ဇူလိုင်-၃၊၂၀၂၆။ဆဏ်း/People’s Spring
တော်လှန် သဘင်ပညာရှင်တွေ အဓိကပါဝင်သရုပ်ဆောင်ထားတဲ့ အနုပညာ ဆေးတစက် ရုပ်ရှင်ကို ကနေဒါနိုင်ငံမှာ ပွဲဦးထွက်ပြသသွားမယ်လို့ ဒီဇာတ်ကားရဲ့ ဒါရိုက်တာ အောင်သော်က ပြောပါတယ်။
” ၂၀၂၁ အာဏာသိမ်းပြီးနောက် ၂၀၂၂ အကူးကာလမှာ PDF တွေကို ထောက်ပို့ပေးနေတဲ့ မထင်ရှားတဲ့ တော်လှန်မင်းသားလေးတစ်ယောက် ထိုင်းနိုင်ငံမှာ ရှိခဲ့ပါတယ်။ သူက ပုံမှန်အလုပ်လုပ်ရင်း အားတဲ့အချိန် အပတ်တိုင်းမှာ မင်းသားဝတ်စုံအပြည့်အစုံနဲ့ ရန်ပုံငွေပွဲတွေမှာ ပါဝင်ကပြပြီး တော်လှန်ရေးအတွက် အလှူခံပေးနေတာကို ကြည့်ပြီး ကျွန်တော်ကိုယ်တိုင် ဇာတ်တစ်ခု ရေးဖြစ်သွားခဲ့တာပါ။ ဒါကတော့ “အနုပညာဆေးတစက်” ဆိုပြီး ဖြစ်လာခဲ့ရတဲ့ အစပဲ ဖြစ်ပါတယ်။ ” လို့ ဒါရိုက်တာအောင်သော်က ပြောပါတယ်။
ဒီဇာတ်ကားကို ဇူလိုင် ၁၁ ရက် နေ့လည် ၁ နာရီမှာ ကနေဒါနိုင်ငံ ဗန်ကူးမားမြို့မှာ ပွဲဦးထွက် ပြသသွားမှာဖြစ်ပြီး ကြိုတင်လက်မှတ်တွေ ဝယ်ယူနိုင်ကြောင်း အနုပညာဆေးတစက် ရုပ်ရှင်ရဲ့ ပေ့ခ်ျမှာ ကြေညာထားပါတယ်။
Public Service Announcement
အဲဒီဇာတ်ကားမှာ အဓိကသရုပ်ဆောင်တွေ အနေနဲ့ သားစစ် ၊ ကဲကဲ ၊ အောင်ပန်းညိုတို့က ပါဝင် ထားပြီး CDM သဘင်ပညာရှင်တွေလည်း ပါဝင်ထားပါတယ်။
” တော်လှန်ရေးဘက်မှာ ပါဝင်လာကြတဲ့ သဘင်အနုပညာရှင်တွေအားလုံးပေါင်းစပ်ပါဝင်ထားတဲ့ဇာတ်ကား၊ တော်လှန်ရေးနောက်ကွယ်မှာ သူတို့တွေ ဘယ်လိုအခက်အခဲတွေကို ရင်ဆိုင်ကျော်လွှား ဖြတ်သန်းနေရလဲဆိုတာနဲ့ ရှေ့ဆက်ပြီးတော့ကော တော်လှန်ရေးမှာ ဘယ်လိုမျိုး ဆက်လက်ဖြတ်သန်းသွားမလဲဆိုတာတွေကို ပေါင်းစပ်ပုံဖော်ထားတဲ့ ဇာတ်ကား ” လို့ တော်လှန်အနုပညာရှင်တစ်ဦးဖြစ်တဲ့ လူရွှင်တော်ပေါက်စီက ညွန်းထားပါတယ်။
