ဇူလိုင်-၅၊ ၂၀၂၆။ ထားမြတ်/People’s Spring
ချင်းပြည်နယ် မင်းတပ်နဲ့ ကန်ပက်လက်မြို့နယ်တွေကို ထိုးစစ်ဆင်လာတဲ့ စစ်ကောင်စီတပ်နဲ့ တိုက်ပွဲတွေ ဆက်ရှိနေကြောင်း ချင်းပြည်သူ့အစည်းအရုံး(CPU/CPA) အထွေထွေအတွင်းရေးမှူး ဆလိုင်းယောမာန်က ပြောပါတယ်။
ဇူလိုင် ၄ရက်က ကျင်းပတဲ့ ချင်းညီနောင်အဖွဲ့ဝင် ချင်းပြည်သူ့အစည်းအရုံး၊ ချင်းပြည်သူ့တပ်မတော် ထိန်းချုပ်နယ်မြေအတွင်း စစ်ဘေးရှောင်တွေအတွက် အရေးပေါ် ရံပုံငွေ ရတနာစျေးရောင်းပွဲမှာ ဆလိုင်းယောမာန်တက်ရောက်ပြီး အခုလို အသိပေးခဲ့တာပါ။
” လက်ရှိမှာ မြေပြင်မှာတော့ တိုက်ပွဲတွေ ဆက်ပြင်းထန်နေပါတယ်။ စစ်ကောင်စီကလည်း လေကြောင်း တိုက်ခိုက်မှု တောက်လျှောက်ရှိနေပါတယ်” လို့ ဆလိုင်းယောမာန်က ပြောပါတယ်။
Public Service Announcement
ရဲဘော်တွေအနေနဲ့ အကောင်းဆုံးကြိုးစား တိုက်ပွဲဝင်နေကြပြီးတဖက်မှာလည်း အခက်အခဲတွေရှိနေကြောင်း အသိပေးပါတယ်။တနိုင်ငံလုံး အခက်အခဲ ကြုံနေရပြီး စစ်ဒဏ်ခံနေရတဲ့ ဒေသတွေပိုခံစားရတယ်လို့ သူက ပြောပါတယ်။
စစ်တပ်ဟာ ချင်းတောင်ပိုင်း ပြန်ထိန်းချုပ်နိုင်ဖို့ လူလှိုင်းလုံး အသုံးပြု အရှိန်အဟုန်နဲ့ ထိုးစစ်ဆင်ခဲ့တာလို့ ပြောပါတယ်။
“အခြားနေရာတွေမှာ အောင်ပွဲတွေရခဲ့တော့ ဒီမှာလည်းပဲ လွယ်လွယ်ကူကူရမယ်လို့ ထင်ပုံရတယ်။”လို့ ဆလိုင်းယောမာန်ကပြောပါတယ်။
စစ်တပ်ထိုးစစ်ကို တော်လှန်ရေးတပ်တွေအနေနဲ့ အခက်အခဲပေါင်းစုံကြားထဲက ပြန်တွန်းလှန်နိုင်ခဲ့ကြောင်းလည်း ပြောပါတယ်။
ဒါအပြင် မြေပြင်က ရဲဘော်တွေ၊ ပြည်သူတွေအားလုံး ကြိုးပမ်းအားစိုက်နေကြသလို ကူညီပေးကြတဲ့သူအားလုံးကို ကျေးဇူးတင်ကြောင်း ဆလိုင်းယောမာန်က ပြောပါတယ်။
ရှေ့ဆက်မှာ ဒီထက်ပိုပြီး ကြီးမားတဲ့အောင်မြင်မှုတွေရအောင်၊ ကြီးမားတဲ့ မျှော်လင့်ချက်တွေ တကယ်အကောင်အထည်ဖော်လာနိုင်အောင် တော်လှန်ရေးဦးမော့လာအောင် တော်လှန်ပြည်သူတွေ ဂုဏ်ယူရအောင်၊ တရားဘက် ဓမ္မဘက်က ရပ်တည်တဲ့သူတွေ လက်မပြန်ထောင်နိုင်အောင် ဆက်လက် ကြိုးစားရမယ်လို့လည်း ပြောပါတယ်။ အာဏာသိမ်းစစ်တပ်ကို တွန်းလှန်နိုင်ဖို့ တရားမျှတမှု၊ ငြိမ်းချမ်းမှု ပြန်ကိန်းအောင်းလာအောင် အားလုံး ဝိုင်းဝန်းလုပ်ဆောင်ကြဖို့ လည်း တိုက်တွန်းပါတယ်။
စစ်တပ်ဟာ မေလလယ်ကစပြီး ချင်းတောင်ပိုင်းထိုးစစ်ကို အင်အားအလုံးအရင်းနဲ့ ပြုလုပ်လာတာကို ချင်းပြည်သူ့အစည်းအရုံးနဲ့ မဟာမိတ်တပ်တွေက ခုခံတိုက်ခိုက်နေတာပါ။ တိုက်ပွဲ တလခွဲကျော်အတွင်း တော်လှန်ရေးပူးပေါင်းတပ်က တန်ပြန်ထိုးစစ်ဆင်ပြီး စစ်တပ်အထိနာအောင် တိုက်ခိုက်ထားနိုင်ကြောင်းလည်း အသိပေးထားပါတယ်။ တိုက်ပွဲကာလအတွင်း စစ်ကောင်စီတပ် အင်အား ရာချီထိခိုက်သေဆုံးသလို စစ်သုံ့ပမ်းတွေ ဖမ်းမိတာ၊ လက်နက်ခဲယမ်းတွေ သိမ်းရတာတွေရှိတယ်လို့လည်း ချင်းပြည်သူ့အစည်းအရုံးက ထုတ်ပြန်အသိပေးထားပါတယ်။
