပေါ်နဲ့ အမှတ်(၂၄) ကာကွယ်ရေးပစ္စည်းစက်ရုံ(ကပစ-၂၄) ကနေ ထွက်လာတဲ့ စစ်ကောင်စီတပ်ဟာ ကျေးရွာတွေက ပျူစောထီးတွေနဲ့ ပေါင်းပြီး အင်အားအများအပြားနဲ့ ပေါက်မြို့နယ် တောင်ပိုင်းကျေးရွာတွေကို စစ်ကြောင်းထိုးကာ ဒရုန်းတွေပါဝဲပြီး လက်နက်ကြီးတွေနဲ့ပါ ရမ်းသမ်း ပစ်ခတ်ခဲ့ကြောင်း ပေါက်မြို့နယ် လူသားစာနာဌာနက ပြောပါတယ်။
“လက်ရှိ ပေါက်မြို့နဲ့အနီး ပေါက်တောင်ပိုင်းက ၂၂ ရက်နေ့ ညနေကတည်းက ကျေးရွာ ၁၄ ရွာ ယာယီ စစ်ဘေးရှောင်နေရတာပါ”လို့ ပေါက်မြို့နယ် လူသားစာနာဌာနရဲ့ တာဝန်ရှိသူက ပြောပါတယ်။
Public Service Announcement
အဲဒီစစ်ကြောင်းကြောင့် ပေါက်မြို့နယ်တောင်ပိုင်းက ကျေးရွာ (၁၄)ရွာက အိမ်ထောင်စုနှစ်ထောင်နီးပါး၊ ပြည်သူတစ်သောင်းခန့်ဟာ နီးစပ်ရာကျေးရွာတွေနဲ့ တောထဲတောင်ထဲမှာ ယာယီစစ်ဘေးရှောင်နေရကြောင်း ပေါက်မြို့နယ် လူသားစာနာဌာနက အသိပေးပါတယ်။
စစ်ရှောင်ပြည်သူတွေအနေနဲ့ လေကြောင်းရန်နဲ့ လက်နက်ကြီးရန်ပါ အထူးဂရုစိုက်ကြဖို့၊ ပြည်တွင်း ပြည်ပက အလှူရှင်တွေအနေနဲ့လည်း စစ်ရှောင်တွေကို ကူညီပေးဖို့ ပေါက်မြို့နယ် လူသားစာနာဌာနက အသိပေးပါတယ်။
