ဇူလိုင်-၂၊၂၀၂၆။စိုင်းနောင်/People’s spring
စစ်ကိုင်းတိုင်း၊ တမူးနဲ့ ခမ်းပါတ်မြို့ကြားမှာ တိုက်ပွဲဆက်ပြင်းထန်နေပြီး စစ်တပ်က လေကြောင်းကနေဗုံးကြဲလို့ အရပ်သားအချို့သေဆုံးမှုရှိသလို အရပ်သားအချို့လည်း ဖမ်းဆီးသတ်ဖြတ်ခံရတယ်လို့ သတင်းရရှိပါတယ်။
တော်လှန်ရေးတပ်တွေထိန်းချုပ်ထားတဲ့ အိန္ဒိယ- မြန်မာကုန်သွယ်ရေးလမ်းကြောင်းကို နယ်မြေစိုးမိုးမူပြန်ယူမယ်ဆိုပြီး ပြီးခဲ့တဲ့ ဇွန်လဆန်းက အိန္ဒိယခရီးစဥ်မှာ စစ်ခေါင်းဆောင်မင်းအောင်လှိုင်က အိန္ဒိယအစိုးရကို ပြောခဲ့ပြီးနောက်ပိုင်း ကလေး-ခမ်းပါတ်- တမူးလမ်းပိုင်းအတိုင်း စစ်တပ်စစ်ကြောင်းတွေ ဝင်လာလို့ တိုက်ပွဲတွေဖြစ်နေတာပါ။
ဇွန်လလယ်ကတိုက်ပွဲတွေအတွင်း ခမ်းပါတ်မြို့ကို စစ်တပ်က ထိန်းချုပ်ခဲ့ပေမယ့် တိုက်ပွဲတွေဆက်ဖြစ်နေသလို လေကြောင်း ဗုံးကြဲမှုနဲ့ အရပ်သားတွေကို ဖမ်းဆီးသတ်ဖြတ်မှုတွေရှိနေတယ်လို့ စစ်ဘေးရှောင်နေရတဲ့ ဒေသခံတွေက ပြောပါတယ်။
Public Service Announcement
” အရပ်သားတွေကို ပစ်မှတ်ထားနေတာ။ခမ်းပတ်မှာ တစ် ယောက်ပစ်သတ်ခံရတယ်။ တစ်ယောက်က ဗုံးဒဏ်ကြောင့်သေဆုံးတယ်။ ကနန်မှာလည်းဗုံးကြဲခံရလို့ တစ်ယောက်သေဆုံးတယ်”လို့ ဒေသခံတစ်ဦးက ဇွန်လနှောင်းပိုင်း အခြေအနေကို ပြောပါတယ်။
ဒါ့အပြင် ပျောက်ဆုံးနေတဲ့ အရပ်သားအချို့လည်းရှိနေပြီး ဘေးကင်းစိတ်ချရတဲ့ နေရာအထိ ရှောင်တိမ်းကြဖို့ တော်လှန်ရေးတပ်တွေက သတိပေးထားပါတယ်။
လက်ရှိဒေသတွင်း စစ်ရေးအခြေအနေကြောင့် ကလေး -ခမ်းပါတ်-တမူး ကားလမ်းမဘေး ကျေးရွာတွေဖြစ်တဲ့ ရန်မျိုးအောင်၊ စော်ဘွားရေရှင်၊ ကျွန်းတော့ရေရှင်၊ နန်ကတိတ်၊နန်မွန်းတားနဲ့ ခွန်မွန်းနွမ်ကျေးရွာအပြင် ကျေးရွာ ၁၀ရွာထက်မနည်းက ဒေသခံတွေ ထွက်ပြေးတိမ်းရှောင်နေကြရတယ်လို့ သိရပါတယ်။
တိုက်ပွဲတွေအတွင်း စစ်တပ်က သေဆုံးမှုများနေပြီး စစ်မှုထမ်းသင်တန်းဆင်းနဲ့ ပြည်သူ့စစ်အဖွဲ့ဝင်တွေသေဆုံးမှုကို စာရင်းဖျောက်နေတယ်လို့လည်း တိုက်ပွဲဇုံအနီးမှာရှိနေဆဲ ဒေသခံသတင်းရင်းမြစ်တစ်ဦးက ပြောပါတယ်။
” ကလေး – တမူး လမ်းပွင့်ဖို့ အထက်အမိန့်အရ အောက်မှာထိုးကျွေးခံသေပေးနေတာများလို့ သူတို့ချင်းလည်း ပြဿနာဖြစ်နေကြပြီ”လို့ ၎င်းက ဆိုပါတယ်။
တမူးမြို့နယ်က ဝိတုပ်ကျေးရွာမှာ ဇွန်လ ၁၅ရက်ကနေ ဇွန်လ၂၃ရက်အတွင်း ဖြစ်ပွားတဲ့ တိုက်ပွဲအတွင်း စစ်တပ်ကတပ်ရင်းမှူးအပါအဝင် သေဆုံးသူ၂၀ထက်မနည်းရှိခဲ့တယ်လို့ တော်လှန်ရေး ရဲဘော်အချို့ကပြောပါတယ်။
ကလေး-ခမ်းပါတ်- တမူးလမ်းပိုင်းဟာ အိန္ဒိယ–မြန်မာ–ထိုင်း သုံးနိုင်ငံချိတ်ဆက်မယ့် အဝေးပြေးလမ်းမကြီးမှာ ပါဝင်ပါတယ်။
စစ်တပ်က ခမ်းပါတ်မြို့ကို ကလေးနဲ့ တမူးမြို့ဘက်ကအပြင် မော်လိုက်မြို့ကနေပါ စစ်ကြောင်းသုံးကြောင်းခွဲပြီး ဝင်လာတာလို့ ဇွန်လ ၈ရက်ကစပြီး တိုက်ပွဲတွေဖြစ်ခဲ့တာပါ။ လက်ရှိမှာတော့ ခမ်းပါတ်မြို့ထဲမှာ စစ်တပ်စစ်ကြောင်းတွေရှိနေပြီး လေကြောင်းတိုက်ခိုက်မှုတွေနဲ့ မြေပြင်စစ်ကြောင်းထိုးမှုတွေဆက်ရှိနေတယ်လို့ သတင်းရရှိပါတယ်။
